លោកចូ បៃឌិន បានលើកឡើងនៅក្នុងកិច្ចប្រជុំកំពូលអាស៊ាន-អាមេរិកលើកទី៩ តាមប្រព័ន្ធអនឡាញកាលពីថ្ងៃអង្គារបាននិយាយក្នុងសុន្ទរកថាបើករបស់លោកថា៖ ភាពជាដៃគូរបស់អាមេរិក និងអាស៊ាន មានសារៈសំខាន់ណាស់ ក្នុងការរក្សាសេរីភាពនៃតំបន់ឥណ្ឌូប៉ាស៊ីហ្វិក និងការបើកចំហ ដែលជាមូលដ្ឋានគ្រឹះនៃសន្តិសុខ និងវិបុលភាពរួមគ្នា អស់រយៈពេលជាច្រើនទសវត្សរ៍មកហើយ។
លោកបន្តថា៖ សហរដ្ឋអាមេរិកគាំទ្រយ៉ាងមុតមាំ ចំពោះទស្សនវិស័យរវាងអាស៊ានជាមួយនិងឥណ្ឌូប៉ាស៊ីហ្វិក ព្រមទាំងសណ្តាប់ធ្នាប់ក្នុងតំបន់ ដែលផ្អែកលើច្បាប់អន្តរជាតិ។
ដោយឡែក សារព័ត៌មានរ៉យទ័រ បានចុះផ្សាយដោយបានដកស្រង់របាយការណ៍របស់សេតវិមានអាមេរិក ក្រោយកិច្ចប្រជុំថា ក្រុងវ៉ាស៊ីនតោននឹងប្រកាសពីគម្រោងផ្តល់ថវិកាប្រមាណ ១០២លានដុល្លារអាមេរិក ដើម្បីពង្រីកភាពជាដៃគូយុទ្ធសាស្ត្រជាមួយអាស៊ាន។
អត្ថបទទាក់ទង
ក្នុងនោះថវិកាប្រមាណ ៤០លានដុល្លារនឹងផ្តល់ទៅឲ្យគំនិតផ្តួចផ្តើមថ្មីមួយ ដើម្បីជួយដោះស្រាយបញ្ហារាតត្បាតជំងឺកូវីដ-១៩ និងពង្រឹងសមត្ថភាពរបស់អាស៊ានក្នុងការទប់ស្កាត់ ស្វែងរក និងឆ្លើយតបទៅនឹងការរីករាលដាលនៃជំងឺឆ្លងនេះ នាពេលអនាគត។
ក្រៅពីនោះមាន ថវិកាជិត ២១លានដុល្លារ ដែលនឹងផ្តល់ឲ្យសម្រាប់ជួយដោះស្រាយវិបត្តិប្រែប្រួលអាកាសធាតុ។ ២០លានដុល្លារទៀត គាំទ្រកិច្ចសហប្រតិបត្តិការលើវិស័យពាណិជ្ជកម្ម និងការច្នៃប្រឌិត។ ១៧លានដុល្លារផ្សេងទៀតត្រូវបានផ្តល់សម្រាប់គម្រោងលើវិស័យអប់រំ និង ៤ លានដុល្លារដើម្បីលើកកម្ពស់សមភាពយេនឌ័រ។
គួរជម្រាបថា នេះជាលើកទី១ហើយបន្ទាប់ពីសហរដ្ឋអាមេរិកអស់ពេល៤ឆ្នាំមកនេះ មិនធ្លាប់បានចូលរួមកិច្ចប្រជុំកំពូលអាស៊ាន ក្រោមវត្តមានប្រធានាធិបតីបែបនេះទេ រាប់ចាប់តាំងពីការចូលរួមលើកចុងក្រោយបំផុតរបស់អតីតប្រធានាធិបតីដូណាល់ ត្រាំ ដែលហ្វីលីពីនធ្វើជាម្ចាស់ផ្ទះរៀបចំកិច្ចប្រជុំ កាលពីឆ្នាំ២០១៧។
ការចូលរួមពីប្រធានាធិបតីអាមេរិក នៅឆ្នាំនេះត្រូវបានក្រុមអ្នកវិភាគអះអាងថា ជាការឆ្លុះ បញ្ចាំងពីកិច្ចខិតខំប្រឹងប្រែងថ្មី របស់រដ្ឋបាលលោកបៃឌិន ដើម្បីព្យាយាមភ្ជាប់ទំនាក់ទំនង ជាមួយប្រទេសមិនមែនសម្ព័ន្ធមិត្ត ព្រមទាំងស្វែងរកកិច្ចសហការជាមួយប្រទេសសម្ព័ន្ធមិត្តស្រាប់ ដើម្បីទប់ទល់ និងប្រជែងជាមួយឥទ្ធិពលរបស់ចិននៅក្នុងតំបន់។
គួរបញ្ជាក់ថា នៅថ្ងៃពុធសប្តាហ៍នេះ លោកបៃឌិន ក៏បានចូលរួមក្នុងកិច្ចប្រជុំកំពូល «អាស៊ីបូព៌ា ទូលំទូលាយ» ដែលបាននាំយកអាស៊ាន និងប្រទេសដទៃទៀតនៅក្នុងតំបន់ឥណ្ឌូប៉ាស៊ីហ្វិក មកជួបពិភាក្សាគ្នាផងដែរ។ នេះបើតាមមន្ត្រីជាន់ខ្ពស់សេតវិមាន ប្រាប់សារព័ត៌មានរ៉យទ័រ៕
