ក្រុមហ៊ុនបច្ចេកវិទ្យាយក្សរបស់អាម៉េរិក Open AI ដែលបានបង្កើតឡើងនៅខែធ្នូ ឆ្នាំ២០១៥ កំពុងស្វះស្វែងរកកញ្ចប់មូលនិធិបង្កើនតម្លៃវិនិយោគរបស់ក្រុមហ៊ុនខ្លួនឱ្យឈានដល់៣០០ពាន់លានដុល្លារអាម៉េរិក។ ក្រោយការប្រកាសបែបនេះ ក្រុមហ៊ុន SoftBank Group បានប្រកាសពីបំណងចង់វិនិយោគ៣០ពាន់លានដុល្លារ ដែលធ្វើឱ្យក្រុមហ៊ុននេះក្លាយជាអ្នកវិនិយោគធំជាងគេនៅក្នុង Open AI ស្របពេលដែលគេដឹងថា Microsoft បានដាក់ទុនជិត១៤ពាន់លានដុល្លារ។
ក្រុមហ៊ុន SoftBank Group បានអះអាងថា កាលពីដំបូងខ្លួនបានដាក់ទុនត្រឹមតែ១០ពាន់លានដុល្លារប៉ុណ្ណោះ ប៉ុន្តែនៅចុងឆ្នាំក្រុមហ៊ុននឹងបង្កើតកញ្ចប់វិនិយោគបន្ថែមរហូតដល់៣០ពាន់លានដុល្លារ។ កាលពីខែតុលា ឆ្នាំ២០២៤ កន្លងទៅ តម្លៃវិនិយោគរបស់ក្រុមហ៊ុន OpenAI មានត្រឹមប្រមាណ១៥៧ពាន់លានដុល្លារប៉ុណ្ណោះ ប៉ុន្តែឥឡូវនេះ តម្លៃសាជីវកម្មរបស់ក្រុមហ៊ុននេះមានទំហំធំជាងក្រុមហ៊ុន Toyota Motor របស់ជប៉ុន ដែលមានទំហំអាជីវកម្មត្រឹម២៨០ពាន់លានដុល្លារ។
ការរីកចម្រើនយ៉ាងឆាប់រហ័សរបស់ក្រុមហ៊ុនបច្ចេកវិទ្យាអាម៉េរិកមួយនេះ បានកើតឡើងបន្ទាប់ពីដាក់ឲ្យដំណឹងការកម្មវិធី Chat GPT ក្នុងឆ្នាំ២០២២។ OpenAI បាននិយាយនៅក្នុងសេចក្តីថ្លែងការណ៍មួយថា ក្រុមហ៊ុនពិតជារំភើបក្នុងការធ្វើការក្នុងភាពជាដៃគូជាមួយក្រុមហ៊ុន SoftBank Group និងក្រុមហ៊ុនមួយចំនួនទៀត។
គួររំលឹកថា ពីខែមករា ក្រុមហ៊ុន OpenAI និង SoftBank បានប្រកាសរួមគ្នាជាមួយប្រធានាធិបតីអាម៉េរិក លោក ដូណាល់ ត្រាំ ពីការវិនិយោគរហូតដល់៥00ពាន់លានដុល្លារ ក្នុងរយៈពេល៤ឆ្នាំ នៅក្នុងគម្រោង Stargate ដើម្បីអភិវឌ្ឍហេដ្ឋារចនាសម្ព័ន្ធ AI ដូចជាមជ្ឈមណ្ឌលទិន្នន័យនៅសហរដ្ឋអាម៉េរិក៕
ដោយៈ សរ សុជាតិ
