រដ្ឋាភិបាលវៀតណាម គ្រោងយកពន្ធលើការជួញដូរមាស ដើម្បីទប់ស្កាត់ការទិញមាសទុកលក់យកចំណេញ

តម្លៃដុំមាសនៅក្រុមហ៊ុន Saigon Jewelry នៅក្នុងខែនេះ បានហក់ឡើងដល់ជាង៥,១១៦ដុល្លារអាម៉េរិក ក្នុង១តម្លឹង ដែលខ្ពស់ជាងតម្លៃពិភពលោកប្រហែល១៧% មុនពេលធ្លាក់ចុះមកនៅត្រឹមជិត៥ពាន់ដុល្លារក្នុង១តម្លឹងនៅប៉ុន្មានថ្ងៃចុងក្រោយនេះ។ បច្ចុប្បន្នប្រាក់ចំណេញពីការទិញ-លក់មាសនៅវៀតណាម មិនត្រូវបានបង់ពន្ធជូនរដ្ឋនោះទេ។ ក្រុមអ្នកវិភាគបានលើកឡើងថា ការយកពន្ធលើការជួញដូរមាស វានឹងជួយបង្កើតឱ្យមានភាពស្មើគ្នាសម្រាប់ប្រភេទទ្រព្យសកម្មផ្សេងទៀត។

នាយករដ្ឋមន្ត្រីវៀតណាម លោក ផាម មិញជិញ (Pham Minh Chinh) បានបញ្ជាឱ្យអាជ្ញាធរចាត់វិធានការតឹងរ៉ឹងប្រឆាំងនឹងការក្លែងបន្លំទីផ្សារ និងការស្តុកមាសទុក ដែលជំរុញឱ្យតម្លៃមាសនៅក្នុងប្រទេសនេះកើនឡើងខ្ពស់កប់ពពក និងចង់ធ្វើវិសោធនកម្មច្បាប់ពន្ធ ដើម្បីបើកផ្លូវឈានទៅរកការយកពន្ធលើការជួញដូរមាសនាពេលខាងមុខ ដើម្បីទប់ស្កាត់ការទិញមាសទុកលក់យកចំណេញ។ គួរបញ្ជាក់ថា តម្លៃមាសនៅវៀតណាម បានកើនឡើងរហូតដល់៥៦% នៅឆ្នាំនេះបន្ទាប់ពីបានកើនឡើង១៤% កាលពីឆ្នាំមុន៕

ដោយ៖ សុខ មង្គល