តើកម្ពុជាសម្រេចបានលទ្ធផលអ្វីខ្លះពីការចូលរួមនៅលើឆាកអន្តរជាតិនៅ៦ខែកន្លងមកនេះ?

ឯកឧត្តម ហ្សង់ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកកិច្ចការការបរទេស និងសហប្រតិបត្តិការអន្តរជាតិ កត់សម្គាល់ឃើញថា នៅក្នុងរយៈពេល៦ខែក្រោមការដឹកនាំរបស់សម្តេចធិបតី ហ៊ុន ម៉ាណែត ទទួលបានលទ្ធផលជោគជ័យពេញលេញក្នុងការសម្របខ្លួនទៅក្នុងឆាកអន្តរជាតិ តាមរយៈការទូតមួយសកម្មឡើងជាលំដាប់ តាមរយៈនយោបាយមួយដែលពង្រីកមិត្តភាពថ្មី និងពង្រឹងមិត្តភាពចាស់ និងតាមរយៈការអនុវត្តការទូតសេដ្ឋកិច្ចមួយដើម្បីស្វែងរកប្រយោជន៍មកឱ្យប្រជាជាតិកម្ពុជា។

ជាក់ស្ដែងដំណើរទស្សនកិច្ចចុងក្រោយនៅប្រទេសបារាំង និងនៅប្រទេសថៃ នឹងអាចក្លាយជានយោបាយការបរទេសរបស់កម្ពុជា នៅលើឆាកតំបន់ និងលើឆាកអន្តរជាតិ ដែលអាចទាញយកផ្លែផ្កាសេដ្ឋកិច្ច និងការពង្រឹងទំនាក់ទំនងទ្វេភាគីផងដែរ។

​បើតាមការគូសបញ្ជាក់របស់ថ្នាក់ដឹកនាំជាន់ខ្ពស់រូបនេះ ក្នុងដំណើរដឹកនាំរាជរដ្ឋាភិបាលរយៈពេល៦ខែ គិតពីខែសីហា ឆ្នាំ២០២៣ ដល់ខែកុម្ភៈ ឆ្នាំ២០២៤ គឺសម្ដេចធិបតី ហ៊ុន ម៉ាណែត បានអនុវត្តវិធីការទូតសកម្ម ដោយយកសេដ្ឋកិច្ចជាស្នូល និងការនាំយកកម្ពុជា ដែលស្រលាញ់សន្តិភាព ប្រឆាំងនឹងសង្រ្គាមទៅកាន់ឆាកអន្តរជាតិ៕

អត្ថបទ៖ បូ ដូឡា​