គម្រោងសង់ព្រលានយន្តហោះនៅមណ្ឌលគិរីមានពន្លឺឡើងវិញ ក្រោយកម្ពុជាឱ្យក្រុមហ៊ុនថ្មីមួយសិក្សា និងវិនិយោគ

យោងតាមលិខិតរបស់ទីស្តីការគណរដ្ឋមន្រ្តី ចេញផ្សាយនៅថ្ងៃទី៩ ខែមករា ឆ្នាំ២០២៤ បានបញ្ជាក់ថា រាជរដ្ឋាភិបាលបានសម្រេចផ្តល់សិទ្ធិឱ្យសម្ព័ន្ធក្រុមហ៊ុន ហ្វូខឺស សិក្សានិងវិនិយោគលើគម្រោងអាកាសយានដ្ឋានមណ្ឌលគិរី ក្នុងទម្រង់សាងសង់-ធ្វើអាជីវកម្ម-ផ្ទេរ (BOT) និងការអភិវឌ្ឍទីក្រុងរណបពហុបំណង និងមជ្ឈមណ្ឌលទំនិញផ្លូវអាកាសនៅខេត្តមណ្ឌលគិរី។ ទន្ទឹមនេះ រាជរដ្ឋាភិបាល ក៏បានអនុញ្ញាតឱ្យរដ្ឋាលេខាធិការដ្ឋានអាកាសចរណ៍ស៊ីវិល សហការជាមួយសម្ព័ន្ធក្រុមហ៊ុន ហ្វូខឺស ក្នុងការរៀបចំអភិវឌ្ឍន៍គម្រោងនេះស្របតាមច្បាប់ និងនីតិវិធីជាធរមាននៃកម្ពុជាផងដែរ។

ជុំវិញរឿងនេះ ឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលបានគូសបញ្ជាក់ថា គម្រោងវិនិយោគលើអាកាសយានដ្ឋានមណ្ឌលគិរីថ្មី និងការអភិវឌ្ឍទីក្រុងរណបពហុបំណងនេះ គឺអាស្រ័យទៅលើការសិក្សាជាក់ស្តែង ពោលគឺប្រសិនបើក្រុមហ៊ុននេះ សិក្សារកឃើញថា ដំណើរការល្អនោះ គម្រោងនេះនឹងឈានទៅដល់ការដាក់ទុនវិនិយោគតែម្តង។

បើតាមមន្ត្រីជាន់ខ្ពស់អាកាសចរណ៍ស៊ីវិលរូបនេះ ក្រុមហ៊ុន ហ្វូខឺស គ្រុប ដែលដឹកនាំដោយក្រុមហ៊ុន ហ្វូខឺស ត្រេន គ្លូប៊ល វេនឈ័រ ឯ.ក គឺជាក្រុមហ៊ុន ដែលមានការចូលរួមពីវិនិយោគមកពីប្រទេសម៉ាឡេស៊ី ចិន និងអារ៉ាប់។ យ៉ាងណាមិញ ឯកឧត្តម ស៊ីន ចាន់សេរីវុត្ថា ក៏បានស្នើឱ្យភាគីពាក់ព័ន្ធទាំងអស់ ជាពិសេសអ្នកវិនិយោគអចលនទ្រព្យនៅខេត្តមណ្ឌលគិរី ផ្តល់កិច្ចសហការគាំទ្រ ដោយមិនត្រូវឆ្លៀតឱកាសដំឡើងថ្លៃអចលនទ្រព្យនៅតំបន់ដែលត្រូវសិក្សាគម្រោងនេះ ដែលនាំឱ្យមានការរាំងស្ទះដល់គម្រោងនេះ។

គួរជម្រាបថា រាជរដ្ឋាភិបាលបានផ្តល់សិទ្ធិឱ្យក្រុមហ៊ុនចិន China Power សិក្សាលើគម្រោងវិនិយោគអាកាសយានដ្ឋាននៅខេត្តមណ្ឌលគិរីនេះ កាលពីចុងឆ្នាំ២០២០ ហើយក្រុមហ៊ុននេះបានបញ្ចប់ការសិក្សាបឋម ដោយរង់ចាំតែការសិក្សាលម្អិតប៉ុណ្ណោះ។ ប៉ុន្តែដោយសារវិបត្តិជំងឺកូវីដ-១៩ និងស្ថានភាពសេដ្ឋកិច្ចសកលបានធ្វើឱ្យគម្រោងនេះត្រូវបានជាប់គាំង ដោយសាក្រុមហ៊ុនអភិវឌ្ឍន៍គម្រោងនេះបានជួបបញ្ហាហិរញ្ញវត្ថុ។ ព្រលានយន្តហោះខ្នាតតំបន់មួយនេះកន្លងមក គ្រោងសាងសង់លើផ្ទៃដី៣០០ហិកតា ដែលមានចម្ងាយប្រហែល២០គីឡូម៉ែត្រពីទីក្រុងសែនមនោរម្យ ដែលតាមការប៉ាន់ស្មានអាចនឹងចំណាយថវិកាវិនិយោគប្រមាណជាង៨០លានដុល្លារ។

សូមជម្រាបថា រាជរដ្ឋាភិបាលកម្ពុជា បានដាក់ចេញផែនការមេឆ្នាំ២០២១-២០៣៥ ដើម្បីអភិវឌ្ឍន៍ខេត្តមណ្ឌលគីរី ឱ្យក្លាយជាតំបន់អេកូទេសចរណ៍ធម្មជាតិ និងប៉ូលសេដ្ឋកិច្ចទី៤ ប្រចាំភូមិភាគឦសាន បន្ទាប់រាជធានីភ្នំពេញ តំបន់ឆ្នេរ និងខេត្តសៀមរាប។ តាមរយៈផែនការនេះ ខេត្តមណ្ឌលគិរីរំពឹងថា នឹងអាចទាក់ទាញភ្ញៀវទេសចរបរទេសបានប្រមាណ៩ម៉ឺននាក់ និងភ្ញៀវទេសចរក្នុងស្រុកប្រមាណ២លាននាក់នៅឆ្នាំ២០៣៥៕