កិច្ចប្រជុំ G20 ដែលប្រទេសឥណ្ឌាធ្វើជាប្រធាននៅឆ្នាំនេះ គឺធ្វើឡើងនៅចំពេលដែលប្រទេសជិតខាងឥណ្ឌានៃតំបន់អាស៊ីខាងត្បូង ដូចជា ស្រីលង្កា បង់ក្លាដេស និងប៉ាគីស្ថាន កំពុងស្វែងកមូលនិធិជំនួយពី IMF កាន់តែខ្លាំង ដោយសារតែសេដ្ឋកិច្ចដាំក្បាលចុះ បណ្ដាលមកពីវិបត្តិកូវីដ១៩ និងសង្គ្រាមរុស្ស៊ី និងអ៊ុយក្រែន។
ជាមួយគ្នានេះ ប្រទេសចិនដែលជាប្រទេសម្ចាស់បំណុលទ្វេភាគីដ៏ធំបំផុតនោះ បានទទូចឲ្យក្រុមប្រទេសសេដ្ឋកិច្ចធំៗធ្វើការវិភាគដោយយុត្តិធម៌ មានគោលដៅច្បាស់ និងស៊ីជម្រៅ អំពីមូលហេតុនៃបញ្ហាបំណុលសកល ខណៈដែលការតវ៉ាកើនឡើងកាន់តែច្រើន ឲ្យប្រទេសម្ចាស់បំណុលកាត់បន្ថយបំណុល ឬត្រូវទទួលការខាតបង់ពីការមិនសងបំណុលត្រឡប់មកវិញជាដើម។
លោកស្រី Kristalina Geogieva អគ្គនាយិកាមូលនិធិរូបិយវត្ថុអន្តរជាតិបានលើកឡើងថា « គេនៅមានការខ្វែងគំនិតគ្នាមួយចំនួននៅលើការរៀបចំរចនាសម្ព័ន្ធបំណុលឡើងវិញ ហើយបច្ចុប្បន្នទាំងម្ចាស់បំណុលទាំងក្នុងវិស័យរដ្ឋ និងឯកជនបានចូលរួមប្រជុំជជែកពិភាក្សាជាមួយគ្នា និងគ្រោបជួបពិភាក្សាគ្នាបន្ថែមទៀត ទៅលើបញ្ហាទាំងនេះ។»
លោកស្រី Kristalina បានបន្ថែមនៅក្រោយកិច្ចប្រជុំតុមូលជាមួយប្រទេសម្ចាស់បំណុលឯកជន និងរដ្ឋ ដែលធ្វើឡើងនៅប្រទេសឥណ្ឌាកាលពីសប្ដាហ៍មុននេះថា ក្រោយបញ្ចប់នូវកិច្ចប្រជុំនេះ វាបានបង្ហាញឲ្យឃើញច្បាស់ថា ភាគីទាំងអស់មានការប្តេជ្ញាចិត្តក្នុងការផ្សាភ្ជាប់ភាពខុសគ្នាសម្រាប់ផលប្រយោជន៍របស់ប្រទេសនានា។ កិច្ចប្រជុំបន្ទាប់ទៀតទាក់ទងនឹងបញ្ហាបំណុលនេះ នឹងត្រូវធ្វើឡើងនៅខែមេសាខាងមុខនេះ ដោយនឹងមានការចូលរួមពីម្ចាស់បំណុលទ្វេភាគីធំៗដូចជាប្រទេសចិន ឥណ្ឌា ក្រុមប្រទេសសេដ្ឋកិច្ចជឿនលឿនទាំង៧ (G7) និងប្រទេសដែលកំពុងជំពាក់បំណុល ព្រមជាមួយនឹងស្ថាប័នផ្ដល់កម្ចីធំៗជាច្រើនទៀត។
អត្ថបទគួរអាន
ក្រៅតែពីការរៀបចំរចនាសម្ព័ន្ធបំណុលឡើងវិញ ការគ្រប់គ្រងរូបិយបណ្ណគ្រីបតូ គឺជាវិស័យអាទិភាពមួយផ្សេងទៀតដែរ សម្រាប់ប្រទេសឥណ្ឌា ដែលលោកស្រី Kristalina យល់ស្របថា ជាជម្រើសល្អសម្រាប់ដោះស្រាយបញ្ហារូបិយវត្ថុ។
អគ្គនាយិកា IMF រូបនេះ បន្ថែមថា មានការបែងចែកភាពខុសគ្នារវាងរូបិយបណ្ណឌីជីថលរបស់ធនាគារកណ្ដាលនីមួយៗ ដែលត្រូវបានគាំទ្រដោយរដ្ឋ និងកាក់ដែលមានស្ថិរភាព និងទ្រព្យសម្បត្តិគ្រីបតូ ដែលត្រូវបានដាក់ចេញឲ្យប្រើប្រាស់ដោយវិស័យឯកជន។
បើតាមលោកស្រី Kristalina គេត្រូវតែមានការជំរុញឲ្យបានខ្លាំងក្លាថែមទៀត ក្នុងការរៀបចំច្បាប់គ្រប់គ្រងលើរូបិយវត្ថុឌីជីថលទាំងនេះ ព្រោះប្រសិនបើបរាជ័យក្នុងការគ្រប់គ្រងវា ឬមានបទបញ្ញត្តិគ្រប់គ្រងយឺតយ៉ាវ នោះវានឹងអាចបង្កើតឲ្យមានហានិភ័យលើស្ថិរភាពហិរញ្ញវត្ថុកាន់តែខ្លាំង។
ពាក់ព័ន្ធនឹងបញ្ហារូបិយវត្ថុឌីជីថលនេះដែរ រដ្ឋមន្ត្រីក្រសួងហិរញ្ញវត្ថុអាមេរិក បានចេញមកអះអាងដែរថា អាមេរិកមិនមានការស្នើឲ្យមានការហាមប្រាមប្រើប្រាស់ឬជួញដូររូបិយវត្ថុឌីជីថលនោះទេ ប៉ុន្ដែ វាត្រូវការមានច្បាប់គ្រប់គ្រងស្ថិតក្រោមក្របខណ្ឌច្បាប់ឲ្យបានច្បាស់លាស់៕
