ការធ្វើកូដកម្មនៅទូទាំងប្រទេសបង់ក្លាដែស ដែលដឹកនាំដោយសកម្មជនគណបក្សជាតិនិយមបង់ក្លាដែស (BNP) នៅមួយរយៈមកនេះ កំពុងធ្វើឲ្យប៉ះពាល់ដល់បរិយាកាសធុរកិច្ច ពាណិជ្ជកម្មនៅក្នុងប្រទេសនេះយ៉ាងខ្លាំង។
ការតវ៉ានេះបានរាំងស្ទះដល់ការធ្វើដំណើររបស់ប្រជាពលរដ្ឋ និងកំពុងបង្ខំឱ្យពលរដ្ឋជាច្រើនមិនហ៊ានចេញក្រៅផ្ទះ ដើម្បីចៀសវាងអំពើហិង្សាដែលអាចកើតឡើងជាយថាហេតុ។ ជាក់ស្ដែងថ្មីៗនេះ មានករណីដុតបំផ្លាញសម្បត្តិសាធារណៈ និងការស្លាប់ជាច្រើននាក់ ខណៈដែលសមាជិក និងថ្នាក់ដឹកនាំគណបក្ស BNP រាប់រយនាក់ត្រូវបានចាប់ខ្លួន។
បន្ថែមពីលើភាពចលាចលនេះ កម្មករមកពីឧស្សាហកម្មកាត់ដេរដ៏សំខាន់នៅក្នុងប្រទេសបង់ក្លាដែស ក៏បានធ្វើការតវ៉ានៅក្នុងពេលប៉ុន្មានថ្ងៃថ្មីៗនេះដែរ ដើម្បីទាមទារការដំឡើងប្រាក់ឈ្នួលរបស់ពួកគេ។ ភាពជាប់គាំងផ្នែកនយោបាយកាន់តែខ្លាំង កំពុងបង្កើនការភ័យខ្លាចដល់សេដ្ឋកិច្ចរបស់បង់ក្លាដែស ដែលបានរងគ្រោះយ៉ាងខ្លាំងដោយសារតែផលប៉ះពាល់ជាសកលនៃជំងឺកូវីដ-១៩ និងសង្គ្រាមនៅអ៊ុយក្រែនរួចទៅហើយនោះ។
ការថយចុះនូវទុនបម្រុងរូបិយប័ណ្ណបរទេស និងអតិផរណាកើនខ្ពស់ បានបង្ខំឱ្យរដ្ឋាភិបាល របស់លោកស្រី ហាស៊ីណា ទៅចរចាជាមួយមូលនិធិរូបិយវត្ថុអន្តរជាតិ សម្រាប់ប្រាក់កម្ចីចំនួនជិត៥ពាន់លានដុល្លារកាលពីដើមឆ្នាំនេះ។ ប៉ុន្តែ ខណៈដែលកំណែទម្រង់មួយចំនួនកំពុងតែធ្វើជាបណ្ដើរៗនោះ ស្ថិរភាពម៉ាក្រូសេដ្ឋកិច្ចនៅមានភាពស្រពិចស្រពិល គួបផ្សំនឹងភាពចលាចលនៅតាមដងផ្លូវអាចបំផ្លាញដល់ការរំពឹងទុករបស់ប្រទេសនេះកាន់តែខ្លាំងឡើងថែមទៀត។
អត្ថបទគួរអាន
លោក អឹម ហ៊ូម៉ាយុន កាប៊ឺ (M. Humayun Kabir) ប្រធានវិទ្យាស្ថានសហគ្រាសបង់ក្លាដែស ដែលជារៀបចំគោលនយោបាយ និងជាអតីតឯកអគ្គរដ្ឋទូតប្រចាំនៅសហរដ្ឋអាម៉េរិក បាននិយាយថា មើលជារួមទៅ វាគឺជាស្ថានភាពដ៏លំបាកមួយ ប៉ុន្ដែហានិភ័យគឺខ្ពស់ណាស់ព្រោះថាបើសិនភាពចលាចល ឬភាពជាប់គាំងនៅតែបន្តមាននោះ ការដោះដូរពាណិជ្ជកម្មទៅកាន់សកលលោក ដូចជាអាជីវកម្ម ការនាំចេញ ការផ្ទេរប្រាក់ ឬសកម្មភាពសេដ្ឋកិច្ចផ្សេងទៀត គឺអាចនឹងរងផលប៉ះពាល់បន្ថែមទៀតជាមិនខាន។
ឱនភាពសមតុល្យនៃការទូទាត់របស់បង់ក្លាដែស បានកើនឡើងដល់ជិត ៣ពាន់លានដុល្លាររួចទៅហើយនៅក្នុងត្រីមាសទី៣ ឆ្នាំនេះ ខណៈដែលឱនភាពគណនីចរន្តបានកើនឡើងដល់ជិត ៤ពាន់លានដុល្លារ។
ទុនបម្រុងរូបិយប័ណ្ណបរទេស បានធ្លាក់ចុះដល់កម្រិតទាបថ្មីមួយ គឺមកនៅត្រឹមចំនួនជាង ២០ពាន់លានដុល្លារប៉ុណ្ណោះគិតត្រឹមរយៈពេលចុងក្រោយនេះ។
បើតាមការិយាល័យជំរុញការនាំចេញបង្ហាញថា ប្រាក់ចំណូលតាមរយៈការនាំចេញទំនិញរបស់បង់ក្លាដែស បានធ្លាក់ចុះជិត១៤% មកនៅត្រឹមជិត៤ពាន់លានដុល្លារ ក្នុងខែតុលា ដែលជាកម្រិតទាបបំផុតមួយនៅក្នុងរយៈពេល២៦ខែ។ រីឯ រំហូរចូលនៃការផ្ញើប្រាក់ក៏បានធ្លាក់ចុះជាង ៤%ផងដែរ ក្នុងខែកក្កដាដល់ខែតុលា៕
អត្ថបទ៖ សុខ ជា
