មជ្ឈមណ្ឌលស្រាវជ្រាវ និងអភិវឌ្ឍវារីវប្បកម្មសមុទ្រ ទទួលជោគជ័យលើការបង្កាត់ពូជត្រីស្ពង់ និងក្តាមសមុទ្រ

លោក ម៉ម សុខតារា ប្រធានមជ្ឈមណ្ឌលស្រាវជ្រាវ និងអភិវឌ្ឍវារីវប្បកម្មសមុទ្របានអះអាងថា ការទទួលបានជោគជ័យលើការបង្កាត់ពូជកូនត្រីស្ពង់ និងក្តាមសមុទ្រនេះ គឺដោយសារទទួលបានការបណ្ដុះបណ្ដាលជំនាញពីអង្គការ JICA ដែលដំណើរការបង្កាត់ភ្ញាស់ជាលើកដំបូងតាំងពីឆ្នាំ២០១៣។ ដោយឡែកការបង្កាត់ពូជកូនក្ដាមសេះបានធ្វើឡើងនៅក្នុងអំឡុងឆ្នាំ២០១៥ និងឆ្នាំ២០១៦ ហើយកូនពូជដែលបង្កាត់បានត្រូវយកទៅព្រលែងក្នុងសមុទ្រ ដែលក្នុង១ឆ្នាំៗមានប្រមាណ៥លានកូន។ បើតាមអ្នកជំនាញរូបនេះ បច្ចុប្បន្នមជ្ឈមណ្ឌលស្រាវជ្រាវ និងអភិវឌ្ឍវារីវប្បកម្មសមុទ្រកំពុងបង្កាត់ពូជក្ដាមថ្មនៅក្នុងទម្រង់សាកល្បង និងពុំទាន់មានការចែកចាយដល់កសិករនៅឡើយទេ ប៉ុន្តែមានផែនការសាកល្បងយកកូនពូជដែលភ្ញាស់បានទៅព្រលែងចូលព្រៃកោងកាង និងតាមសហគមន៍នានា។

ជាមួយគ្នានេះលោក យស់ ចាន់ថាណា អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ បានចាត់ទុកមជ្ឈមណ្ឌលស្រាវជ្រាវ និងអភិវឌ្ឍវារីវប្បកម្មសមុទ្រជាទីកន្លែងដ៏សំខាន់មួយសម្រាប់ផ្គត់ផ្គង់កូនពូជមានសុវត្ថិភាពជូនដល់កសិករ ខណៈមជ្ឈមណ្ឌលនេះ និងមន្ទីរកសិកម្ម មានកិច្ចសហការជិតស្និតដែលតែងតែជួយដោះស្រាយនៅពេលត្រីមានបញ្ហាក្នុងការចិញ្ចឹម។ សម្រាប់អនុប្រធានមន្ទីរកសិកម្មខេត្តព្រះសីហនុរូបនេះ ការផលិតកូនត្រីក្នុងស្រុកកាន់តែខ្លាំង វានឹងជួយដល់កសិករកាន់តែច្រើនតាមរយៈការចំណាយលើថ្លៃដើមទាប បើធៀបនឹងការទិញបន្តពីប្រទេសជិតខាង។

បើតាមលោក ម៉ម សុខតារា មជ្ឈមណ្ឌលស្រាវជ្រាវ និងអភិវឌ្ឍវារីវប្បកម្មសមុទ្រក្នុងខេត្តព្រះសីហនុ ត្រូវបានបង្កើតឡើងនៅឆ្នាំ២០១២ ក្រោមជំនួយថវិកាប្រមាណ១០លានដុល្លារ ពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA)។ មជ្ឈមណ្ឌលនេះ បង្កើតឡើងដើម្បីលើកស្ទួយជីវភាពប្រជាពលរដ្ឋនៅតាមតំបន់ឆ្នេរ និងបង្កើនផលិតផលជលផលសមុទ្រ តាមរយៈការអភិវឌ្ឍវារីវប្បកម្មសមុទ្រ។ បច្ចុប្បន្នមជ្ឈមណ្ឌលនេះបានផ្សារភ្ជាប់រវាងគម្រោង Capfish-Cature និង Capfish-aquaculture របស់អង្គការ UNIDDO ក្រោមជំនួយថវិការរបស់សហភាពអឺរុប EU ដើម្បីសហការគ្នាក្នុងការលើកស្ទួយវិស័យជលផលនៅកម្ពុជា ផងដែរ៕

អត្ថបទ បូ ដូឡា,រូបភាព តែន ចិន