ចិន រុស្សី និងឥណ្ឌា សម្រុកទិញចូលមាសច្រើនជាងគេក្នុងឆ្នាំ២០២៣ តើពួកគេមានផែនការសម្ងាត់អ្វីនៅពីក្រោយរឿងនេះ?
របាយការណ៍ចុងក្រោយបង្ហាញថា សមាជិកសំខាន់ៗចំនួន៣នៃប្លុកប្រទេស BRICS រួមមាន ចិន រុស្ស៊ី និងឥណ្ឌា កំពុងសម្រុកទិញចូលមាសយ៉ាងច្រើនសន្ធឹកសន្ធាប…
ធនាគារអភិវឌ្ឍន៍ថ្មី (NDB) របស់ប្លុកប្រទេសមានសេដ្ឋកិច្ចកំពុងអភិវឌ្ឍន៍ខ្លាំងហៅកាត់ថា BRICS ដែលមានសមាជិកសំខាន់ៗចំនួន៥ រួមមាន ប្រេស៊ីល រុស្ស៊ី ឥណ្ឌា មហាយក្សចិន និងអាហ្វ្រិកខាងត្បួង នៅដើមឆ្នាំ២០២៤ នេះ បានអនុម័តផ្ដល់កម្ចីចំនួន៥០០លានដុល្លារ ដល់ប្រទេសឥណ្ឌា សម្រាប់គម្រោងស្ថាបនាផ្លូវថ្នល់ដ៏ធំនៅក្នុងរដ្ឋហ្គូចារ៉ាត (Gujarat)។
យោងតាមការចុះផ្សាយថ្មីៗនេះរបស់សារព័ត៌មាន គ្រីបតូប៉ូលីទែន (Cryptopolitan)បានឱ្យដឹងថា កម្ចីចំនួន៥០០លានដុល្លារ នេះគឺសម្រាប់គម្រោងស្ថាបនា និងជួសជុលកែលម្អផ្លូវនៅតាមតំបន់ជនបទប្រវែងជិត១ម៉ឺន៣ពាន់៥រយគីឡូម៉ែត នៅក្នុងរដ្ឋហ្គូចារ៉ាត ប្រទេសឥណ្ឌា។
ក្រុមអ្នកជំនាញមើលឃើញថា ប្រាក់កម្ចីដ៏ច្រើននេះមិនត្រឹមតែឆ្លុះបញ្ចាំងពីសមត្ថភាពរបស់ “ធនាគារអភិវឌ្ឍន៍ថ្មី” NDB ប៉ុណ្ណោះទេ ប៉ុន្តែវាក៏បង្ហាញពីមហិច្ឆតារបស់ធនាគារនេះនៅលើឆាកអន្តរជាតិផងដែរ។
លោក វ៉្លាឌីមៀ កាស់បេកូវ (Vladimir Kazbekov) ប្រធានប្រតិបត្តិការនៃ“ធនាគារអភិវឌ្ឍន៍ថ្មី” NDB បានលើកឡើងពីការផ្ដល់កម្ចីនេះដោយសង្កត់ធ្ងន់ពីតួនាទីរបស់ធនាគារនេះក្នុងការលើកកម្ពស់ការតភ្ជាប់ជនបទជាមួយនឹងហេដ្ឋារចនាសម្ព័ន្ធដែលធន់នឹងអាកាសធាតុ។ លោកបានគូសបញ្ជាក់ថា ការផ្ដល់កម្ចីនេះមិនគ្រាន់តែជាប្រតិបត្តិការហិរញ្ញវត្ថុប៉ុណ្ណោះទេ ប៉ុន្តែវាក៏តំណាងឱ្យយុទ្ធសាស្រ្តកាន់តែស៊ីជម្រៅ ដើម្បីជំរុញការអភិវឌ្ឍប្រកបដោយនិរន្តរភាពនៅក្នុងបណ្ដាប្រទេសជាសមាជិករបស់ខ្លួនផងដែរ។
ប្លុកប្រទេស BRICS ដែលត្រូវបានគេមើលឃើញថា ជាគូប្រកួតប្រជែងដ៏ធំរបស់ក្រុមប្រទេសឧស្សាហកម្មឈានមុខគេទាំង៧ ហៅកាត់ថា G7 ដែលមានសមាជិកសំខាន់ៗដូចជាកាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស និងសហរដ្ឋអាម៉េរិក នឹងមានសមាជិកកើនឡើងដល់៤០ប្រទេសនៅក្នុងឆ្នាំ២០២៤ នេះ។ នេះបើយោងតាមការអះអាងរបស់ប្រធានាធិបតីរុស្ស៊ី លោក វ៉្លាឌីមៀ ពូទីន ក្នុងសន្និសីទកាសែតកាលពីពេលថ្មីៗនេះ៕
ដោយ: តែម សុខុម
None
