សមាគមអ្នកនាំចេញអង្ករថៃ នៅដើមឆ្នាំ២០២៥នេះ បានព្យាករទុកថា ការនាំចេញអង្កររបស់ប្រទេសថៃ នៅឆ្នាំ២០២៥ នឹងធ្លាក់ចុះ ២៥% បើធៀបនឹងឆ្នាំ២០២៤ ដោយសារតែរងសម្ពាធទីផ្សារនាំចេញពីប្រទេសឥណ្ឌា ដែលជាប្រទេសនាំចេញអង្ករដ៏ធំជាងគេបំផុតលើពិភពលោក។
ថៃ ដែលលជាអ្នកនាំចេញអង្ករធំជាងគេទី២ក្នុងពិភពលោក រំពឹងថា ការនាំចេញអង្កររបស់ខ្លួននៅឆ្នាំនេះ នឹងសម្រេចបានក្នុងបរិមាណ ៧,៥លានតោនប៉ុណ្ណោះ ពោលគឺតិចជាងឆ្នាំ២០២៤ ២,៥លានតោន។ ក្រៅតែពីកត្តាប្រកួតប្រជែងទីផ្សារជាមួយអង្ករឥណ្ឌា បញ្ហាតម្រូវការអង្ករធ្លាក់ចុះនៅទីផ្សារឥណ្ឌូនេស៊ីក៏ជាកត្តារួមផ្សំ ដែលធ្វើឲ្យការនាំចេញអង្កររបស់ថៃដាំក្បាលចុះផងដែរ។
ប្រទេសឥណ្ឌា ដែលបានផ្អាកការនាំចេញអង្ករសរបស់ខ្លួនតាំងពីខែកញ្ញានោះ បានចាប់ផ្ដើមបើកការនាំចេញរបស់ខ្លួនឡើងវិញហើយនៅឆ្នាំ២០២៥នេះ ដោយរំពឹងថា ប្រទេសនាំចេញអង្ករដ៏ធំបំផុតមួយនេះ នឹងនាំចេញអង្កររហូតដល់ ២២លានតោន ពោលគឺលើសពីឆ្នាំ ២០២៤ ប្រហែល ៥លានតោន។ នេះបើតាមការព្យាកររបស់សមាគមស្បៀងអាហារវៀតណាម។
យ៉ាងណាមិញ ប្រទេសវៀតណាម ដែលជាអ្នកនាំចេញអង្ករដ៏ធំបំផុតទី៣ក្នុងពិភពលោកវិញ ក៏បានបង្ហាញពីក្ដីបារម្ភខ្លាំងផងដែរ ជុំវិញទីផ្សារអង្កររបស់ខ្លួន ដ្បិតវៀតណាមជឿថា នៅឆ្នាំនេះ ទីផ្សារនាំចេញនឹងមានភាពតានតឹងខ្លាំងជាងឆ្នាំមុន។ កាលពីឆ្នាំ ២០២៤ វៀតណាមសម្រេចបានការនាំចេញអង្ករប្រមាណ ៩លានតោន កើនឡើង១១% ដោយក្នុងនោះ ទីផ្សារធំរបស់វៀតណាម គឺហ្វីលីពីន ឥណ្ឌូនេស៊ី និងម៉ាឡេស៊ី។
ដោយសារតែសម្ពាធបរិមាណនាំចេញអង្កររបស់ឥណ្ឌាមានច្រើនលើទីផ្សារ បានធ្វើឲ្យវៀតណាមកំពុងជួបប្រឈមនឹងបញ្ហាទីផ្សារស្រូវអង្ករដូចគ្នា តួយ៉ាង តម្លៃអង្ករស បាក់៥% របស់វៀតណាម បានធ្លាក់ថ្លៃដល់កម្រិតទាបបំផុតក្នុងរយៈពេល ៤ឆ្នាំមកនេះ ពោលគឺ មានតម្លៃមកនៅត្រឹម ៤៣៤ដុល្លារក្នុងមួយតោន។ នេះបើតាមការចុះផ្សាយរបស់សារព័ត៌មាន VN Express នៅថ្ងៃទី១២ ខែមករា ឆ្នាំ២០២៥។
អត្ថបទគួរអាន
កាលពីខែធ្នូ ឆ្នាំ២០២៤ រដ្ឋមន្ត្រីសម្របសម្រួលកិច្ចការស្បៀងអាហាររបស់ឥណ្ឌូនេស៊ី លោក Zulkifli Hansa បានចេញមុខប្រកាសថា ប្រទេសបងធំសេដ្ឋកិច្ចនៅអាស៊ានមួយនេះ នឹងឈប់នាំចូលផលិផលកសិកម្មសំខាន់ៗមួយចំនួន ក្នុងនោះ រួមទាំងអង្ករផងដែរ ដែលវាជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលក្នុងការជំរុញភាពគ្រប់គ្រាន់នៃស្បៀងអាហារ ដោយផ្ដោតលើការបង្កើនផលិតកម្មក្នុងស្រុក។ កាលពីឆ្នាំ២០២៤ ឥណ្ឌូនេស៊ីនាំចូលអង្ករសរុបប្រមាណ ៣លាន៧សែនតោន។
បញ្ហាប្រែប្រួលនៃទីផ្សារពិភពលោកអង្ករអន្តរជាតិនេះ ចង់ ឬមិនចង់ វាក៏បានជះឥទ្ធិពលមកលើប្រទេសកម្ពុជា ដែលជាអ្នកផលិតអង្ករនាំចេញដូចគ្នាដែរ។ ជាក់ស្ដែង តម្លៃស្រូវ ប្រភេទ OM របស់ប្រជាកសិកម្មនាពេលថ្មីៗនេះ បានធ្លាក់ចុះគួរឲ្យកត់សម្គាល់។ ធ្លាក់ចុះ គឺដោយសារតែ បរិមាណផលិតមានច្រើន ហើយទីផ្សារស្រូវប្រភេទអង្ករសរបស់កម្ពុជា មានការពឹងផ្អែកខ្លាំងទៅលើប្រទេសវៀតណាម ដែលជាអ្នកបញ្ជាទិញ ចំពេលដែលវៀតណាមបច្ចុប្បន្ន ក៏កំពុងជួបបញ្ហាទីផ្សារដូចគ្នាដែរ។ ទោះយ៉ាងណា សម្រាប់ប្រភេទអង្ករប្រណីត ឬអង្ករក្រអូប នៅតែរក្សាបានតម្លៃល្អដដែល។ នេះបើតាមការបញ្ជាក់របស់រដ្ឋមន្ត្រីក្រសួងកសិកម្មកម្ពុជា ឯកឧត្តម ឌិត ទីណា នៅក្នុងវីដេអូមួយ ដែលត្រូវបានបង្ហោះផ្សព្វផ្សាយដោយហ្វេសប៊ុកផ្លូវការរបស់នាយករដ្ឋមន្ត្រីកម្ពុជា កាលពីថ្ងៃទី១៣ ខែមករា ឆ្នាំ២០២៥។
រដ្ឋមន្ត្រីក្រសួងកសិកម្ម ជំរុញលើកទឹកចិត្តឲ្យកសិករ ប្ដូរការដាំដុះពូជស្រូវមកជាប្រភេទស្រូរអង្ករក្រអូបវិញ ព្រមជាមួយនឹងការចងក្រងជាសហគមន៍ តួយ៉ាង សហគមន៍កសិកម្មទំនើប ដែលមានការជួយសម្របសម្រួលទាំងការផលិត ដើមទុន និងទីផ្សារ។ លើសពីនេះ ក្រសួងកសិកម្ម ក៏បាននិងកំពុងជួយសម្របសម្រួលជាមួយភាគីពាក់ព័ន្ធ ដើម្បីជួយកសិករទាក់ទងនឹងបញ្ហាស្រូវកំពុងធ្លាក់ថ្លៃនេះផងដែរ៕
