របាយការណ៍ថ្មីមួយ ដែលចេញផ្សាយដោយក្រុមអ្នកវិទ្យាសាស្ត្រអាកាសធាតុបានព្យាករពីវិបត្តិមហន្តរាយធម្មជាតិដ៏រន្ធត់ ដែលបណ្តាលមកពីបាតុភូត អែលនីញ៉ូ ដោយលាតសន្ធឹងផលប៉ះពាល់ចាប់ពីទ្វីបអាហ្វ្រិករហូតដល់បណ្តាប្រទេសក្នុងតំបន់អាស៊ីអាគ្នេយ៍។ យោងតាមការប៉ាន់ប្រមាណផ្លូវការ មនុស្សជាង៤៥ម៉ឺននាក់ត្រូវបានព្យាករថា នឹងត្រូវបាត់បង់ជីវិតដោយសារតែសីតុណ្ហភាពក្តៅខ្លាំងហួសប្រមាណ ដែលបង្កឡើងដោយបាតុភូត អែលនីញ៉ូ ក្នុងចន្លោះពេល៦ខែខាងមុខ។ តួលេខដ៏រន្ធត់នេះ គឺជាចំនួនអ្នកស្លាប់បន្ថែមពីលើផលប៉ះពាល់ នៃវិបត្តិអាកាសធាតុ ដែលកំពុងតែកើតមានស្រាប់នៅលើភពផែនដី។
រលកកម្ដៅ និងធាតុអាកាសកាចសាហាវនេះនឹងវាយប្រហារទូទាំងសកលលោកចាប់ពីឥណ្ឌូនេស៊ី រហូតដល់ឥណ្ឌា និងពីនីហ្សេរីយ៉ា រហូតដល់សហរដ្ឋអាម៉េរិក ខណៈចំនួនអ្នកបាត់បង់ជីវិតជាច្រើនទៀត នឹងកើនឡើងដោយសារគ្រោះរាំងស្ងួតដ៏រ៉ាំរ៉ៃ ភ្លើងឆេះព្រៃ និងគ្រោះទឹកជំនន់ភ្លាមៗ។
តាមការវាយតម្លៃឥទ្ធិពលដ៏អាក្រក់នៃបាតុភូតនេះនឹងសម្លាប់ប្រជាជនច្រើនជាងគេក្នុងប្រទេសចំនួន១០ រួមមាន នីហ្សេរីយ៉ា ឥណ្ឌូនេស៊ី ស៊ូដង់ ឥណ្ឌា ប្រេស៊ីល សាធារណរដ្ឋប្រជាធិបតេយ្យកុងហ្គោ នីហ្សេ ឆាត ហ្វីលីពីន និងវៀតណាម។ ក្នុងនោះនីហ្សេរីយ៉ា ប្រឈមនឹងការបាត់បង់ជីវិតប្រជាជនជាង៣០,០០០នាក់, ឥណ្ឌូនេស៊ីជិត២០,០០០នាក់, ហ្វីលីពីនជាង៦,៥០០នាក់ និងវៀតណាមជាង៥,៥០០នាក់។
តាមការព្រមានជាមុន រលកកម្ដៅកម្រិតធ្ងន់ធ្ងរនេះបានចាប់ផ្តើមគំរាមកំហែងដល់ជីវិតមនុស្សចាប់ពីខែកញ្ញា ឆ្នាំ២០២៦ ដល់ខែកុម្ភៈ ឆ្នាំ២០២៧។ ទោះជាយ៉ាងណាក្រុមអ្នកវិទ្យាសាស្ត្រសម្តែងការព្រួយបារម្ភថា បាតុភូត អែលនីញ៉ូ ដ៏កាចសាហាវនេះអាចនឹងបន្តអូសបន្លាយឥទ្ធិពលបំផ្លិចបំផ្លាញរបស់ខ្លួនរហូតដល់ខែមិថុនា ឬខែកក្កដា ឆ្នាំ២០២៧ ថែមទៀត៕
ដោយៈ សរ សុជាតិ
