គម្រោងផ្លូវដឹកជញ្ជូនដ៏មហិច្ឆតា Land Bridge របស់ថៃ តម្លៃ២៨ពាន់លានដុល្លារអាម៉េរិក គ្រោងដាក់ឱ្យដំណើរការនៅឆ្នាំ២០៣០

រដ្ឋមន្ត្រីក្រសួងដឹកជញ្ជូនថៃ លោក សុរិយា ជួងរុងរឿងគីត (Suriya Juangroongruangkit) បានថ្លែងកាលពីថ្ងៃទី១ ខែកក្កដា ថា មន្ត្រីពាក់ព័ន្ធនឹងកែសម្រួលចំណុចលម្អិតនៃគម្រោងផ្លូវដឹកជញ្ជូនដ៏មហិច្ឆតា Land Bridge ឱ្យស្របតាមមតិយោបល់របស់ក្រុមវិនិយោគិន និងពលរដ្ឋក្នុងមូលដ្ឋាន ហើយដំណើរការកែតម្រូវនេះនឹងបញ្ចប់នៅត្រីមាសទី៣ឆ្នាំនេះ។

លោករំពឹងថា ការងាររចនា និងការវាយតម្លៃផលប៉ះពាល់បរិស្ថានសម្រាប់ការសាងសង់កំពង់ផែដែលជាផ្នែកមួយនៃគម្រោង Land Bridge នឹងត្រូវបញ្ចប់នៅចុងឆ្នាំនេះ ហើយការងាររចនាផ្លូវរថភ្លើង និងផ្លូវហាយវ៉េតាមបណ្តោយគម្រោងដឹកជញ្ជូន Land Bridge នឹងបញ្ចប់នៅឆ្នាំក្រោយ។

លោកបានបន្តថា រដ្ឋាភិបាលថៃ នឹងជ្រើសរើសក្រុមហ៊ុនម៉ៅការនៅក្នុងត្រីមាសទី៣ ឆ្នាំ២០២៥ និងចុះកិច្ចសន្យានៅដើមឆ្នាំ២០២៦។

រដ្ឋមន្ត្រីក្រសួងដឹកជញ្ជូនថៃរូបនេះបានឱ្យដឹងទៀតថា ការសាងសង់គម្រោងផ្លូវដឹកជញ្ជូនដ៏មហិច្ឆតា Land Bridge នឹងត្រូវបែងចែកជា៣ដំណាក់កាល ដោយការសាងសង់ដំណាក់កាលទី១ នឹងចាប់ផ្តើមនៅឆ្នាំ២០២៦ ហើយនឹងដាក់ឱ្យដំណើរការនៅចុងឆ្នាំ២០៣០។ ចំណែកឯការសាងសង់ដំណាក់កាលទី២ នឹងចាប់ផ្តើមនៅឆ្នាំ២០៣១ ហើយបញ្ចប់នៅចុងឆ្នាំ២០៣៤ ខណៈដែលការសាងសង់ដំណាក់កាលទី៣ នឹងចាប់ផ្តើមនៅឆ្នាំ២០៣៥ ហើយបញ្ចប់នៅចុងឆ្នាំ២០៣៦។

សូមបញ្ជាក់ថា គម្រោងផ្លូវដឹកជញ្ជូនដ៏មហិច្ឆតា Land Bridge នឹងតភ្ជាប់ឈូងសមុទ្រថៃ និងសមុទ្រអែនដាមែន។ គម្រោងនេះរួមបញ្ចូលទាំងកំពង់ផែមួយតម្លៃ៩ពាន់លានដុល្លារអាម៉េរិក ស្ថិតក្នុងខេត្តរ៉ាក់ណង បែរទៅរកសមុទ្រ Andaman និងកំពង់ផែតម្លៃមួយទៀតតម្លៃជាង៨,៣ពាន់លានដុល្លារអាម៉េរិក ស្ថិតក្នុងខេត្តជុំផុនបែរទៅរកឈូងសមុទ្រថៃ ព្រមទាំងផ្លូវហាយវ៉េ និងផ្លូវរថភ្លើងដែលរួមបញ្ចូលគ្នាមានតម្លៃជាង៩,៧ពាន់លានដុល្លារអាម៉េរិក។

រដ្ឋមន្ត្រីក្រសួងដឹកជញ្ជូនថៃលោក សុរិយា ជួងរុងរឿងគីត (Suriya Juangroongruangkit) បាននិយាយថា គម្រោងផ្លូវដឹកជញ្ជូនដ៏មហិច្ឆតា Land Bridge នឹងជំរុញកំណើនផលិតផលក្នុងស្រុកសរុប(GDP) របស់ប្រទេសថៃ ហើយនឹងជួយបង្កើតការងារដល់ទៅ២៨ម៉ឺនកន្លែងនៅក្នុងខេត្តទាំងពីរខាងលើនេះ៕

ដោយ: តែម សុខុម