លោក បេន អ្នកអភិរក្សធនធានធម្មជាតិ បានទទួលសញ្ជាតិខ្មែរទាំងគ្រួសារ

ព្រះរាជក្រឹត្យ ចេញថ្ងៃទី២៦ ខែមករា ឆ្នាំ២០២២ បានត្រាស់បង្គាប់ផ្ដល់សញ្ជាតិខ្មែរ ដោយសញ្ជាតូបនីយកម្មជាចង្កោម ដល់គ្រួសារលោក ដាវិស បេន យ៉ូសែប ដែលមានសមាជិកទាំងអស់ ៤រូប។ ក្នុងនោះមានលោក ដាវិស បេន យ៉ូសែប ​ ផ្ទាល់, ភរិយារបសលោក អ្នកស្រី ដាវិស សារិន ប៉ាទ្រីសា ព្រមទាំងកូនស្រីរបស់ពួកគាត់ពីរនាក់ទៀត គឺកុមារី ដាវិស អាម៉ាលី ការីស និងកុមារី ដាវិស ចារ៉ា កាមីស។

ក្រុមគ្រួសារលោក បេន ​កំពុងរស់នៅ ធ្វើសកម្មភាព ការពារ និងអភិរក្ស​ធនធានព្រៃឈើ និងសត្វព្រៃ ក្នុងដែនជម្រកសត្វព្រៃភ្នំត្នោត-ភ្នំពក នៃខេត្តព្រះវិហារ។ ដែនជម្រកសត្វព្រៃមួយនេះ មានទំហំផ្ទៃដីសរុប ៤២,០៩៧ហិកតា ស្ថិតក្នុងខេត្តព្រះវិហារ និងខេត្តសៀមរាប។ ក្នុងនោះ ផ្ទៃដី ៧ពាន់ហិកតា ដែលមានសក្តានុពលធនធានធម្មជាតិ និងជីវចម្រុះច្រើនប្រភេទ ត្រូវបានក្រសួងបរិស្ថានអនុញ្ញាតឱ្យលោក បេន គ្រប់គ្រង និងអភិរក្ស។

សកម្មភាពកន្លងមក នៃកិច្ចការថែរក្សា និងការពារ​សម្បត្តិធម្មជាតិរបស់លោក បេន បានទទួលការគាំទ្រពីសំណាក់រាជរដ្ឋាភិបាលកម្ពុជា ព្រមទាំងមានការលើកទឹកចិត្តពីក្រសួងបរិស្ថាន មហាជន និងសប្បុរសជន​ជាច្រើនថែមទៀតផង។

គួរជម្រាបជូនថា លោក បេន ដែលជាជនជាតិអាមេរិក និងភរិយាជនជាតិអូស្ត្រាលី បានមករស់នៅប្រទេសកម្ពុជា អស់រយៈពេលជិត ៣០ឆ្នាំមកហើយ។ ពួកគេ បានចំណាយពេលជាង ២០ឆ្នាំ ដើម្បីអភិរក្សធនធានធម្មជាតិ និងសត្វព្រៃនៅក្នុងដែនជម្រកសត្វព្រៃភ្នំត្នោត-ភ្នំពក។ បច្ចុប្បន្ន តំបន់នេះ ត្រូវបាន​ក្រសួងបរិស្ថាន ​ផ្តល់កិច្ចសហការ​អភិរក្សដល់គម្រោងប៊ីទ្រីដ (Be Treed) របស់លោក បេន ហើយបានធ្វើឱ្យក្លាយជាតំបន់​ទេសចរណ៍បែបធម្មជាតិមួយ៕