ជុំវិញបញ្ហានេះដែរ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់បានបញ្ជាក់ថា កន្លងមកក្រសួងបានដោះស្រាយបញ្ហាវិវាទដីធ្លីជូនពលរដ្ឋបានជាង១ម៉ឺនករណី និងមានជាង៣ពាន់ករណីកំពុង និងត្រៀមដោះស្រាយ។ ទន្ទឹមនឹងនេះ ក្រសួងប្តេជ្ញាថា នឹងខិតខំបញ្ចប់ការផ្តល់បណ្ណកម្មសិទ្ធិដីធីជូនពលរដ្ឋឲ្យបាន១០០% នៅត្រឹមឆ្នាំ២០២៣។
នាពិធីសម្ពោធទីស្នាក់ការក្រសួងរៀបចំដែនដី នគរូបនីយកម្ម និងសំណង់ នៅព្រឹកថ្ងៃទី៨ វិច្ឆិកា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងពីបញ្ហាធំៗចំនួន៣ ពាក់ព័ន្ធវិស័យដីធ្លី ឲ្យក្រសួងរៀបចំដែនខិតខំ និងពន្លឿនការដោះស្រាយជូនប្រជាពលរដ្ឋ។ បញ្ហាសំខាន់មួយក្នុងចំណោមបញ្ហាទាំងបី គឺប្រមុខដឹកនាំរាជរដ្ឋាភិបាលកម្ពុជា បញ្ជាឲ្យក្រសួងបន្តខិតខំដោះស្រាយបញ្ហាវិវាទដីធ្លី ដែលតែងតែកើតមានជាញឹកញាប់ ជាពិសេសពេលមានគម្រោងអភិវឌ្ឍន៍ម្តងៗ។
សម្រាប់ការដោះស្រាយបញ្ហាវិវាទដីធ្លីនេះដែរ សម្តេចតេជោ ហ៊ុន សែន លើកទឹកចិត្តឲ្យក្រសួងព្យាយាមដោះស្រាយក្រៅប្រព័ន្ធតុលាការ ព្រោះការដោះស្រាយរបៀបនេះអាចមានប្រសិទ្ធិភាពខ្ពស់ក្នុងការបញ្ចប់បញ្ហាបានលឿន ជាងការដោះស្រាយតាមប្រព័ន្ធតុលាការ ដែលមានភាគីមួយត្រូវចាញ់ ឬឈ្នះ។ ជាមួយគ្នានេះ សម្តេច ក៏បានជំរុញឲ្យក្រសួងខិតខំក្នុងការផ្តល់បណ្ណកម្មសិទ្ធិដីធ្លីជូនប្រជាពលរដ្ឋឲ្យបានគ្រប់គ្នា និងដោះស្រាយបញ្ហារឿងដីសម្បទានសង្គមកិច្ចជាដើម។
អត្ថបទគួរអាន
ជុំវិញបញ្ហាខាងលើ ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានអះអាងថា កន្លងមកក្រសួងបានខិតខំដោះស្រាយបញ្ហានានាជាច្រើនជូនប្រជាពលរដ្ឋ ក៏ដូចជាក្រុមហ៊ុនឯកជន ដើម្បីជួយសម្រួលដល់ការអភិវឌ្ឍន៍លើវិស័យដីធ្លី និងសំណង់ក្នុងការជួយជំរុញកំណើនសេដ្ឋកិច្ចរបស់កម្ពុជា។ ឯកឧត្តមបានបន្ថែមថា កន្លងមកក្រសួងបានដោះស្រាយបញ្ហាវិវាទដីធ្លីជូនប្រជាពលរដ្ឋបានចំនួនជាង១ម៉ឺនករណី និងកំពុងដោះស្រាយជាង ៣ពាន់ករណី។
ពាក់ព័ន្ធបញ្ហាផ្តល់បណ្ណកម្មសិទ្ធិដីធ្លី ឯកឧត្តមឧបនាយករដ្ឋមន្ត្រី ជា សុផារ៉ា បានគូសបញ្ជាក់ថា កន្លងមកក្រសួងបានផ្តល់បណ្ណកម្មសិទ្ធិដីធ្លីជូនប្រជាពលរដ្ឋបានចំនួន៦លាន៣សែនស្មើប្រមាណ៩០,០៣% នៃចំនួនក្បាលដីប៉ាន់ស្មាន៧លានក្បាលដី ហើយឯកឧត្តមប្តេជ្ញាថា ក្រសួងនឹងខិតខំចុះបញ្ជីក្បាលដីឲ្យបាន១០០% នៅត្រឹមឆ្នាំ២០២៣ ខាងមុខនេះ៕
None
