សហគមន៍ម្រេចអន្តរជាតិ បានព្យាករណ៍ថា ផលិតកម្មម្រេចសកលនៅឆ្នាំ២០២៥ នឹងបន្តធ្លាក់ចុះ ជាពិសេសផលិតកម្មម្រេចនៅវៀតណាម និងប្រេស៊ីល ដែលជាប្រទេសនាំចេញម្រេចច្រើនបំផុតនៅលើពិភពលោក។ សហគមន៍ម្រេចអន្តរជាតិ បានអះអាងថា ផលិតកម្មម្រេចពិភពលោកនឹងថយចុះប្រហែល ៤% ឬប្រមាណ២ម៉ឺន២ពាន់តោន។
លោកស្រី ហាង ធីលៀង (Hoang Thị Liên) ប្រធានសមាគមម្រេច និងគ្រឿងទេសវៀតណាម បានឱ្យដឹងថា កាលពីឆ្នាំ២០២៤ វៀតណាមនាំចេញម្រេចគ្រប់ប្រភេទបានជាង២៥ម៉ឺនតោន ជាមួយចំណូលជាង១,៣ពាន់លានដុល្លារ។ ទំហំនាំចេញនេះមានការថយចុះជាង៥% បើធៀបនឹងឆ្នាំ២០២៣ ប៉ុន្តែតម្លៃនៃការនាំចេញបានកើនឡើងជាង៤៥% ដោយសារតម្លៃម្រេចមានការកើនឡើង។
បច្ចុប្បន្នសហរដ្ឋអាម៉េរិក ដែលមហាអំណាចផុតលេខលើពិភពលោកទាំងយោធា និងសេដ្ឋកិច្ច ជាទីផ្សារនាំចេញម្រេចធំបំផុតរបស់វៀតណាម។ ជាក់ស្តែងកាលពីឆ្នាំ២០២៤ ការនាំចេញម្រេចរបស់វៀតណាម ទៅសហរដ្ឋអាម៉េរិក សម្រេចបានជាង៧ម៉ឺន២ពាន់តោន ស្មើនឹងជិត២៩% នៃទីផ្សារនាំចេញសរុប បន្ទាប់មក សហភាពអារ៉ាប់រួម អាល្លឺម៉ង់ ហូឡង់ និងឥណ្ឌា។
មកទល់ពេលនេះផលិតកម្មម្រេចនៅលើពិភពលោកត្រូវបានគេប៉ាន់ប្រមាណថា មានប្រមាណជាង៣៦ លានតោននៅក្នុងមួយឆ្នាំ ហើយក្រៅពីវៀតណាម ប្រទេសនាំចេញដែលនាំចេញម្រេចធំៗនៅលើពិភពលោករួមមានប្រេស៊ីល ឥណ្ឌូនេស៊ី បូគីណា ហ្វាសូ ឥណ្ឌា និងស្រីលង្កា៕
ដោយៈ សរ សុជាតិ
