ជាមួយគ្នានេះ រាជរដ្ឋាភិបាលកម្ពុជា រំពឹងថា កម្មករនិយោជិតក្នុងវិស័យកាត់ដេរ ប្រមាណជាង ៧៣ម៉ឺននាក់ នឹងអាចទទួលបានអត្ថប្រយោជន៍ដោយផ្ទាល់ និងប្រយោលពីគោលនយោបាយគាំពារសង្គមនេះ។
គោលនយោបាយគាំពារសង្គម គឺជាយន្តការចម្បងមួយ ដើម្បីបង្កើតឲ្យមានសេដ្ឋកិច្ចដែលប្រកបដោយបរិយាបន្ន ដែលបង្កលក្ខណៈឲ្យកម្មករនិយោជិតវិស័យកាត់ដេរ និងក្រុមគ្រួសាររបស់ពួកគេមានលទ្ធភាពកាត់បន្ថយភាពងាយរងគ្រោះ ដែលបង្កឡើងដោយវិបត្តិសេដ្ឋកិច្ច។ យ៉ាងណាក៏ដោយ ដើម្បីជួយជ្រោមជ្រែងរដ្ឋាភិបាលកម្ពុជា ក្នុងការដោះស្រាយបញ្ហាប្រឈមមទាំងនោះ អង្គការអុកស្វាមនៅកម្ពុជា បានសហការជាមួយអង្គការក្រៅរដ្ឋាភិបាល និងសហជីពចំនួន៤ ដើម្បីអនុវត្តគម្រោងខាងលើនេះ។ ការដាក់ចេញនូវគោលនយោបាយគាំពារសង្គមនេះ ក្នុងគោលបំណងដោះស្រាយបញ្ហាប្រឈមនានា ដែលកើតមានក្នុងវិស័យកកាត់ដេរនៅកម្ពុជា។ គំនិតផ្តួចផ្តើមនេះ ត្រូវបានគេរំពឹងថា នឹងផ្តល់ប្រយោជន៍ដល់អ្នកទទួលផលសរុបជាង ២ម៉ឺន៣ពាន់នាក់ ដោយផ្ទាល់ និងប្រមាណ ៧៣ម៉ឺន៥ពាន់នាក់ទៀតដោយប្រយោល។ បន្ថែមលើនេះទៀត គម្រោងនេះត្រូវបានរំពឹងថា នឹងជួយលើកកម្ពស់ការយល់ដឹងពីការគាំពារសង្គម ទៅដល់ពលរដ្ឋប្រមាណ ១លាននាក់ ផងដែរ។
អត្ថបទគួរអាន
លោក សុខ បូរ៉ា លោក សុខ បូរ៉ា ប្រធាននាយកដ្ឋាន តាវកាលិក បេឡាជាតិសន្តិសុខសង្គម បានគូសបញ្ជាក់ថា តាមរយៈការដាក់ឲ្យអនុវត្តនូវគម្រោងគាំពារសង្គមប្រកបដោយបរិយាបន្នដែលឆ្លើយតបទៅនឹងតម្រូវការរបស់កម្មករនិយោជិតក្នុងវិស័យកាត់ដេរនេះ នឹងឆ្លើយតបទៅនឹងតម្រូវការរបស់កម្មករនិយោជិតក្នុងវិស័យកាត់ដេរ ក៏ដូចជា ជួយពង្រឹង និងពង្រីកគោលនយោបាយរបបសន្តិសុខសង្គម និងជួយជ្រោមជ្រែងរាជរដ្ឋាភិបាលក្នុងការដោះស្រាយបញ្ហាសេសសល់មួយចំនួនក្នុងវិស័យកាត់ដេរ។
លោកស្រី សុខ ច័ន្ទឆវី ប្រធានកម្មវិធីអុកស្វាម បានគូសបញ្ជាក់ថា នៅក្នុងគម្រោងគាំពារសង្គម តួនាទីរបស់អង្គការអុកស្វាម ផ្ដោតសំខាន់ទៅលើក្រុមដែលងាយរងគ្រោះ រួមមាន ពលរដ្ឋដែលមានពិការភាព ក្រុមមនុស្សវ័យចំណាស់ដែលគ្មានការងារធ្វើ និងអ្នកប្រកបរបរក្រៅប្រព័ន្ធ។ បើតាមការកត់សម្គាល់របស់លោកស្រី សុខ ច័ន្ទឆវី វិស័យកាត់ដេរ គឺជាវិស័យដែលមានភាពទូលំទូលាយ ក៏ប៉ុន្តែ នៅមានរោងចក្រជាច្រើនដែលនៅអនុវត្តក្រៅផ្លូវការ ដែលមានកម្មករនិយោជិតបម្រើការងារក្នុងរយៈពេលខ្លី មិនទាន់ទទួលបានសេវាគាំពារសង្គម នៅឡើយ។
សូមបញ្ជាក់ថា គិតត្រឹមឆ្នាំ២០២២ បេឡាជាតិសន្តិសុខសង្គម បានចុះបញ្ញីកាសហគ្រាស គ្រឹះស្ថាន និងស្ថាប័ន ក្នុងប្រព័ន្ធនិងក្រៅប្រព័ន្ធសរុបជាង ២ម៉ឺនសហគ្រាស និងមានសមាជិកសរុបជាង ៣លាននាក់។ ដោយឡែក នៅឆ្នាំ២០២០ បានបង្ហាញថា មានកម្មការិនីកាត់ដេរ សរុបចំនួន ៨ម៉ឺននាក់ បានទទួលប្រាក់ឧបត្ថម្ភមាតុភាពពីរដ្ឋាភិបាលកម្ពុជា ដែលមានទឹកប្រាក់សរុបជិត ៨លានដុល្លារ។ នេះបើយោងតាមរបាយការណ៍របស់បេឡាជាតិសន្តិសុខសង្គម៕
