លោក ម៉ូឌី អាចបន្តដឹកនាំប្រទេសឥណ្ឌាសម្រាប់អាណត្តិទី៣ ទោះធ្លាក់ចុះសំឡេងភាគច្រើនក្នុងសភា

គណបក្សផារ៉ាទីយ៉ាចាណាតា (BJP) ដែលកំពុងកាន់អំណាចរបស់លោក ម៉ូឌី បានបាត់បង់សំឡេងភាគច្រើននៅក្នុងសភាជាលើកដំបូងក្នុងរយៈពេល១ទសវត្សរ៍នេះ ដោយគណបក្សនេះត្រូវពឹងផ្អែកលើគណបក្សសម្ពន្ធភាពរបស់ខ្លួន ដើម្បីឈានទៅដឹកនាំប្រទេសដែលមានចំនួនប្រជាជនច្រើនជាងគេបំផុតរបស់ពិភពលោកមួយនេះ។

លទ្ធផលផ្លូវការពីគណៈកម្មាធិការរៀបចំការបោះឆ្នោតរបស់ឥណ្ឌានៅថ្ងៃពុធនេះបានបង្ហាញថា គណបក្សសម្ពន្ធជាតិប្រជាធិបតេយ្យ (NDA) ដែលចងសម្ពន្ធជាមួយនឹងគណបក្ស BJPរបស់លោក ម៉ូឌី ទទួលបានអាសនៈសភាចំនួន២៩៤ ដោយគណបក្ស BJP មានសំឡេង ២៤០អាសនៈ ខណៈដែលសំឡេងភាគច្រើនក្នុងសភាតម្រូវឱ្យមានចំនួន២៧២អាសនៈ។ នេះគឺជាការធ្លាក់ចុះលើកដំបូងចាប់តាំងពីឆ្នាំ២០១៩ ដែលពេលនោះគណបក្សសម្ពន្ធនេះបានឈ្នះកៅអីសភាចំនួន៣០៣អាសនៈ។ ការធ្លាក់ចុះចំនួនអាសនៈនេះ គឺជាសញ្ញាដំបូងនៃការផ្លាស់ប្តូរជាមូលដ្ឋាន។

លោក យ៉ូហ្កិនដ្រា យ៉ាដាវ (Yogendra Yadav) ជាស្ថាបនិកនៃក្រុមនយោបាយតូចមួយដែលមាននិន្នាការប្រឆាំងនឹងគណបក្ស BJP បាននិយាយថា សម្រាប់គណបក្ស BJP ការធ្លាក់ចុះចំនួនអាសនៈនៅក្រោមកម្រិតនៃសំឡេងភាគច្រើននេះ គឺជាសញ្ញាបង្ហាញពីការធ្លាក់ចុះប្រជាប្រិយភាពរបស់លោក ម៉ូឌី តែម្ដង។

ចាប់តាំងពីបានកាន់អំណាចដោយពឹងផ្អែកលើមូលដ្ឋានជាតិនិយមហិណ្ឌូរបស់ខ្លួនអស់រយៈពេល១០ឆ្នាំមកនេះ លោក ម៉ូឌី គឺជាមេដឹកនាំម្នាក់ដែលមិនចេះខុសនោះទេ ដែលធ្វើឱ្យគូរប្រជែងរបស់លោកមានការព្រួយបារម្ភកាន់តែខ្លាំងឡើងថា នយោបាយរបស់លោក ម៉ូឌី កំពុងរុញច្រានប្រទេសឥណ្ឌាឆ្ពោះទៅរកលទ្ធិផ្តាច់ការ៕

អត្ថបទ៖ សុខ មង្គល