ទោះយ៉ាងណាសេចក្ដីរាយការណ៍របស់សារព័ត៌មានជប៉ុន Nikkei មិនបានបញ្ជាក់ពីប្រភពដែលផ្ដល់ព័ត៌មាននេះទេ ហើយក៏មិនបានបញ្ហាញពីចំនួនជាក់លាក់នៃការទទួលភ្ញៀវចូលទស្សនានោះដែរ។ ប៉ុន្ដែ សារព័ត៌មានដដែលនេះ បញ្ជាក់ផងដែរថា រាជរដ្ឋាភិបាលជប៉ុន ក៏នឹងមិនរឹតត្បិតចំពោះភ្ញៀវទេសចរ ចំពោះការប្រើប្រាស់ប្រព័ន្ធដឹកជញ្ជូនសាធារណៈនោះដែរ។
ទោះជាបែបនេះក្ដី គេដឹងថា ក្រោមលក្ខខណ្ឌរឹតត្បិតនាពេលបច្ចុប្បន្ននៅក្នុងប្រទេសជប៉ុន អ្នកដំណើរចូលមកកាន់ប្រទេសជប៉ុនត្រូវដាក់ខ្លួនឯងឲ្យនៅដាច់ដោយឡែកចំនួន ១៤ថ្ងៃសិន និងត្រូវមានប្រើប្រាស់កម្មវិធីដើម្បីតាមដានពីការធ្វើដំណើរផងដែរ។
ការប្រារព្ធកីឡាអូឡាំពិកនៅក្នុងទីក្រុងតូក្យូប្រទេសជប៉ុន ដើមឡើយ មានផែនការនឹងប្រារព្ធនៅថ្ងៃទី ២៤ ខែកក្កដា ដល់ថ្ងៃទី ៩ ខែសីហាឆ្នាំ២០២០ ប៉ុន្ដែ ដោយសារតែមេរោគកូវីដ-១៩ រាតត្បាត ការប្រារព្ធកីឡាលំដាប់ពិភពលោកនេះ ត្រូវបានលើកពេលប្រារព្ធទៅថ្ងៃទី ២៣ ខែកក្កដា ដល់ថ្ងៃទី ៨ ខែសីហា ឆ្នាំ២០២១វិញ។
អត្ថបទទាក់ទង!
ការលើកពេលប្រារព្ធរយៈពេលមួយនេះ វាក៏បានធ្វើឲ្យក្រុមហ៊ុនរៀបចំកម្មវិធីប្រកួតកីឡាអូឡាំពិក ត្រូវចំណាយប្រាក់ប្រមាណ ជាង១ពាន់៩០០លានដុល្លារអាមេរិកផងដែរ។ នេះបើតាមការអះអាងរបស់គណៈកម្មាធិការរៀបចំកីឡាអូឡាំពិក។
ក្រុមហ៊ុនអ្នករៀបចំកម្មវិធីប្រកួតកីឡាអូឡាំពិក បានលក់សំបុត្រសម្រាប់ការចូលទស្សនាការប្រកួតនេះជិត១លានសំបុត្ររួចហើយ សម្រាប់អ្នកទស្សនានៅក្រៅប្រទេស ធៀបនឹងសំបុត្រដែលបានលក់នៅក្នុងប្រទេសជប៉ុនមានប្រមាណ៤លាន៥សែនសំបុត្រ។
អត្តពលិកជាង ១ម៉ឺន១ពាន់នាក់ ត្រូវបានគេរំពឹងថា នឹងចូលរួមប្រកួតប្រជែងកីឡាអូឡាំពិកក្នុងទីក្រុងតូក្យូនៅឆ្នាំក្រោយនេះ ហើយចំនួននេះ ក៏ទំនងជានឹងមិនមានការកាត់បន្ថយនោះឡើយ។
ផែនការអនុញ្ញាតឲ្យភ្ញៀវទេសចរពីក្រៅប្រទេសក្នុងចំនួនច្រើន មកកាន់ប្រទេសជប៉ុននេះ គឺជាការឆ្លើយតបមួយទៅនឹងគម្រោងរបស់នាយករដ្ឋមន្ត្រីជប៉ុន លោក យ៉ូហ្ស៊ី ហ៊ីដេ ស៊ូហ្គា ដើម្បីធ្វើឲ្យប្រសើរឡើងវិញនូវសេដ្ឋកិច្ចរបស់ជប៉ុន តាមរយៈការជំរុញដោយវិស័យទេសចរណ៍ ដែលជាសរសេរគ្រឹះនៃវិធានការសេដ្ឋកិច្ចរបស់ប្រទេសនេះ៕
None
