តើមានកត្តាអ្វីធ្វើឱ្យវិស័យអចលនទ្រព្យជប៉ុនកំពុងបាត់បង់ពន្លឺពីក្រុមវិនិយោគិនបរទេស?

បើតាមក្រុមហ៊ុនប្រឹក្សាអចលនទ្រព្យ CBRE បានឱ្យដឹងថា ការវិនិយោគបរទេសលើអចលនទ្រព្យនៅជប៉ុនបានធ្លាក់ចុះប្រហែល៣០%ក្នុងឆ្នាំ២០២៣ មកនៅត្រឹមជិត៧ពាន់លានដុល្លារ ខណៈដែលការលក់បានកើនឡើងទ្វេដងដល់ប្រហែលជាង៩ពាន់លានដុល្លាររួមបញ្ចូលទាំងការលក់សុទ្ធពីបរទេសចំនួនប្រហែលជាង២ពាន់លានដុល្លារ ដែលជាតួលេខមួយខ្ពស់បំផុតចាប់តាំងពីឆ្នាំ២០១៨។

មូលនិធិវិនិយោគបរទេសទៅលើវិស័យអចលនទ្រព្យសំខាន់ៗរបស់ជប៉ុន បានធ្លាក់ចុះជាបន្តបន្ទាប់នៅក្នុងឆ្នាំ២០២៣។ ជាក់ស្ដែងក្រុមហ៊ុនវិនិយោគ ម៉េផលទ្រី (Mapletree Investments) របស់សិង្ហបុរីបានលក់អគារពាណិជ្ជកម្មរបស់ខ្លួននៅក្នុងទីក្រុងអូសាកា (Osaka) ក្នុងតម្លៃជិត៤០០លានដុល្លារដល់ក្រុមហ៊ុនលក់រាយអេឡិចត្រូនិក អេឌីអន (Edion)។

ចំណែកក្រុមហ៊ុន Fortress Investment Group មានមូលដ្ឋាននៅអាមេរិកបានលក់សណ្ឋាគាររមណីយដ្ឋានមួយនៅក្នុងទីក្រុងអូគីណាវ៉ា ទៅឱ្យក្រុមហ៊ុនអចលនទ្រព្យមួយក្នុងតម្លៃប្រហែលជិត២៧០លានដុល្លារ។ ហើយវិនិយោគិនបរទេសបានបន្តលក់អចលនទ្រព្យរបស់ពួកគេនៅ ជប៉ុនជាបន្តទៀតនៅឆ្នាំ២០២៤ ដោយជាក់ស្ដែងក្រុមហ៊ុន GIC កំពុងស្វែងរកការលក់សណ្ឋាគារ Hilton Fukuoka Sea Hawk ដែលបានបើកដំណើរការក្នុងឆ្នាំ១៩៩៥។

ទំនោរនៃការធ្លាក់ចុះការវិនិយោគបរទេសនេះ មួយផ្នែកដោយសារតែការផ្លាស់ប្ដូររបស់ធនាគារកណ្តាលជប៉ុន ចំពោះគោលនយោបាយរូបិយវត្ថុ។ ក្រុមវិនិយោគិនព្រួយបារម្ភថា នៅពេលអត្រាការប្រាក់ចាប់ផ្តើមកើនឡើងរួចរាល់ហើយ នោះការចំណាយលើកម្ចីនឹងកើនឡើងដែលធ្វើឱ្យប៉ះពាល់ដល់ការវិនិយោគលើវិស័យអចលនទ្រព្យ។ ខណៈដែលទីផ្សារអចលនទ្រព្យរបស់ជប៉ុនត្រូវបានគេមើលឃើញថា ជិតដល់ចំណុចកំពូលហើយនោះ ពេលនេះពួកគេបែរជាកំពុងរាំងខ្ទប់ប្រាក់ចំណេញទៅវិញ ជាពិសេសលើអចលនទ្រព្យដែលពួកគេកាន់កាប់ជាច្រើនឆ្នាំមកហើយ។

លោក ឈីណាតស៊ូ ហានី (Chinatsu Hani) នាយកជាន់ខ្ពស់នៅក្រុមហ៊ុន CBRE បាននិយាយថា ការព្រួយបារម្ភអំពីការកើនឡើងនូវអត្រាការប្រាក់កំពុងធ្វើឱ្យកាន់តែពិបាកឡើងសម្រាប់អ្នកលក់ និងអ្នកទិញក្នុងការព្រមព្រៀងគ្នាពីតម្លៃអចលនទ្រព្យ៕

អត្ថបទ៖ សុខ ជា