ចាប់តាំងពីពាក់កណ្ដាលខែធ្នូ ឆ្នាំមុនមក ស្ថានទូតរបស់ប្រទេសមីយ៉ាន់ម៉ា នៅតាមបណ្តាប្រទេសសំខាន់ៗក្នុងតំបន់អាស៊ី បានដាក់ចេញច្បាប់ស្ដីពីពន្ធលើប្រាក់ចំណូលថ្មី ជាបន្តបន្ទាប់សម្រាប់ពលរដ្ឋមីយ៉ាន់ម៉ា ដែលកំពុងធ្វើការ និងរស់នៅតាមបណ្ដាប្រទេសទាំងនោះ។ ជនជាតិមីយ៉ាន់ម៉ា នៅប្រទេស ជប៉ុនពេលនេះ ត្រូវបានតម្រូវឱ្យបង់ពន្ធលើប្រាក់ចំណូលរបស់ខ្លួនយ៉ាងតិច២% ប៉ុន្តែអត្រានេះអាចកើនឡើងទៀតដោយអាស្រ័យលើកញ្ចប់ប្រាក់ចំណូលរបស់ពួកគេ។
ចំណែកឯអ្នករស់នៅ និងធ្វើការនៅប្រទេសកូរ៉េខាងត្បូង សិង្ហបុរី ថៃ និងម៉ាឡេស៊ី ក៏ប្រឈមនឹងការបង់ពន្ធ២%នេះដែរ បើទោះបីជាតួលេខនេះអាចនឹងមានការប្រែប្រួលទៅតាមស្ថានភាពស្នាក់នៅ និងកម្រិតប្រាក់ចំណូលរបស់ពួកគេក៏ដោយ។ ចំពោះពលរដ្ឋណាដែលគេចវេះកាតព្វកិច្ចបង់ពន្ធនេះ ពួកគេនឹងត្រូវប្រឈមមុខនឹងផលលំបាកនៅក្នុងការបន្តលិខិតឆ្លងដែនរបស់ពួកគេជាក់ជាមិនខាន។
អត្ថបទគួរអាន
នៅក្រោមកំណែទម្រង់ពន្ធសម្រាប់សារពើពន្ធឆ្នាំ២០២៣ មីយ៉ាន់ម៉ាបានចាប់ផ្តើមតម្រូវឱ្យជនជាតិមីយ៉ាន់ម៉ា ដែលរស់នៅក្រៅប្រទេសត្រូវបង់ពន្ធលើប្រាក់ចំណូលជារូបិយប័ណ្ណបរទេស ដែលពួកគេទទួលបានដោយចាប់អនុវត្តចាប់ពីថ្ងៃទី១ ខែតុលា តទៅ។ ប៉ុន្តែប្រទេសនេះមិនបានចេញផ្សាយព័ត៌មានលម្អិតបន្ថែមទៀតទេ រួមទាំងនីតិវិធីចាំបាច់មួយចំនួនទៀតផងដែរ ហើយវិធានការរបស់អាជ្ញាធរមីយ៉ាន់ម៉ា នេះត្រូវបានគេរំពឹងថា មានបំណងប្រមូលពន្ធត្រលប់មកវិញតាមរយៈការប្រើប្រាស់ច្បាប់ថ្មីមួយនេះ។
ទោះជាអត្រាជាប់ពន្ធសម្រាប់មនុស្សម្នាក់ៗមិនមានទំហំច្រើនក៏ដោយ ក៏ប្រទេសមីយ៉ាន់ម៉ា អាចបានប្រាក់ចំណូលពីការបង់ពន្ធទាំងនេះតិច ឬច្រើនអាស្រ័យលើតួលេខរបស់ពលរដ្ឋមីយ៉ាន់ម៉ា ដែលកំពុងរស់នៅតាមប្រទេសនីមួយៗ ខណៈការបង់ពន្ធជាក់ស្ដែងសម្រាប់ពលរដ្ឋមីយ៉ាន់ម៉ា ម្នាក់ៗអាចបង់ក្រោម៧ដុល្លារនៅប្រទេសជប៉ុន។
ទីភ្នាក់ងារព័ត៌មានឯករាជ្យ អ៊ីរ៉ាវ៉ាឌី (Irrawaddy) របស់ថៃ បានប៉ាន់ប្រមាណថា មានពលរដ្ឋមីយ៉ាន់ម៉ា យ៉ាងតិចចំនួន២លាននាក់ ដែលរស់នៅប្រទេសថៃ ដូច្នេះវាមានន័យថា រដ្ឋាភិបាលយោធាមីយ៉ាន់ម៉ា នឹងបានប្រាក់ចំណូលពីពួកគេចំនួនជិត៩លានដុល្លារក្នុងមួយខែៗ៕
អត្ថបទ៖ សុខ ជា
None
