ក្រោយលោកស្រី ផែថងថាន ខ្ទាតចេញពីតំណែង គណបក្សភឿថៃ កំពុងខ្នះខ្នែងស្វែងរកការគាំទ្របេក្ខភាពនាយករដ្ឋមន្ត្រីថ្មី ពីគណបក្សប្រជាជនថៃ

សារព័ត៌មាន Thai Examiner បានរាយការណ៍ថា គណបក្សភឿថៃ និងបក្សប្រជាជនថៃ កំពុងចរចាពីការចងសម្ពន្ធភាព ដើម្បីជ្រើសរើសលោក ឆៃកាសេម និធិស៊ីរី ជានាយករដ្ឋមន្ត្រីបន្ទាប់របស់ប្រទេសថៃ ចំពេលមានភាពចលាចលនយោបាយ និងភាពមិនច្បាស់លាស់បន្ទាប់ពីតុលាការធម្មនុញ្ញបានសម្រេចបញ្ចប់ដំណែងលោកស្រី ផែថងថាន ស៊ីណាវ៉ាត្រា ពីបទរំលោភក្រមសីលធម៌ក្នុងនាមជាអ្នកដឹកនាំប្រទេស ក្រោយលេចធ្លាយការសន្ទនាតាមទូរសព្ទជាមួយនឹងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា។

ក្រៅពីគណបក្សភឿថៃ គណបក្សភូមិចៃថៃ របស់លោក អានុទិន ឆានវិរៈគល់ (Anutin Charnvirakul) ក៏បានបង្ហាញចេតនាចង់បានការគាំទ្រពីគណបក្សប្រជាជនថៃ ផងដែរ ក្រោយលោកសម្រេចថា នឹងឈរជាបេក្ខជននាយករដ្ឋមន្រ្តីទី៣២របស់ថៃ ក្រោយលោកបានដកខ្លួនពីរដ្ឋាភិបាលចម្រុះដឹកនាំដោយគណបក្សភឿថៃ និងតំណែងឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ ក្រោយមានបណ្តឹងឱ្យដកលោកស្រី ផៃថងថាន ចេញពីតំណែង។

ពាក់ព័ន្ធបញ្ហានេះ មេដឹកនាំបក្សប្រជាជនថៃ លោក ណាថាផុង រូងផាយ៉ាវុធ (Natthapong Ruangpanyawut) ទទួលស្គាល់ថា គណបក្សរបស់លោកពិតជាទទួលបានស្នើបែបនេះពីគណបក្សទាំងពីរខាងលើមែន តែមិនទាន់មានការសម្រេចចិត្តចុងក្រោយណាមួយនៅឡើយទេ។ លោកបានសង្កត់ធ្ងន់ថា ភាគីណាមួយដែលស្វែងរកការគាំទ្រពីគណបក្សរបស់លោក ត្រូវតែទទួលយកនូវលក្ខខណ្ឌរបស់គណបក្សលោក និងបញ្ជូននាយកប្រតិបត្តិសម្រាប់ការចរចាជាផ្លូវការ។

ការប្រកាសនេះធ្វើឡើងបន្ទាប់ពីគណបក្សប្រជាជនថៃ បានបដិសេធយ៉ាងដាច់អហង្ការចំពោះសំណើរបស់គណបក្សភឿថៃ ក្នុងការពន្យារពេលការរំលាយសភាពី៤ ទៅ៦ខែ។ លោក ណាថាផុង បានបញ្ជាក់យ៉ាងច្បាស់ថា លោកមិនអាចពិចារណារឿងនេះបានទេ ហើយគណបក្សរបស់លោកនឹងមិនចូលរួមការចរចានៅពីក្រោយឆាក ឬការចរចាក្រៅផ្លូវការឡើយ។ ប្រមុខគណបក្សប្រជាជនថៃ បានសង្កត់ធ្ងន់ថា មានតែការចរចាផ្លូវការជាមួយថ្នាក់ដឹកនាំបក្សនៅទីស្នាក់ការបក្សប៉ុណ្ណោះទើបចាត់ទុកថា ស្របច្បាប់៕

ដោយៈ សរ សុជាតិ