លោក Kim Sun Kyung អនុរដ្ឋមន្ត្រីក្រសួងការបរទេសបាននិយាយនៅក្នុងសេចក្តីថ្លែងការណ៍ដែលត្រូវបានចុះផ្សាយដោយទីភ្នាក់ងារសារព័ត៌មានរដ្ឋ KCNA ថា សមយុទ្ធនេះគឺជា «ការបង្កឱ្យមានការកើនឡើងនៃភាពតានតឹងដែលគ្មានទទួលខុសត្រូវ»។
បើតាមលោក គីម ស៊ុនខ្យុង បាននិយាយថា «អង្គការសហប្រជាជាតិ និងសហគមន៍អន្តរជាតិគួរតែទាមទារឱ្យប្រទេសទាំងពីរនេះបញ្ឈប់ជាបន្ទាន់ ចំពោះសកម្មភាពបង្កហេតុ និងសមយុទ្ធយោធារួមគ្នានេះ»។ លោកបានបន្ថែមថា «វាជារឿងគួរឱ្យសោកស្តាយណាស់ ដែលអង្គការសហប្រជាជាតិមានភាពស្ងៀមស្ងាត់លើសមយុទ្ធនេះ ដែលសបង្ហាញយ៉ាងច្បាស់នៃការរំលោភបំពាន និងការចង់ឈ្លានពាន»។
ប្រទេសកូរ៉េខាងជើងកាលពីថ្ងៃសៅរ៍បានស្តីបន្ទោសសហរដ្ឋអាមេរិកចំពោះអ្វីដែលខ្លួនបាននិយាយថាជាការដួលរលំនៃប្រព័ន្ធគ្រប់គ្រងអាវុធអន្តរជាតិ និងថាអាវុធនុយក្លេអ៊ែររបស់ទីក្រុងព្យុងយ៉ាងគឺជាការឆ្លើយតបដ៏ត្រឹមត្រូវមួយដើម្បីធានាតុល្យភាពនៃអំណាចនៅក្នុងតំបន់។
អត្ថបទគួរអាន
បើតាមមន្ត្រីនៃប្រទេសកូរ៉េខាងត្បូង និងអាមេរិកបាននិយាយកាលពីថ្ងៃសុក្រថា សហរដ្ឋអាមេរិក និងកូរ៉េខាងត្បូងនឹងធ្វើសមយុទ្ធយោធាទ្រង់ទ្រាយធំជាង ១០ ថ្ងៃនៅក្នុងខែមីនានេះ រួមទាំងសមយុទ្ធលើអាកាសផងដែរ។ ប្រទេសសម្ព័ន្ធមិត្តទាំងពីរក៏បានធ្វើសមយុទ្ធផ្លូវអាកាសរួមបញ្ចូលគ្នាជាមួយនឹងយន្តហោះទម្លាក់គ្រាប់បែករយៈចម្ងាយឆ្ងាយរបស់អាមេរិក និងយន្តហោះចម្បាំងកូរ៉េខាងត្បូងកាលពីថ្ងៃសុក្រ ហើយនិងបន្តធ្វើសមយុទ្ធជាច្រើនសប្តាហ៍ទៀតនៃកងទ័ពប្រតិបត្តិការពិសេសនៃប្រទេសទាំងពីរ។
ទោះជាបែបនេះក្តី សហរដ្ឋអាមេរិក និងកូរ៉េខាងត្បូងបាននិយាយថា សមយុទ្ធនេះគឺស្ថិតនៅក្នុងការហ្វឹហ្វើនសម្រាប់ការពារខ្លួនតែប៉ុណ្ណោះ និងចាំបាច់ដើម្បីទប់ទល់នឹងការគំរាមកំហែងកើនឡើងពីកម្មវិធីមីស៊ីលផ្លោង និងនុយក្លេអ៊ែររបស់កូរ៉េខាងជើង ដែលត្រូវបានហាមឃាត់ដោយដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ តែរដ្ឋផ្តាច់ការមួយនេះមិនព្រមស្តាប់និងអនុវត្តតាមម្តងណាឡើយ តែទាំងផ្កើនថែមទៀត។
