លោក Jeff Bezos ក្នុងវ័យ៥៧ឆ្នាំ បានសម្រេចនូវបំណងប្រាថ្នារបស់លោក ដែលប៉ងទុកជាយូរមកហើយ ដោយបានធ្វើដំណើរកម្សាន្ដទៅក្នុងលំហអាកាស ចំងាយប្រមាណ១០៧គីឡូម៉ែត្រផុតពីផ្ទៃដីនៃរដ្ឋតិចសាស សហរដ្ឋអាមេរិក ជាទីដែលយាន្តអវកាសឈ្មោះថា «New Shepard» ផលិតដោយក្រុមហ៊ុន Blue Origin របស់លោកផ្ទាល់ បាញ់បង្ហោះចេញទៅក្នុងល្បឿនជាង ៣.៥០០គីឡូម៉ែត្រក្នុងមួយម៉ោង ក្រោមក្រសែរភ្នែកនៃអ្នកតាមដានទស្សនាការផ្សាយផ្ទាល់រាប់លាននាក់លើកញ្ចក់ទូរទស្សន៍និងបណ្តាញសង្គម។
ដំណើរឡើងទៅអវកាសរបស់ស្ថាបនិកក្រុមហ៊ុនអាម៉ាហ្សូនរូបនេះ បានចំណាយពេលអស់ ១០នាទី និង១០វិនាទី រាប់ចាប់តាំងពីការបាញ់បង្ហោះឡើង រហូតដល់ពេលយាន្តរបស់លោកបានធ្លាក់ចុះ មកប៉ះនឹងផ្អៃដីវិញ។ អំឡុងពេលជាង១០នាទីនៃដំណើរកម្សាន្ដ លោក Jeff Bezos និងអ្នករួមដំណើរបីរូបផ្សេងទៀត បានចំណាយពេលសំកាំងលើអាកាសដោយគ្មានកំលាំងទំនាញ ប្រមាណ៣នាទី ដើម្បីគយគន់ទិដ្ឋភាពក្នុងលំហ និងរូបរាងរបស់ផែនដីមើលពីលើ។
អ្នករួមដំណើរជាមួយលោកទាំងបីរូបទៀតនោះ រួមមាន ប្អូនប្រុសរបស់លោក ឈ្មោះ Mark Bezos អ្នកស្រី Wally Funk ជាស្ត្រីវ័យ៨២ឆ្នាំធ្លាប់ជាអតីតអ្នកបើកបរយន្តហោះ និងយុវជនមួយរូបចុងក្រោយ ដែលជាសិស្សសាលាអាយុ ១៨ឆ្នាំ។
«ថ្ងៃនេះជាថ្ងៃដ៏អស្ចារ្យបំផុត» ជាពាក្យដែលលោក Bezos បាននិយាយមុនគេក្រោយឈានជើងចេញពីយាន្តអវកាស «New Shepard» បន្ទាប់ពីវាបានចុះចតដល់ដីអស់មួយសន្ទុះ។
អត្ថបទគួរអាន
សូមជម្រាបថា នេះមិនគ្រាន់តែការបើកទំព័រសករាជថ្មីនៃទេសចរណ៍អវកាសនោះទេ ប៉ុន្តែវាជាជំហានមួយថ្មីទៀតរបស់វិស័យអវកាសរបស់សហរដ្ឋអាមេរិក និងពិភពលោក ឆ្ពោះទៅរកការបង្កើតយាន្តអវកាស ដែលអាចប្រើប្រាស់បានឡើងវិញច្រើនដង គោលដៅដើម្បីជួយសន្សំសំចៃការចំណាយ ក្នុងវិស័យមួយនេះ និងក្នុងការសិក្សាស្រាវជ្រាវនៃទីអវកាស។
ជាក់ស្តែង យាន្តអវកាស «New Shepard» ដែលប្រើប្រាស់សម្រាប់ដំណើរកម្សាន្តរបស់លោក Bezos កាលពីថ្ងៃអង្គារត្រូវបានគេប្រើប្រាស់ចំនួន២ដងរួចមកហើយ។ បើតាមការអះអាងប្រាប់អ្នកសារព័ត៌មាន ក្រុមហ៊ុនBlue Origin របស់លោកកំពុងខិតខំអភិវឌ្ឍយាន្តនេះធ្វើយ៉ាងណាឲ្យគេប្រើប្រាស់បានយ៉ាងហោចណាស់ ១០០ដងទៀត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
