អស្ថិរភាពនៃតម្លៃស្បៀងនៅលើពិភពលោក ដែលបណ្តាលមកពីឥទ្ធិពលនៃ សង្រ្គាមរុស្ស៊ី-អ៊ុយក្រែន និងបញ្ហាបាតុភូត អែលនីណូ កំពុងគំរាមកំហែងតំបន់ អាស៊ីអាគ្នេយ៍ និងប្រជាជាតិខ្លះនៅអាស៊ីខាងត្បូងនោះ បាននិងកំពុងតែ ធ្វើឲ្យអ្នកជំនាញហ្វីលីពិនបង្កើនការ យកចិត្តទុកដាក់ធ្វើការចរចាជាមួយនឹងប្រទេសផលិតអង្ករធំៗ ដូចជាឥណ្ឌា និង វៀតណាមជាដើម ។
តាមសេចក្តីរាយការណ៍របស់សារព័ត៌មាន Bloomberg បានឲ្យដឹងថា នៅពេលនេះក្រសួងកសិកម្មហ្វីលីពីនកំពុងតែធ្វើកិច្ចការចរចាជាមួយនឹងវៀតណាម និង ឥណ្ឌា។ បើតាម លោក ឌូមីងហ្គោ ប៉ានហ្គានីបាន (Domingo Panganiban) អនុរដ្ឋមន្រ្តីក្រសួងកសិកម្មបានអះអាងថា តម្លៃអង្ករដែលខាងហ្វីលីពិនទទួលបានពីវៀតណាម ហាក់មានតម្លៃថោកជាតម្លៃអង្ករពីប្រភពផ្សេងៗប្រមាណជា ៤០ ដុល្លារក្នុងមួយតោន ។
អត្ថបទគួរអាន
តាមរយៈតម្លៃដែលវៀតណាមដាក់ចេញនេះ ប្រភពបានអះអាងថា ហ្វីលីពិននឹងអាចដណ្តើមយកចំណែកទីផ្សារអង្ករវៀតណាមពីទីផ្សារអន្តរជាតិ ចន្លោះពី ៣០ម៉ឺន ទៅ៥០ម៉ឺនតោន បន្ថែមទៀត ពីបរិមាណនៃអង្ករវៀតណាមនាំចេញទៅកាន់ទីផ្សារអន្តរជាតិនៅក្នុងមួយឆ្នាំសរុបប្រមាណជា ៨ លានតោន ។
មកដល់ពេលនេះហ្វីលីពិនគឺជាប្រទេសផលិតអង្ករមួយដែរ ប៉ុន្តែជាទូទៅអង្ករផលិតនៅក្នុងស្រុកមិនអាចបំពេញគ្រប់តម្រូវការរបស់ពលរដ្ឋឡើយ ហើយហ្វីលីពីនត្រូវនាំចូលអង្ករ ជាបន្តបន្ទាប់ពី ថៃ និង វៀតណាម ដោយសារតែផលិតកម្មស្រូវអង្ករនៅក្នុងប្រទេសនេះ តែងតែរំខាន ដោយសារតែព្យុះជាបន្តបន្ទាប់ ។
តាមការប៉ាន់ប្រមាណទុក នៅក្នុងឆ្នាំនេះហ្វីលីពិនអាចនឹងត្រូវការនាំចូលអង្ករសរុបរហូតដល់ទៅ២,៥ លានតោន ដែរ ដើម្បីបំពេញស្តុកដែលហ្វីលីពិនបាននាំចូលបម្រុងទុកកាលពីឆ្នាំ២០២២ សរុប ៣,៥ លានតោនហើយនោះ ៕
ដោយៈ សរ សុជាតិ
