Bitcoin កំពុងអុកឡុកទីផ្សារជួញដូរពិភពលោក ក្រោយតម្លៃរបស់វាហក់ឡើងខ្ពស់កប់ពពក

តម្លៃនៃការជូញដូ Bitcoin បានកើនឡើងដល់ជាង៦ម៉ឺនដុល្លារ ក្នុង១ Bitcoin កាលពីថ្ងៃទី២៨ ខែកុម្ភៈ ឆ្នាំ២០២៤ ពោលគឺជិតដល់កម្រិតខ្ពស់បំផុតដូចដែលគេធ្លាប់កត់ត្រា កាលពីឆ្នាំ២០២១ ដោយកាលនោះ ១ Bitcoin ត្រូវបានគេជូញដូររហូតដល់តម្លៃជិត៦ម៉ឺន៩ពាន់ដុល្លារ។ ចាប់តាំងពីនិយ័តករមូលបត្រ និងមូលនិធិជួញដូរការប្តូរប្រាក់របស់អាម៉េរិកទទួលស្គាល់យន្តការទូទាត់ Bitcoin នេះ កាលពីថ្ងៃទី១០ ខែមករា មក ប្រតិបត្តិការនៃការជូញដូរ bitcoin បានបើកដំណើរការស្របតាមទ្រឹស្តីសាធារណៈ ហើយវាក៏ត្រូវបានគេទទួលស្គាល់នៅក្នុងដំណើរការប្រតិបត្តិការវិនិយោគលើរូបិយប័ណ្ណគ្រីបតូកាន់តែទូលំទូលាយ ដែលនាំឲ្យប្រតិបត្តិការជួញដូរកាន់តែមានច្រើន។

តម្លៃនៃការជួញដូរ bitcoin បានស្រុតចុះមួយរយៈចាប់តាំងពីវិបត្តិធនាគា​រនៅចុងឆ្នាំ២០២២ ដោយនៅពេលនោះក្រុមហ៊ុនវិនិយោគការទូទាត់ និងការជួញដូរឌីជីថលនេះជាច្រើនបានដួលរលំ ប៉ុន្តែវាបានចាប់ផ្តើមស្តារទំនុកចិត្តឡើងវិញហើយនៅពេលនេះ។ ​

លោក មិកគេល ម័រ (Mikkel Morch) អ្នកឯកទេសនៃការជូញដូរនៅក្រុមហ៊ុនហិរញ្ញវត្ថុ ARK36 បានកត់សម្គាល់ថា ការទទួលបានការគាំទ្រពីនិយ័តករមូលបត្ររបស់សហរដ្ឋអាម៉េរិក និង មូលនិធិជួញដូរការប្តូរប្រាក់របស់ប្រទេសមហាអំណាចនេះ បានជួយចាក់បញ្ចូលនូវរលកនៃភាពសុទិដ្ឋិនិយមថ្មី ជំរុញបរិមាណជួញដូរ និងការយកចិត្តទុកដាក់ចំពោះក្រុមហ៊ុនដែលភ្ជាប់ជាមួយ bitcoin កាន់តែច្រើន។

គួររំលឹកថា Bitcoin ត្រូវបានគេបង្កើតឡើងនៅអំឡុងឆ្នាំ២០០៨ ក្រោមការផ្តួចផ្តើម​គំនិតរបស់បុគ្គលគ្មានអត្តសញ្ញាណមួយក្រុម។ ហើយវាត្រូវបានគេដាក់ឲ្យធ្វើចរាចរណ៍វិនិយោគតាមប្រព័ន្ធអ៊ិនធឺណិតដំបូងនៅឆ្នាំ២០០៩ ដោយកាលនោះតម្លៃនៃការជួញដូរ គឺមិនដល់១សេនដុល្លារផង ប៉ុន្តែនៅពេលនេះ ប្រទេសមួយចំនួនចាប់ផ្តើមទទួលស្គាល់ប្រតិបត្តិការនៃការជួញដូររបស់វាជាបន្តបន្ទាប់៕

ដោយៈ សរ សុជាតិ