ដោយឡែក បើតាមសេចក្ដីរាយការណ៍របស់ រ៉យទ័រវិញ ក្រុមហ៊ុនជប៉ុន TOYOTA នឹងផ្អាកផលិតកម្មនៅគ្រប់រោងចក្រដំឡើងរថយន្ដនៅប្រទេសជប៉ុនទាំងអស់តែម្ដង ចាប់ពីរសៀលថ្ងៃទី ២៩ខែសីហានេះតទៅ ខណៈបញ្ហានេះ ត្រូវបានគេមើលឃើញថា អាចនឹងប៉ះពាល់ដល់ទិន្នផលរោងចក្ររថយន្ដក្នុងស្រុករបស់ក្រុមហ៊ុនផលិតថយន្ដលំដាប់កំពូលរបស់ពិភពលោកមួយនេះផងដែរ។
អ្នកនាំពាក្យម្នាក់របស់ក្រុមហ៊ុនរថយន្ដមួយនេះ បាននិយាយប្រាប់អ្នកសារព័ត៌មានថា ក្រុមហ៊ុនកំពុងស្វែងរកប្រភពបញ្ហា ប៉ុន្ដែ វាមិនទំនងជាដោយសារតែការវាយប្រហារតាមលំហរអ៊ិនធើណែតនោះឡើយ។ បញ្ហា គឺនៅត្រង់ថា ពេលនេះក្រុមហ៊ុនមិនអាចធ្វើការបញ្ជាទិញគ្រឿងបង្គុំរថយន្ដបាន ដូចដែលបានធ្វើតាមប្រព័ន្ធនាពេលកន្លងមកនោះទេ។
ទោះយ៉ាងណា គិតត្រឹមព្រឹកថ្ងៃទី ២៩ខែសីហានេះ ក្រុមហ៊ុន TOYOTA នៅមិនទាន់បញ្ជាក់ពីពេលវេលាជាក់លាក់ក្នុងការបើកដំណើរការរោងចក្ររបស់ខ្លួនឡើងវិញនៅឡើយទេ ហើយគេមិនទាន់ដឹងច្បាស់ថា វាអាចនឹងប៉ះពាល់ដល់ទិន្នផលរោងចក្រក្នុងទំហំប៉ុន្មាននោះដែរ។
យ៉ាងណាក៏ដោយចុះ ការផ្អាកដំណើរការរោងចក្ររបស់ TOYOTA នាពេលនេះ ធ្វើឡើងចំពេលដែលផលិតកម្មរោងចក្ររបស់ក្រុមហ៊ុនជប៉ុនមួយនេះ មានការស្ទុះងើបឡើងវិញ បន្ទាប់ពីមានផែនការកាត់បន្ថយទិន្នផល ដោយសារតែបញ្ហាខ្វះខាតបន្ទះឈីប។ ផលិតកម្មរោងចក្រ TOYOTA នៅជប៉ុនបានកើនឡើង ២៩% នៅឆមាសទី១ឆ្នាំនេះ ដែលជាកំណើនខ្ពស់លើកដំបូងក្នុងរយៈពេល២ឆ្នាំមកនេះ៕
