រដ្ឋាភិបាលវៀតណាមធ្លាប់មានគម្រោងបញ្ជូនពលករទៅធ្វើការនៅបរទេសប្រមាណ ៥០ម៉ឺននាក់បន្ថែមទៀតអំឡុងពេល៥ឆ្នាំខាងមុខ គឺគិតចាប់ពីឆ្នាំ២០២០ ដល់ឆ្នាំ២០២៥ ប៉ុន្តែចំនួននេះត្រូវបានអ្នកជំនាញវាយតម្លៃថា ច្រើនជ្រុលពេកក្នុងបរិបទនៃជំងឺកូវីដ-១៩នេះ។
ជាក់ស្តែង នៅបីខែដំបូងឆ្នាំ២០២១នេះ មានពលករវៀតណាមប្រមាណ១ម៉ឺននាក់ប៉ុណ្ណោះត្រូវបានបញ្ជូនទៅធ្វើការនៅកោះតៃវ៉ាន់ ខណៈពលករ១ម៉ឺន៨ពាន់នាក់ផ្សេងទៀតបានចេញទៅធ្វើការនៅប្រទេសជប៉ុន។ នេះបើយោងតាមទិន្នន័យពីសមាគមអ្នកផ្គត់ផ្គង់កម្លាំងពលកម្មវៀតណាម។
អត្ថបទទាក់ទង
វៀតណាម ជាប្រទេសអ្នកផ្គត់ផ្គង់កម្លាំងពលកម្មឲ្យប្រទេសជប៉ុនធំជាងគេមួយ ជារៀងរាល់ឆ្នាំ។ បច្ចុប្បន្នមានពលករចំណាកស្រុកវៀតណាម ប្រមាណ២០ម៉ឺននាក់នាក់កំពុងរស់នៅ និងធ្វើការក្នុងប្រទេសជប៉ុន ដែលភាគច្រើនពួកគេមានតួនាទីជាអ្នកបច្ចេកទេស នៅក្នុងវិស័យជាច្រើនដូចជា កសិកម្ម សំណង់ និង ឧស្សាហកម្ម។
យ៉ាងណាមិញ ប្រទេសជប៉ុនបានបិទឈប់ទទួលយកជនបរទេសចូលមកក្នុងប្រទេសរបស់ខ្លួនចាប់តាំងពីពាក់កណ្តាលខែមករា មកម្ល៉េះ ដោយសារតែបញ្ហារីករាលដាលខ្លាំងនៃជំងឺកូវីដ-១៩រលកឆ្លងថ្មី។
គួរជម្រាបថា ពលករចំណាកស្រុកវៀតណាមដែលធ្វើការនៅប្រទេសជប៉ុនអាចទទួលចំណូលបានចម្លោះពី ១ពាន់២រយដុល្លារ ទៅ១ពាន់៤រយដុល្លារអាមេរិកក្នុង១ខែ ខណៈដែរនៅតៃវ៉ាន់ពលករវៀតណាមទទួលបានចន្លោះពី៧០០ដុល្លារទៅ ៨០០ដុល្លារអាមេរិកក្នុង១ខែ។ នេះបើតាមប្រភពពីសារព័ត៌មាន Nikkei ដដែល។
មែនទែនទៅ វិបត្តិកូវីដ១៩ មិនមែនជាមូលហេតុតែមួយដែលរាំងស្ទះការបញ្ជូនពលករវៀតណាមទៅធ្វើការនៅជប៉ុននោះទេ។ កម្មវិធីទិដ្ឋាការថ្មីរបស់ជប៉ុនសម្រាប់ពលករបរទេស ក៏ជាមូលហេតុមួយដែលជំរុញឲ្យការនាំពលករវៀតណាមទៅជប៉ុនមានការធ្លាក់ចុះផងដែរ ជាក់ស្តែង វៀតណាមពិបាកបំពេញតាមតម្រូវការក្នុងកម្មវិធីទិដ្ឋាការថ្មីនេះ ដោយខ្លួនមានភាពយឺតយ៉ាវក្នុងការធ្វើតេស្តជំនាញ និងភាសាជប៉ុនដល់កម្មករ។
សូមបញ្ជាក់ថា ស្របពេលដែលចំនួនពលករចំណាកស្រុករបស់វៀតណាមបន្តថយចុះ សេដ្ឋកិច្ចរបស់ប្រទេសនេះក៏កំពុងរងគ្រោះខ្លះៗដែរ បូកផ្សំនឹងរលកឆ្លងកូវីដ-១៩កំពុងបោកបក់ថែមទៀត។ បើយោងតាមប្រព័ន្ធផ្សព្វផ្សាយក្នុងស្រុកវៀតណាមបានចុះផ្សាយថា មានជនជាតិវៀតណាមប្រមាណ ៦០ ម៉ឺននាក់កំពុងធ្វើការ និងរស់នៅក្រៅប្រទេស ហើយពួកគេបានផ្ញើប្រាក់ចូលមកក្នុងស្រុកវិញសរុបជាមធ្យមប្រមាណ ៤ពាន់លានដុល្លារជារឿងរាល់ឆ្នាំ ដែលចំនួននេះត្រូវបានគេជឿថា អាចនឹងថមថយចុះ ព្រោះបច្ចុប្បន្នចំនួនកម្មករចំណាកស្រុកកំពុងតែថយចុះដូចគ្នា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
