តើសេចក្តីព្រាងច្បាប់ស្តីពី «ការការពាររុក្ខជាតិ និងភូតគាមអនាម័យ» មានសារៈសំខាន់យ៉ាងណាសម្រាប់វិស័យកសិកម្មកម្ពុជា?

ឯកឧត្តម ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានបញ្ជាក់ថា សេចក្តីព្រាងច្បាប់ស្តីពី«ការការពាររុក្ខជាតិ និងភូតគាមអនាម័យ» កំណត់អំពីការគ្រប់គ្រងសុខភាពរុក្ខជាតិ ការអនុវត្តវិធានការការពាររុក្ខជាតិ និងវិធានការភូតគាមអនាម័យ ការពារធនធានរុក្ខជាតិគ្រប់ប្រភេទ ការទប់ស្កាត់ការបង្ក ការរាលដាលឆ្លងនិងការរាតត្បាតពីសំណាក់សមាសភាពចង្រៃ ការលើកកម្ពស់ផលិតភាពកសិកម្ម សន្តិសុខស្បៀងអនាម័យគុណភាព និងសុវត្ថិភាពផលិតផលកសិកម្ម។ សេចក្ដីព្រាងច្បាប់នេះ ក៏នឹងជួយសម្រួលដល់ការធ្វើពាណិជ្ជកម្មក្នុងវិស័យកសិកម្ម ក៏ដូចជា រួមចំណែកក្នុងការអភិវឌ្ឍសេដ្ឋកិច្ចសង្គមជាតិ ថែមទាំងដើម្បីធានាការគ្រប់គ្រង ការការពាររុក្ខជាតិ និងភូតគាមអនាម័យ នៅក្នុងប្រទេសកម្ពុជា ផងដែរ។

បើតាមឯកឧត្តម ផៃ ស៊ីផាន គោលបំណងនៃច្បាប់ស្តីពី«ការការពាររុក្ខជាតិ និងភូតគាមអនាម័យ»  ផ្ដោតសំខាន់លើការ ការពារផលប្រយោជន៍របស់ប្រជាកសិករ,គាំទ្រគោលនយោបាយ និងយុទ្ធសាស្រ្តជំរុញផលិតកម្មកសិកម្ម កាត់បន្ថយភាពក្រីក្រ និងលើកកម្ពស់ជីវភាពប្រជាកសិករ ទប់ស្កាត់ការបង្ក ការរាលដាលឆ្លង និងការរាតត្បាតបំផ្លាញ ពីសំណាក់សមាសភាពចង្រៃគ្រប់ប្រភេទ ក៏ដូចជា រួមចំណែកលើកកម្ពស់សុខភាពសាធារណៈ និងធ្វើឱ្យមាននិរន្តរភាពធនធានធម្មជាតិ និងប្រព័ន្ធក្សេត្របរិស្ថាន។ លើសនេះច្បាប់ខាងលើ ក៏ជួយទប់ស្កាត់ការហូរចូលផលិតផលកសិកម្ម​គ្រប់ប្រភេទ ដែលមានផ្ទុកនូវសមាសភាពចង្រៃ និងសារធាតុ​បង្កផលប៉ះពាល់ចំពោះសុខភាព។

ជាពិសេស​ទប់ស្កាត់​ការនាំចូល ឬការផ្ទុះឡើងនូវប្រភេទ​សមាសភាពចង្រៃរាតត្បាតឈ្លានពាន ដែលបង្កមហន្តរាយដល់ដំណាំកសិកម្ម បំផ្លាញជីវចម្រុះ និងបរិស្ថានក្នុងប្រទេសកម្ពុជា ផងដែរ។

សូមបញ្ជាក់ថា សេចក្តីព្រាងច្បាប់ស្តីពី«ការការពាររុក្ខជាតិ និងភូតគាមអនាម័យ» ត្រូវបានរៀបចំឡើងដោយផ្អែកលើគោលនយោបាយនិងយុទ្ធសាស្រ្តរបស់រាជរដ្ឋាភិបាល និងអនុលោមតាមមូលដ្ឋានគតិយុត្តិពាក់ព័ន្ធជាធរមាន នៅក្នុងប្រទេសកម្ពុជា ព្រមទាំងកិច្ចព្រៀងនិងអនុសញ្ញាក្នុងតំបន់និងអន្តរជាតិ ស្តីពីការការពាររុក្ខជាតិនិងភូតគាមអនាម័យ ដើម្បីឆ្លើយតបទៅនឹងនិន្នាការរីកចម្រើនរបស់វិស័យកសិកម្មក្នុងក្របខណ្ឌសុវត្ថិភាពស្បៀង ការលើកកម្ពស់គុណភាពផលិតផលកសិកម្ម ការបង្កើនការនាំចេញកសិផល និងធានាចីរភាពអភិវឌ្ឍន៍ ក្នុងបរិការណ៍សមាហរណកម្មសេដ្ឋកិច្ចពិភពលោកប្រកបដោយការប្រកួតប្រជែង៕