សារព័ត៌មានរដ្ឋរបស់មីយ៉ាន់ម៉ា The Global New Light of Myanmar បានរាយការណ៍កាលពីពេលថ្មីៗថា របបយោធាមីយ៉ាន់ម៉ាវាយឆ្មក់ចូលឆែកឆេរអគារចំនួន១៤៨ រួមទាំងអន្តេវាសិកដ្ឋាន មន្ទីរពេទ្យកម្ពស់បួនជាន់មួយ និងអគារខារ៉ាអូខេកម្ពស់ពីរជាន់ ដើម្បីបង្ក្រាបការឆបោកតាមប្រព័ន្ធអនឡាញ។ ក្នុងចំណោមអគារទាំងនេះ មានអគារចំនួន១០១អគារត្រូវបានបោសសម្អាតការឆបោកតាមអនឡាញរួចហើយ រីឯអគារចំនួន៤៧ខ្នងទៀតកំពុងស្ថិតក្នុងការបោសសម្អាតអំពើឆបោកនៅឡើយ។
ក្រុមអ្នកជំនាញបានលើកឡើងថា ការឆ្មក់ចូលបង្ក្រាបរបស់របបយោធាមីយ៉ាន់ម៉ាទំនងជាធ្វើឡើងក្នុងកម្រិតមួយមានដែនកំណត់ និងប្រាប់អ្នកឆបោកជាមុនព្រមទាំងមានចេតនាផ្សព្វផ្សាយជាសាធារណៈ ដើម្បីព្យាយាមបន្ធូរបន្ថយសម្ពាធពីអន្តរជាតិ ខណៈក្រុមយោធាធ្វើសកម្មភាពដោយប្រយ័ត្នប្រយែង ដើម្បីកុំឱ្យប៉ះពាល់ដល់ប្រភពប្រាក់ចំណូលដ៏ច្រើនរបស់ពួកគេ។
ការឆបោកតាមប្រព័ន្ធអនឡាញបានរីករាលដាលកាន់តែខ្លាំងនៅតាមតំបន់ព្រំដែន ដែលមានការគ្រប់ គ្រងធូររលុងនៅប្រទេសមីយ៉ាន់ម៉ា ដោយសារសង្គ្រាមស៊ីវិលរ៉ាំរ៉ៃបានផ្តល់ជម្រកដល់ក្រុមឧក្រិដ្ឋជនឆបោកតាមអនឡាញ ដែលភាគច្រើនត្រូវបានជួញដូរឱ្យចូលទៅបម្រើការក្នុងហាងលក់ទំនិញតាមអ៊ីនធឺណិត ប៉ុន្តែអ្នកខ្លះទៀតបានទៅធ្វើការដោយស្ម័គ្រចិត្តដោយសារទទួលបានប្រាក់ឈ្នួលខ្ពស់។
កាលពីខែមុន យោធាមីយ៉ាន់ម៉ា ក៏បានវាយឆ្មក់លើមជ្ឈមណ្ឌលបោកប្រាស់ដ៏ល្បីល្បាញ KK Park ដោយបានរកឃើញអ្នកបោកប្រាស់ជាង២ពាន់នាក់ និងបានធ្វើឱ្យមនុស្សរហូតដល់១,៥០០នាក់ឆ្លងព្រំដែនទៅកាន់ប្រទេសថៃ។
ប្រទេសចិន គឺជាអ្នកគាំទ្ររបបយោធាមីយ៉ាន់ម៉ាដ៏សំខាន់មួយ ប៉ុន្តែអ្នកវិភាគបាននិយាយថា ទីក្រុងប៉េកាំងកាន់តែខឹងសម្បារចំពោះការបោកប្រាស់តាមអនឡាញដ៏រីករាលដាលនៅប្រទេសមីយ៉ាន់ម៉ា ដែលកំណត់គោលដៅ និងចុះឈ្មោះពលរដ្ឋចិនកាន់តែខ្លាំងឡើង។ ប៉ុន្តែការបង្ក្រាបខ្លាំងពេកនឹងធ្វើឱ្យប៉ះពាល់ដល់ប្រភពចំណូលដ៏ច្រើនរបស់របបយោធា ជាផ្នែកមួយនៃការប្រយុទ្ធប្រឆាំងនឹងកងជីវពលនៅក្នុងសង្គ្រាមស៊ីវិល ដែលបានឆាបឆេះប្រទេសនេះចាប់តាំងពីរបបយោធាបានដណ្តើមអំណាចក្នុងរដ្ឋប្រហារឆ្នាំ២០២១៕
ដោយ៖ សុខ មង្គល
