ជាក់ស្ដែង នាយករដ្ឋមន្ត្រីអ៊ីស្រាអែល លោក បេនចាមីន នេតានយ៉ាហូ (Benjamin Netanyahu) បានបញ្ជាឱ្យយោធាអ៊ីស្រាអែល បង្កើនប្រតិបត្តិការវាយប្រហារទៅលើអ៊ីរ៉ង់ ក្នុងគោលដៅកម្ទេចចោលរបបដឹកនាំរបស់លោក Ayatollah Khamenei ដែលជាមេដឹកនាំកំពូលរបស់អ៊ីរ៉ង់ ក្រោយពីអ៊ីរ៉ង់ បានបាញ់កាំជ្រួចមីស៊ីលចំមន្ទីរពេទ្យដ៏ធំមួយរបស់អ៊ីស្រាអែល។
ទីផ្សារប្រេងអន្តរជាតិ កំពុងមានការប្រែប្រួលខ្លាំងពិបាកនឹងប៉ាន់ស្មាន ដោយកាលពីថ្ងៃព្រហស្បតិ៍ ទី១៩ ខែមិថុនា បានហក់ឡើងថ្លៃស្រឺតៗស្របពេលជម្លោះប្រដាប់អាវុធរវាងប្រទេសអ៊ីស្រាអែល និងអ៊ីរ៉ង់ កាន់តែកើនឡើងកម្ដៅគួរឱ្យព្រួយបារម្ភ ហើយបណ្ដាវិនិយោគិនកំពុងបន្តតាមដានយ៉ាងយកចិត្តទុកដាក់បំផុត ថាតើសហរដ្ឋអាម៉េរិក ដែលជាបងធំរបស់ពិភពលោកនឹងបង្កើនការលូកដៃក្នុងជម្លោះប្រដាប់អាវុធនេះដែរ ឬយ៉ាងណា។ ដ្បិត លោកដូណាល់ត្រាំ ប្រធានាធិបតី អាម៉េរិក បានព្រលយពាក្យ ធ្វើឱ្យគេមិនស្ងប់ចិត្ត ដែលថា «លោកអាចវាយ ឬក៏មិនវាយអ៊ីរ៉ង់»។ លោកត្រាំ ក៏បានប្រាប់ឱ្យអ៊ីរ៉ង់ ចុះចាញ់ដោយគ្មានលក្ខខណ្ឌ និងវិលរកតុចរចាឱ្យបានឆាប់ផងដែរ។
ភាពតានតឹងនេះ បានជំរុញឱ្យតម្លៃប្រេងឆៅនៅលើទីផ្សារអន្តរជាតិ បានហក់ឡើងថ្លៃ ២,១៥ដុល្លារ ឬ ២,៨% ឈានដល់ជិត ៧៩ដុល្លារ ក្នុងមួយធុងបារ៉ែល ដែលជាកម្រិតខ្ពស់បំផុតមិនធ្លាប់មានចាប់តាំងពីថ្ងៃទី២២ ខែមករា ដើមឆ្នាំ២០២៥ នេះ។
តាមរយៈសារបង្ហោះលើបណ្ដាញទំនងសង្គមថា រដ្ឋមន្ត្រីការពារជាតិអ៊ីស្រាអែល លោក Israel Katz បានអះអាងថា នាយករដ្ឋមន្ត្រីអ៊ីស្រាអែល លោក Benjamin Netanyahu បានបញ្ជាឱ្យយោធាអ៊ីស្រាអែល បង្កើនការវាយប្រហារទៅលើគោលដៅយុទ្ធសាស្ត្រនានានៅក្នុងប្រទេសអ៊ីរ៉ង់ រួមទាំងគោលដៅសំខាន់ៗរបស់រដ្ឋាភិបាលអ៊ីរ៉ង់ នៅក្នុងរដ្ឋធានីតេហេរ៉ង់ ផងដែរ។
លោក Israel Katz បានប្រកាសក្ដែងៗឥតលាក់លៀមថា គោលដៅនៃការបង្កើនប្រតិបត្តិការវាយប្រហារនេះ គឺដើម្បីកម្ទេចចោលរបបដឹកនាំរបស់លោក Ayatollah Khamenei” ដែលជាមេដឹកនាំកំពូលរបស់អ៊ីរ៉ង់៕
ដោយ: តែម សុខុម
