យ៉ាងណាមិញ ស្ថិតនៅក្នុងស្ថានភាពដែលកំពុងប្រឈមនឹងការផ្ទុះឡើងនូវករណីឆ្លងកាន់តែច្រើន និងកំពុងញាប់ដៃញាប់ជើងក្នុងការខិតខំប្រឹងប្រែងប្រយុទ្ធប្រឆាំងនឹងការកើនឡើងនៃករណីឆ្លងមេរោគនេះ អាជ្ញាធរទីក្រុងហុងកុង កំពុងបង្កើនការផ្តល់កន្លែងធ្វើចត្តាឡីស័កជាសហគមន៍ និងកន្លែងព្យាបាលនៅតាមកន្លែងជាច្រើន រហូតដល់ចំណតកប៉ាល់ទេសចរណ៍ផងដែរ។ នេះបើយោងតាមការចុះផ្សាយដោយសារទីភ្នាក់ងារសារព័ត៌មាន រ៉យទ័រ។
ជាមួយនឹងការរាយការណ៍អំពីករណីកូវីដ១៩ ថ្មីចំនួនជាង ៦ពាន់ករណី កាលពីថ្ងៃសៅរ៍សប្ដាហ៍មុននេះ ទីក្រុងហុងកុង បានបញ្ជាក់នៅក្នុងសេចក្តីថ្លែងការណ៍មួយថា ចំណតនាវាកម្សាន្ត Kai Tak នឹងត្រូវបានប្រែក្លាយទៅជាកន្លែងផ្តល់សេវាថែទាំកូវីដ១៩ ដែលមានគ្រែចំនួន ១ពាន់គ្រែ ដើម្បីជួយកាត់បន្ថយការកកស្ទះនៅតាមមន្ទីរពេទ្យសាធារណៈនានា ដែលកំពុងជន់ជោរដោយអ្នកជំងឺ។
មេដឹកនាំហុងកុងលោកស្រី ការី ឡាំ ដែលបានចូលរួមក្នុងពិធីបើកការដ្ឋានសាងសង់កន្លែងផ្ដល់សេវាថែទាំកូវីដដែលមាន ១ម៉ឺនបន្ទប់ នៅជិតរមណីយដ្ឋាន Disneyland បាននិយាយថា លោកស្រីសង្ឃឹមថាគំនិតផ្តួចផ្តើមនេះនឹង ពង្រឹងយ៉ាងខ្លាំង ដល់សមត្ថភាពប្រឆាំងនឹងការរីករាលដាលនៃជំងឺឆ្លងនៃមជ្ឈមណ្ឌលហិរញ្ញវត្ថុពិភពលោកមួយនេះ។
អត្ថបទគួរអាន
អ្នកជំនាញ និងអ្នករិះគន់មួយចំនួននិយាយថា គោលនយោបាយគ្មានកូវីដ១៩របស់ទីក្រុងហុងកុង ដែលបានដើរតាមគំរូចិនដីគោកនោះ បានបង្កជាបញ្ហានាពេលបច្ចុប្បន្ន និងមិនមាននិរន្តរភាពនោះឡើយ។
គួរជម្រាបថា ប្រទេសចិនបានបញ្ជូនបុគ្គលិកពេទ្យ និងឧបករណ៍មួយចំនួនរួមទាំងឧបករណ៍ធ្វើតេស្តចល័តទៅកាន់ទីក្រុងហុងកុងផងដែរ ដើម្បីជួយរៀបចំការធ្វើតេស្តទ្រង់ទ្រយធំនៅហុងកុង ខណៈដែលអាជ្ញាធរហុងកុងបានឱ្យដឹងថា ការផ្ទុះឡើងនេះអាចនឹងចំណាយពេលរហូតដល់បីខែ ដើម្បីគ្រប់គ្រងស្ថានភាពឲ្យវិលមកប្រសើរឡើងវិញបាន។
ស្របពេលនឹងផ្ទុះឡើងនូវករណីឆ្លងកើនឡើង ការបោះឆ្នោតជ្រើសរើសមេដឹកនាំថ្មី ដែលគ្រោងនឹងធ្វើនៅខែមីនាខាងមុខនេះនឹងត្រូវពន្យារពេលដល់ខែឧសភា ដើម្បីរៀបចំការធ្វើតេស្តកូវីដនៅទូទាំងក្រុង ហុងកុងលើប្រជាពលរដ្ឋគ្រប់រូប៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
