ក្រុមហ៊ុន លីហួរ លីស៊ីង ប្រកាសកម្លាយខ្លួនទៅជា គ្រឹះស្ថានមីក្រូហិរញ្ញវត្ថុ ដោយផ្តោតលើសេវាបង់រំលស់រថយន្ដ និងម៉ូតូនៅកម្ពុជា

ការកម្លាយខ្លួន ទៅជា គ្រឹះស្ថាន អេច អេហ្វ ស៊ី ខេមបូឌា មីក្រូហ្វាយនែន ម.ក ត្រូវបាន​ក្រុមហ៊ុន​អះអាងថា មិនត្រឹមតែជាផ្នែកមួយ ជួយជំរុញដល់ការអភិវឌ្ឍ​សេដ្ឋកិច្ចជាតិ តាមរយៈ​ការផ្ដល់នូវឱកាស​ការងារដ៏ច្រើន​សម្រាប់​ប្រជាជនប៉ុណ្ណោះទេ ប៉ុន្តែថែមទាំងបាន​ជួយចូលរួមចំណែក​ក្នុងការបំពេញ​នូវ​តម្រូវការ ជូនបងប្អូនប្រជាពលរដ្ឋឱ្យទទួល​បាននូវយានយន្តក្នុងក្តីស្រមៃ​របស់ខ្លួនផងដែរ។

មិនត្រឹមតែប៉ុណ្ណោះ ការកម្លាយខ្លួននេះ ក៏បានឆ្លុះបញ្ចាំងឲ្យឃើញពីការរីកចម្រើន​ប្រកបដោយនិរន្ដរភាព​របស់​ក្រុមហ៊ុន ដោយបានកើតចេញពីការរួមចំណែកដ៏ធំធេងពីសំណាកភាគទុនិក ថ្នាក់ដឹកនាំ និងបុគ្គលិក​​គ្រប់​ជាន់ថ្នាក់ ដែលបានបំពេញការងារ​ប្រកបដោយសុចរិតភាព ក្នុងស្មារតីទទួលខុសត្រូវខ្ពស់​ចំពោះក្រុមហ៊ុន និងអតិថិជន ដើម្បីផ្ដល់នូវការអភិវឌ្ឍ​ផលិតផល និងសេវាកម្ម​ប្រកបដោយគុណភាព និងទុកចិត្ត​សម្រាប់ប្រជាជនកម្ពុជា។

យ៉ាងណាមិញ ចំពោះ គ្រឹះស្ថាន អេច អេហ្វ ស៊ី ខេមបូឌា មីក្រូហ្វាយនែន ម.ក ដែលទើបតែបាន​បង្កើតឡើងថ្មីនេះ គឺមានទស្សនវិស័យអភិវឌ្ឍខ្លួនទៅជា គ្រឹះស្ថានមីក្រូហិរញ្ញវត្ថុ​ឈានមុខគេ​ក្នុងការផ្តល់សេវាកម្ម ភតិសន្យាហិរញ្ញវត្ថុ និងកម្ចី រថយន្ត ម៉ូតូ ទូទាំងព្រះរាជាណាចក្រកម្ពុជា។

បេសកកម្មរបស់​គ្រឹះស្ថានមួយនេះ គឺផ្តល់សេវាកម្មភតិសន្យា និងកម្ចី ជូនដល់បុគ្គល និងក្រុមហ៊ុនសហគ្រាស ជាមួយនឹងមធ្យោបាយ ឬធនធាន ដើម្បីគ្រប់គ្រង​ប្រភពហិរញ្ញវត្ថុរបស់​គេឱ្យមានប្រសិទ្ធភាព និងដើម្បីធ្វើឱ្យជីវភាពរបស់ពួកគេកាន់តែប្រសើរឡើង។ ដើម្បីសម្រេចគោលដៅនេះ គ្រឹះស្ថាន អេច អេហ្វ ស៊ី ខេមបូឌា មីក្រូហ្វាយនែន ម.ក ប្តេជ្ញាធានានូវអត្ថប្រយោជន៍​ដែលមាននិរន្តរភាពជូនដល់ម្ចាស់ភាគហ៊ុន បុគ្គលិក និងសហគមន៍​ទាំងមូល។ គ្រឹះស្ថាន អេច អេហ្វ ស៊ី ខេមបូឌា មីក្រូហ្វាយនែន ម.ក អះអាងទៀតថា នឹងបម្រើតាមគោលការណ៍​សីលធម៌ខ្ពស់បំផុត គ្រប់ពេលវេលា ដោយគោរពច្បាប់ សង្គម និងបរិស្ថាន ។

សូមបញ្ជាក់ថា ក្រុមហ៊ុន លី ហួរ លីស៊ីង ភីអិលស៊ី ត្រូវបានបង្កើតឡើង ដោយឧកញ៉ា លី សុភ័ក្ដ នៅឆ្នាំ២០១៥ ជាមួយនឹងដើមទុនដំបូង ៣លានដុល្លារ ហើយនៅឆ្នាំ២០១៦ ក្រុមហ៊ុន​ទទួលបាន​អាជ្ញាបណ្ណជាផ្លូវការ ពីធនាគារជាតិនៃកម្ពុជា។ កាលពីឆ្នាំ២០២៣ កន្លងទៅ ក្រមហ៊ុននេះ ក៏បាន​ធ្វើការវិនិយោគរួមគ្នា ជាមួយនឹង​ក្រុមហ៊ុន HOTAI FINANCE CO., LTD ដែលជាគ្រឹះស្ថាន​ហិរញ្ញវត្ថុ​ឈានមុខគេមួយនៅតៃវ៉ាន់ផងដែរ៕