បើតាមសម្ដេច ហ៊ុន សែន ក្នុងចំណោមប្រជាពលរដ្ឋប្រមាណ ១០ម៉ឺនគ្រួសារ ក្នុងនោះមានអ្នកដែលទទួលផលប៉ះពាល់ពីគ្រោះទឹកជំនន់ ប្រមាណ ១៨ភាគរយ ស្មើនឹងប្រមាណជិត២ម៉ឺនគ្រួសារ ដែលនឹងត្រូវទទួលបានការអន្ដរាគមន៍នេះ ដែលគិតជាទឹកប្រាក់ប៉ាន់ស្មានប្រមាណ ២លាន៤សែនដុល្លារអាមេរិក។
ថ្លែងនាឱកាសអញ្ជើញជាអធិបតីក្នុងពិធីប្រគល់សញ្ញាបត្រជូននិស្សិតជ័យលាភី នៅថ្ងៃទី១៧ ខែតុលា ឆ្នាំ២០២២ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានអំពាវនាវដល់គ្រឹះស្ថានហិរញ្ញវត្ថុនៅកម្ពុជា ទាំងអស់មេត្តាយោគយល់ និងអនុគ្រោះដល់ប្រជាពលរដ្ឋ តាមរយៈការពន្យារពេល ឬបន្ធូរបន្ថយការប្រាក់ ដើម្បីសម្រួលបន្ទុកដល់ប្រជាពលរដ្ឋ ដែលរងគ្រោះដោយសារទឹកជំនន់។ សម្ដេចតេជោ បានអំពាវនាវ កុំឲ្យមានការចុះទៅរឹបអូសផ្ទះសម្បែងដីធ្លីរបស់ប្រជាពលរដ្ឋ ពលរដ្ឋដែលជំពាក់គ្រឹះស្ថានមីក្រូហិរញ្ញវត្ថុ ខណៈពួកគេកំពុងជួបការខ្វះខាតដោយសារគ្រោះទឹកជំនន់។ បន្ថែមពីនេះ សម្ដេចតេជោ ហ៊ុន សែន បានប្រាប់ឲ្យធនាគារជាតិនៃកម្ពុជា រៀបចំកិច្ចប្រជុំ ជាមួយនឹងម្ចាស់គ្រឹះស្ថានហិរញ្ញវត្ថុ ដើម្បីដោះស្រាយបញ្ហានេះ ផងដែរ។
បើតាមប្រសាសន៍របស់សម្ដេចតេជោ ហ៊ុន សែន កម្ពុជាបាននិងកំពុងប្រឈមខ្លាំងនឹងបញ្ហាគ្រោះទឹកជំនន់ ដូច្នេះ សម្ដេច ក៏បានបញ្ជាទៅឯកឧត្តម អូន ព័ន្ធមុន្នីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ចុះទៅត្រួតពិនិត្យវាយតម្លៃបន្ទាន់នូវផលប៉ះពាល់ពីគ្រោះទឹកជំនន់ដែលបាននិងកំពុងវាយលុកខ្លាំង នៅតាមបណ្ដាខេត្តជាច្រើនរបស់កម្ពុជា ដូចជា ការផ្ដល់គ្រាប់ពូជស្រូវ និងគ្រាប់ពូជដំណាំផ្សេងៗ ដល់ប្រជាពលរដ្ឋឲ្យទាន់ពេលវេលា។ សម្ដេចបន្តថា ក្នុងចំណោមប្រជាពលរដ្ឋប្រមាណ ១០ម៉ឺនគ្រួសារ ក្នុងនោះមានអ្នកដែលទទួលផលប៉ះពាល់ពីគ្រោះទឹកជំនន់ ប្រមាណ ១៨% ដែលស្មើនឹងប្រមាណជិត ២ម៉ឺនគ្រួសារ ដែលនឹងត្រូវទទួលបានការអន្ដរាគមន៍នេះ។ បើតាមសម្ដេច ហ៊ុន សែន ក្នុងចំណោមប្រជាពលរដ្ឋរងគ្រោះប្រមាណ ២ម៉ឺនគ្រួសារនេះ រាជរដ្ឋាភិបាលនឹងផ្ដល់ប្រាក់ឧបត្ថម្ភជូន ក្នុងរយៈពេល ៣ខែ ដែលតាមការប៉ាន់ស្មានទឹកប្រាក់ដែលរដ្ឋនឹងត្រូវចំណាយមានប្រមាណ ២លាន៤សែនដុល្លារអាមេរិក។
អត្ថបទគួរអាន
ភ្ជាប់ជាមួយបញ្ហានេះ សម្ដេចក៏បានផ្ដាំផ្ញើដល់មន្រ្តីកសិកម្ម និងអាជ្ញាធរពាក់ព័ន្ធទាំងអស់ ត្រូវបង្កើនការយកចិត្តទុកដាក់ជាមួយប្រជាពលរដ្ឋ ពិសេសត្រូវចុះផ្ទាល់ជាមួយប្រជាពលរដ្ឋ ត្រូវដោះស្រាយបញ្ហាជូនប្រជាពលរដ្ឋឲ្យបានទាន់ពេលវេលា និងមិនត្រូវជិះសេះមើលផ្កានោះទេ ដោយសម្ដេចបានសង្កត់ធ្ងន់ថា ស្ថិតក្នុងកាលៈទេសៈនេះ គឺទាមទារឲ្យវិស័យកសិកម្ម ត្រូវយកចិត្តទុកដាក់ និងធ្វើអន្តរាគមន៍ជាបន្ទាន់។ បើតាមការវាយតម្លៃរបស់សម្ដេច ហ៊ុន សែន នាយករដ្ឋមន្រ្តីនៃកម្ពុជា នៅឆ្នាំ២០២២នេះ ផលប៉ះពាល់ដោយសារគ្រោះទឹកជំនន់នៅកម្ពុជា ហាក់មានភាពធូរស្បើយជាងឆ្នាំ២០២០ បន្តិច ដោយសម្ដេចពន្យល់ថា នៅឆ្នាំ២០២០ ស្ទើរទូទាំងប្រទេសកម្ពុជា ត្រូវរងគ្រោះធ្ងន់ធ្ងរដោយសារបញ្ហានេះ តែសម្រាប់ឆ្នាំ២០២២នេះ ផលប៉ះពាល់ដោយសារទឹកជំនន់នេះ មានដោយអន្លើតែប៉ុណ្ណោះ៕
