តើតម្លៃប្រេង ផ្សារភាគហ៊ុន មាស និងប្រាក់ដុល្លារអាម៉េរិក មានស្ថានភាពបែបណា ក្រោយជម្លោះរវាងអ៊ីរ៉ង់ និងអ៊ីស្រាអែល កាន់តែឡើងកម្ដៅ?

ប្រេងឆៅនៅលើទីផ្សារអន្តរជាតិ នៅថ្ងៃទី១៦ ខែមិថុនា បានហក់ឡើងថ្លៃ១,១២ដុល្លារ ឬ ១,៥% ឈានដល់៧៥,៣៥ដុល្លារអាម៉េរិក ក្នុងមួយបារ៉ែល ខណៈដែលប្រេងឆៅនៅទីផ្សារសហរដ្ឋអាម៉េរិក បានឡើងថ្លៃ១,១០ដុល្លារ ឬ១,៥% ឈានដល់៧៤,០៨ដុល្លារអាម៉េរិក ក្នុងមួយបារ៉ែល ដោយសារការព្រួយបារម្ភខ្លាចការផ្គត់ផ្គង់ប្រេងឆៅមានការអាក់រអួលនៅតំបន់មជ្ឈិមបូព៌ា។

ទន្ទឹមនេះ ហាងឆេងមាសបានហក់ឡើងស្រឺតៗរហូតដល់ប្រមាណ៣,៤៣០ដុល្លារអាម៉េរិក ក្នុងមួយអោន ឬប្រមាណ៤,១៨៣ដុល្លារអាម៉េរិក ក្នុងមួយតម្លឹង ក្រោយបណ្ដាវិនិយោគិនសម្រុកទិញចូលមាស ដែលជាទ្រព្យសកម្មដ៏មានសុវត្ថិភាព ស្របពេលដែលភូមិសាស្ត្រនយោបាយពិភពលោកស្ថិតក្នុងភាពមិនប្រាកដប្រជា។ ចំណែកឯប្រាក់ដុល្លារអាម៉េរិក ក៏បានហក់ឡើងថ្លៃផងដែរ ក្រោយតម្រូវការទិញចូលប្រាក់ដុល្លារអាម៉េរិក មានការកើនឡើង។

ទោះជាយ៉ាងណាទីផ្សារភាគហ៊ុននានារបស់សហរដ្ឋអាម៉េរិក បានដាំក្បាលចុះ ដោយផ្សារហ៊ុន Dow Jones បានធ្លាក់ចុះ១,៨% ផ្សារហ៊ុន S&P 500 និងផ្សារហ៊ុន Nasdaq បានធ្លាក់ចុះប្រមាណ០,៧% ដូចគ្នា។ ផ្ទុយទៅវិញ ទីផ្សារភាគហ៊ុនអាស៊ី នៅតែរក្សាបានស្ថិរភាព ដោយផ្សារហ៊ុន Nikkei របស់ជប៉ុនបានហក់ឡើង១,២% ហើយផ្សារហ៊ុន KOSPI របស់កូរ៉េខាងត្បូងបានហក់ឡើង១,៣%។

ជាការពិតណាស់ បណ្ដាវិនិយោគិននៅតែមានការប្រុងប្រយ័ត្នខ្ពស់ ស្របពេលជម្លោះប្រដាប់អាវុធរវាងអ៊ីស្រាអែល និងអ៊ីរ៉ង់ កំពុងបន្តកើតឡើង ខណៈដែលរង់ចាំមើលថា តើធនាគារកណ្ដាលអាម៉េរិកនឹងមានចំណាត់ការបន្ទាប់បែបណានៅពេលដ៏ខ្លីខាងមុខ៕

ដោយ: តែម សុខុម