លោក Ismail Sabri Yaakob បាននិយាយថា រដ្ឋាភិបាលនឹងចំណាយជាង ៩៥ ពាន់លានដុល្លារ លើគម្រោងអភិវឌ្ឍន៍ផែនការម៉ាឡេស៊ីទី ១២ ដែលមានស្រាប់ និងថ្មីនៅចន្លោះឆ្នាំ ២០២១ និង ២០២៥ ខណៈនៅក្នុងផែនការម៉ាឡេស៊ីលើកទី ១១ បានចំណាយអស់ ៦២ ពាន់លានដុល្លារ។
សូមជម្រាបថា កាលពីខែមុននេះ ធនាគារកណ្តាលម៉ាឡេស៊ី បានទម្លាក់ការព្យាករកំណើនផលិតផលក្នុងស្រុកសរុបរបស់ខ្លួនសម្រាប់ឆ្នាំ ២០២១ ពី ៦% ទៅ ៧,៥% មកនៅត្រឹម ៣% ទៅ ៤% វិញ ហើយវាគឺជាការបន្ទាបការព្យាករជាលើកទី២ពីរនៅឆ្នាំនេះ។
កំណើនសេដ្ឋកិច្ចរបស់ប្រទេសម៉ាឡេស៊ីជាមធ្យមគិតចាប់ពីឆ្នាំ២០១៦ ដល់ឆ្នាំ២០២០ មានប្រមាណ ២,៧% ប៉ុន្ដែ បន្ទាប់ពីមានមេរោគរាតត្បាតកូវីដ១៩ចូលលុកលុយសេដ្ឋកិច្ចរបស់ប្រទេសនេះ ក៏បានដាំក្បាលចុះដល់ទៅ ៥,៦% ។
នៅឆ្នាំ២០២០ ចំណូលពលរដ្ឋម្នាក់ៗនៅក្នុងប្រទេសម៉ាឡេស៊ី មានប្រមាណជាង ១ម៉ឺនដុល្លារអាមេរិក ដែលមានតិចជាង ២០% នៃកម្រិតតម្រូវនៃការក្លាយទៅជាប្រទេសចំណូលខ្ពស់ ហើយម៉ាឡេស៊ីរំពឹងថា នឹងឆ្នាំ២០២៥ ម៉ាឡេស៊ីនឹងអាចឈានទៅសម្រេចគោលដៅប្រទេសចំណូលខ្ពស់នេះបាន។ នេះបើតាមការអះអាងរបស់នាយករដ្ឋមន្ត្រីម៉ាឡេស៊ី លោក អ៊ីស្មែល សាប្រ៊ី យ៉ាកុប។
អត្ថបទគួរអាន
សូមរំឭកថា នៅឆ្នាំ ២០២០ ឱនភាពថវិការបស់រដ្ឋាភិបាលមានចំនួន ៦,២% នៃផលិតផលក្នុងស្រុកសរុប ខណៈពេលដែលគណៈរដ្ឋមន្ត្រីថ្មីៗនេះបានស្នើបង្កើនពិដានបំណុលសាធារណៈពីកម្រិត ៦០% ដែលបានកំណត់កាលពីឆ្នាំមុន ឲ្យឡើងដល់ ៦៥% នៃផលិតផលក្នុងស្រុកសរុប ដើម្បីបង្កើនលទ្ធភាពខ្ចីបំណុលបន្ថែម ដើម្បីស្ដារសេដ្ឋកិច្ចឲ្យស្ទុះងើបឡើងវិញ។
ទោះយ៉ាងណាក៏ដោយ ក្រោយមើលឃើញពីស្ថានភាពជំងឺកូវីដ១៩ នៅប្រទេសម៉ាឡេស៊ីមានការថយចុះ ជាមួយនឹងការជំរុញយុទ្ធនាការចាក់វ៉ាក់សាំង នាយករដ្ឋមន្ត្រីបាននិយាយថា ហិរញ្ញវត្ថុរបស់រដ្ឋាភិបាលត្រូវបានគេរំពឹងថា នឹងមានភាពប្រសើរឡើងដោយចាប់ផ្តើមនៅឆ្នាំ ២០២៣ ខាងមុននេះ៕
អត្ថបទ៖ ស៊ើង និមល់
None
