![មេដឹកនាំថៃ](https://cdn.cambonomist.com/media/images/th_khlnmychngchtkpr_6HqeViX.2e16d0ba.fill-960x540.jpg)
ប្រទេសថៃ ដែលមានសេដ្ឋកិច្ចធំបំផុតទី២ នៅក្នុងតំបន់អាស៊ាន បន្ទាប់ពីឥណ្ឌូនេស៊ី បានបង្កឱ្យផ្ទុះការចាប់អារម្មណ៍យ៉ាងខ្លាំងជុំវិញភូមិសាស្ត្រនយោបាយ នៅពេលប្រទេសនេះបានដាក់ពាក្យស្នើសុំចូលជាសមាជិកនៃប្លុកប្រទេស BRICS ផង និងដាក់ពាក្យស្នើសុំចូលជាសមាជិកនៃអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច ដែលគ្រប់គ្រងដោយលោកខាងលិចផង។
រដ្ឋមន្ត្រីការបរទេសថៃ លោក ម៉ារីស សង្គាមពង្សា (Maris Sangiampongsa) កាលពីពេលថ្មីៗនេះបានធ្វើទស្សនកិច្ចទៅកាន់ប្រទេសចិន និងឥណ្ឌា ដែលសុទ្ធតែជាសមាជិកស្ថាបនិកនៃប្លុកប្រទេស BRICS នៅមុនការដាក់ឱ្យដំណើរការការិយាល័យវិនិយោគមួយនៅប្រទេសអារ៉ាប៊ីសាអូឌីត។ ក្រុមមន្ត្រីការទូតថៃ បានរាយការណ៍ពីការឆ្លើយតបជាវិជ្ជមានពីគ្រប់មាជិកនៃប្លុកប្រទេស BRICS ទាក់ទងនឹងការដាក់ពាក្យស្នើសុំរបស់ប្រទេសថៃ។
ទោះជាយ៉ាងណា មជ្ឈដ្ឋានជាច្រើននៅក្នុងប្រទេសថៃ មានមន្ទិលចំពោះអត្ថប្រយោជន៍ផ្នែកសេដ្ឋកិច្ចដែលថៃ ទទួលបានពីការចូលជាសមាជិកនៃប្លុកប្រទេស BRICS ដោយអ្នកទាំងនោះមើលឃើញថា ការចូលជាសមាជិក BRICS គ្រាន់តែជានិមិត្តរូប ឬឱ្យល្អតែមើលប៉ុណ្ណោះ។ សូមបញ្ជាក់ថា ទីផ្សារនាំចេញធំបំផុតរបស់ថៃ ក្រៅពីប្រទេសចិន គឺបណ្ដាប្រទេសជាសមាជិកនៃអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច។
ប្រទេសថៃ បានព្យាយាមរក្សាអព្យាក្រឹតភាពក្នុងទំនាក់ទំនងដ៏តានតឹងរវាងសហរដ្ឋអាម៉េរិក និងមហាយក្សចិន ដោយថៃចូលរួមក្នុងសមយុទ្ធយោធារបស់សហរដ្ឋអាម៉េរិកផង និងព្យាយាមបង្កើនទំនាក់ទំនងសេដ្ឋកិច្ចកាន់តែជិតស្និទ្ធជាមួយមហាយក្សចិនផង។
ក្រុមអ្នកបង្កើតគោលនយោបាយថៃ មើលឃើញថា ការដាក់ពាក្យសុំចូលជាសមាជិកនៃអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ចជាឱកាសដ៏ល្អមួយសម្រាប់កំណែទម្រង់សេដ្ឋកិច្ចថៃ ខណៈការចូលជាសមាជិកនៃប្លុកប្រទេស BRICS ផ្ដល់ផលប្រយោជន៍រយៈពេលវែង។
គួរបញ្ជាក់ថា ប្រទេសជាសមាជិកនៃអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច រួមមានបែលហ្ស៊ិក អូទ្រីស កាណាដា ដាណឺម៉ាក បារាំង អាល្លឺម៉ង់ ក្រិក អ៊ីស្លង់ អៀរឡង់ អ៊ីតាលី លុចសំបួ ហូឡង់ ន័រវែស ព័រទុយហ្គាល់ អេស្ប៉ាញ ស៊ុយអែត ស្វីស តួកគី អង់គ្លេស និងសហរដ្ឋអាម៉េរិក ជាដើម៕
ដោយ: តែម សុខុម