ក្រសួងទេសចរណ៍ ក៏បានព្រមានដែរថា នឹងចាត់វិធានការណ៍តាមផ្លូវច្បាប់ចំពោះសណ្ឋាគារ និងផ្ទះសំណាក់ទាំងនោះ បើមានការផ្ទុះការតវ៉ាពីសំណាក់ភ្ញៀវស្នាក់នៅ។ នេះបើតាមការបញ្ជាក់របស់មន្ត្រីនាំពាក្យក្រសួងទេសចរណ៍។
ពិធីបុណ្យសមុទ្រលើកទី ៨ ជុំទី២ ដែលប្រារព្ធធ្វើនៅឆ្នាំនេះ គឺក្រោមប្រធានបទ «ទីក្រុងស្អាត ឆ្នេរល្អ ទេសចរណ៍រុងរឿង» ដោយវានឹងត្រូវប្រព្រឹត្តទៅចាប់ពីថ្ងៃសុក្រទី ២០ ដល់អាទិត្យថ្ងៃទី ២០ ខែធ្នូឆ្នាំ២០១៩ នៅខេត្តកំពត ក្រោមអធិបតីភាពសម្ដេច ហ៊ុន សែន នាយករដ្ឋមន្ត្រីនៃកម្ពុជា។
លោក តុប សុភ័ក អ្នកនាំពាក្យក្រសួងទេសចរណ៍ បានឲ្យដឹងថា គិតមកទល់ពេលនេះ ក្រសួងទេសចរណ៍ និងស្ថាប័នពាក់ព័ន្ធ បានត្រៀមរៀបចំដូចជាការតុបតែង និងហេដ្ឋារចនាសម្ព័ន្ធនានាសម្រាប់ការប្រារព្ធពិធីបុណ្យសមុទ្រនេះ បើគិតជារួមសម្រេចបានប្រមាណជាង ៨០% ហើយ។
អត្ថបទទាក់ទង!
ជុំវិញនឹងទៅនឹងការប្រារព្ធពិធីបុណ្យសមុទ្រនៅខេត្តកំពត នៅខែក្រោយនេះដែរ គេសង្កេតឃើញថា បន្ទប់សណ្ឋាគារ និងផ្ទះសំណាក់ចាប់ផ្ដើមកក់ពេញអស់ជាបណ្ដើរៗហើយ។ តួយ៉ាង តាមគេហទំព័រកក់បន្ទប់សណ្ឋារគារ និងផ្ទះសំណាក់អនឡាញ (Booking.com) បានបង្ហាញឲ្យឃើញថា សណ្ឋាគារ និងផ្ទះសំណាក់មួយចំនួននៅខេត្តកំពត ត្រូវបានកក់ពេញអស់រួចហើយ គិតត្រឹមថ្ងៃ ២២ វិច្ឆិកានេះ ខណៈដែលមានមួយចំនួនទៀត បង្ហាញថា មាននៅសល់បន្ទប់ប្រមាណតែ ១ ឬ២ បន្ទប់ប៉ុណ្ណោះ សម្រាប់ជួល។
ទោះយ៉ាងណា មានការលើកឡើងពីមហាជនមកថា នេះវាគ្រាន់តែជាការ ឆ្លៀតឱកាសរបស់ម្ចាស់សណ្ឋាគារ និងផ្ទះសំណាក់ បិទការកក់ពីភ្ញៀវប៉ុណ្ណោះ ដោយម្ចាស់សណ្ឋាគារ និងផ្ទះសំណាក់ទាំងនោះ រង់ចាំដល់ថ្ងៃបុណ្យ ឬកៀកនឹងថ្ងៃបុណ្យតែម្ដង ទើបបើកឲ្យភ្ញៀវកក់ ឬជួលស្នាក់នៅ ដើម្បីជួលបានក្នុងតម្លៃថ្លៃ។
ទាក់ទិនរឿងនេះ លោក តុប សុភ័ក បានបញ្ជាក់ថា នាពេលថ្មីៗនេះ ខាងក្រសួងក៏មានការប្រជុំពីរឿងនេះដែរ ហើយក្រសួងក៏បានអំពាវនាវឲ្យម្ចាស់សណ្ឋាគារ និងផ្ទះសំណាក់ទាំងអស់ បើកការទទួលកក់ពីភ្ញៀវឡើងវិញ និងកុំឆ្លៀតដំឡើងថ្លៃខ្ពស់ជ្រុលហួសហេតុពេក។ ក្រសួងទេសចរណ៍ ក៏ព្រមានចាត់វិធានការផ្លូវច្បាប់ចំពោះម្ចាស់សណ្ឋាគារ និងផ្ទះសំណាក់ ដែលមិនគោរពតាមការណែនាំ និងធ្វើឲ្យមានការផ្ទុះការតវ៉ាពីសំណាក់ភ្ញៀវស្នាក់នៅផងដែរ។
តាមទិន្នន័យពីមន្ទីរទេសចរណ៍ខេត្តកំពត បានឲ្យដឹងថា នៅខេត្តកំពត មានសណ្ឋាគារចំនួន ១៣ កន្លែងដែលមានចំនួនបន្ទប់សរុប ៩៥៣ បន្ទប់ និងផ្ទសំណាក់មានចំនួន ២៤៦ កន្លែងស្មើនឹងចំនួនបន្ទប់ ២.៥៩៤ បន្ទប់ ខណៈដែលភោជនីយដ្ឋានវិញមាន១៨៥ កន្លែង។
មន្ត្រីនាំពាក្យក្រសួងទេសចរណ៍ លោក តុប សុភ័ក បានគូសបញ្ជាក់ថា សម្រាប់ចំនួនបន្ទប់សណ្ឋាគារ និងផ្ទះសំណាក់នៅខេត្តកំពតនេះ អាចនឹងមិនគ្រប់គ្រាន់សម្រាប់ការប្រារព្ធពិធីបុណ្យសមុទ្រនៅខែក្រោយនេះឡើយ ប៉ុន្ដែ ភ្ញៀវទេសចរអាចទៅស្នាក់នៅខេត្តសណ្ឋាគារ និងផ្ទះសំណាក់នៅខេត្តកែប ដែលនៅក្បែរនោះបាន។ មិនមែនប៉ុណ្ណោះ ដើម្បីសម្រួលដល់ការស្នាក់នៅនេះដែរ ក្រសួងទេសចរណ៍ ក៏មានរៀបចំឲ្យមានការបោះតង់ និងការស្នាក់នៅក្នុងផ្ទះប្រជាពលរដ្ឋ ឬហៅថា Homestay ផងដែរ៕
None
