ឯកឧត្តម ផន រឹម អ្នកនាំពាក្យក្រសួងសាធាណការ និងដឹកជញ្ជូន បានបញ្ជាក់ប្រាប់ខេមបូណូមីសថា ការសិក្សាសមិទ្ធិលទ្ធភាពលើគម្រោងមជ្ឈមណ្ឌលភស្តុភារកម្មភ្នំពេញ ត្រូវបានបញ្ចប់រួចរាល់ហើយ ហើយបច្ចុប្បន្នក្រសួងសាធារណការ និងដឹកជញ្ជូន និងភាគីពាក់ព័ន្ធកំពុងរៀបចំនិតីវិធី ដើម្បីស្នើសុំការអនុម័តលើសមិទ្ធផលសិក្សានេះពីរាជរដ្ឋាភិបាលកម្ពុជា។ ក្រោយរាជរដ្ឋាភិបាលកម្ពុជា ឯកភាពលើលទ្ធផលសិក្សាសមិទ្ធិលទ្ធភាពនេះ ភាគីពាក់ព័ន្ធនឹងឈានដល់ការចរចាកិច្ចព្រមព្រៀងសម្បាទានមុនឈានដល់ការអភិវឌ្ឍគម្រោង ដែលបម្រើឱ្យវិស័យដឹកជញ្ជូន និងភស្តុភារកម្មដ៏ធំមួយនេះ។ បើតាមការអះអាងរបស់អ្នកនាំពាក្យរូបនេះ គម្រោងនេះនឹងសាងសង់ជាពីរដំណាក់កាល ដោយដំណាក់កាលទី១ ពីឆ្នាំ២០២៥-២០២៩ និងដំណាក់កាលទី២ ពីឆ្នាំ២០៣៦-២០៤១។
គួរំលឹកថា គម្រោងភស្តុភារកម្មភ្នំពេញ ដែលមានតម្លៃវិនិយោគប្រមាណ២០០លានដុល្លារ ត្រូវបានចុះហត្ថលេខាលើកិច្ចព្រមព្រៀងក្របខណ្ឌរវាងក្រុមហ៊ុន YCH ជាមួយក្រសួងសាធារណការ និងដឹកជញ្ជូន កាលពីថ្ងៃទី៣ ខែមីនា ឆ្នាំ២០២១ ហើយគ្រោងបើកការដ្ឋានសាងសង់ដំណាក់កាលទី១ នៅអំឡុងឆ្នាំ២០២៣។ ប៉ុន្តែក្រោយមកក្រុមហ៊ុនសិង្ហបុរី YCH ដែលជាក្រុមហ៊ុនទទួលបានសិទ្ធិសិក្សា និងអភិវឌ្ឍន៍លើគម្រោងនេះ បានស្នើសុំពេលវេលាបន្ថែមទៀត ដើម្បីរៀបចំផែនការសំយោគបញ្ជូលលើចំណុចសំខាន់ៗពាក់ព័ន្ធនឹងផែនការហិរញ្ញវត្ថុ និងការវាយតម្លៃផលប៉ះពាល់បរិស្ថាន ព្រមទាំងការពិនិត្យឡើងវិញ នៃច្បាប់គយ និងបទប្បញ្ញត្តិផ្សេងៗ ដើម្បីដាក់ឆ្លងមកក្រសួងសាធារណការ និងដឹកជញ្ជូន។
គម្រោងមជ្ឈមណ្ឌលភស្ដុភារកម្មភ្នំពេញ ត្រូវបានអ្នកជំនាញក្នុងវិស័យដឹកជញ្ជូន និងឡូជីស្ទីក រំពឹងថា នឹងជួយជំរុញឲ្យវិស័យដឹកជញ្ជូនរបស់កម្ពុជា កាន់តែមានភាពល្អប្រសើរ ហើយវានឹងក្លាយជាកន្លែងប្រមូលផ្តុំដោយស្ថាប័នធំៗដូចជាគយ កន្លែងត្រួតពិនិត្យទំនិញ និងស្ថាប័នផ្តល់សេវាកម្មផ្សេងៗ ដែលអាចជួយសម្រួលឲ្យការដឹកជញ្ជូនទំនិញកាន់តែមានភាពងាយស្រួល និងឆាប់រហ័សជាងមុន៕
អត្ថបទ៖ បូ ដូឡា
