វិញនឹងបញ្ហានេះ សមាគមរោងចក្រកាត់ដេរកម្ពុជា ហៅកាត់ថា GMAC បានចេញសារាចរណែនាំមួយ នៅថ្ងៃទី ២១ ខែមេសាថា ក្នុងអំឡុងពេលសម្រាកពីការងារនេះដែរ កម្មករកម្មការិនីនៅតែទទួលបានប្រាក់សោរហ៊ុយធ្វើដំណើរ និង ស្នាក់នៅ ប្រាក់រង្វាន់លើកទឹកចិត្ត និងអត្ថប្រយោជន៍ផ្សេងៗទៀតជាធម្មតា ប៉ុន្ដែនៅអំឡុងពេលសម្រាកពីការងារ ពោលគឺនៅពីរសប្ដាហ៍ចុងក្រោយ នៃខែមេសានេះ តាមច្បាប់ការងារ គឺកម្មករកម្មការិនីមិនអាចទទួលបានប្រាក់ឈ្នួលនោះទេ។ ប៉ុន្ដែ សម្រាប់ប្រាក់ឈ្នួល នៅពីរសប្ដាហ៍ដំបូង នៃខែមេសា ខាងរោងចក្រនឹងបើកឲ្យកម្មករកម្មការិនីធម្មតា តែត្រូវធ្វើឡើងនៅក្រោយពេលចប់វិធានការបិទខ្ទប់។
យ៉ាងណាក៏ដោយចុះ លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរកម្ពុជា បានអំពាវនាវដល់ថៅកែរោងចក្រឲ្យជួយឧបត្ថម្ភថវិកាបន្ថែមដល់កម្មករកម្មការិនីតាមលទ្ធភាពរោងចក្រនីមួយៗក្នុងអំឡុងពេលពួកគាត់ផ្អាកការងារ ដោយសារតែវិធានការបិទខ្ទប់នេះ១៤ថ្ងៃនេះ។ ទន្ទឹមនឹងនេះ លោកក៏បានស្នើឲ្យកម្មករកម្មការិនីមានការអត់ធ្មត់ និងយោគយល់ អធ្យាស្រ័យ ចំពោះស្ថានការដ៏លំបាកនេះ។
អត្ថបទទាក់ទង!
ទាក់ទិននឹងបញ្ហានេះដែរ ឯកឧត្តម ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានពន្យល់ដែរថា តាមច្បាប់ស្តីពីការងារក្នុងអំឡុងពេលឈប់សម្រាកនេះ កម្មករកម្មការិនីនិយោជិតនៅតែទទួលបានប្រាក់ឧបត្ថម្ភបន្ថែមលើថ្លៃអាហារ ការធ្វើដំណើរ និងស្នាក់នៅពីថៅកែរោងចក្រធម្មតា។ ប៉ុន្តែពួកគេមិនទទួលបានប្រាក់ឈ្នួលនោះទេ ដ្បិតអំឡុងពេលនេះ ភាគីរោងចក្រ មិនស្ថិតក្នុងការប្រើប្រាស់កម្លាំងពលកម្ម ហើយកម្មករត្រូវបានឈប់សម្រាកពីការងារ។
សូមបញ្ជាក់ថា គិតមកទល់ពេលនេះ រោងចក្រវាយនភណ្ឌ និងកាត់ដេរ ដែលស្ថិតនៅក្នុងតំបន់បិទខ្ទប់ត្រូវបានផ្អាកដំណើរការ១៤ថ្ងៃ ចាប់ពីថ្ងៃទី ១៥ ដល់ថ្ងៃទី ២៨ ខែមេសា។ មិនមែន តែរោងចក្រវាយនភណ្ឌ និងកាត់ដេរទេ ដែលផ្អាក ក៏មានរោងចក្រ និងអាជីវកម្មស្ទើរតែទាំងអស់នៅតំបន់បិទខ្ទប់ គឺរាជធានីភ្នំពេញ និងក្រុងតាខ្មៅ ក៏ត្រូវបានផ្អាកបណ្ដោះអាសន្នដូចគ្នាដែរ។
សូមបញ្ជាក់ដែរថា បើតាមសមាគមរោងចក្រកាត់ដេរ រោងចក្រដែលជាសមាជិករបស់សមាគនេះ មានប្រមាណ ៦០០រោងចក្រ ដែលមានកម្មករនិយោជិតធ្វើការសរុបប្រមាណ ៧០ ទៅ ៨០ម៉ឺននាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
