តែយ៉ាងណាភាពប្រសើរឡើងនៃតម្លៃជ្រូករស់នេះ បានធ្វើឱ្យមានភាពចម្រូងចម្រាសជាមួយក្រុមអាជីវករមួយចំនួន ខណៈពួកគេចោទប្រកាន់លើក្រុមហ៊ុនផ្គត់ផ្គង់សាច់ជ្រូកមួយចំនួនថា ធ្វើឱ្យទីផ្សារឡើង ឬចុះស្រេចតែចិត្ត និងដណ្ដើមអតិថិជនពីអាជីវករលក់រាយជាដើម។
លោក សាន់ ចាន់ថេត ប្រធានសមាគមផ្គត់ផ្គង់ជ្រូកកម្ពុជា កត់សម្គាល់ឃើញថា នៅមួយរយៈចុងក្រោយនេះ ទីផ្សារជ្រូករស់បានហក់ឡើងថ្លៃខុសពីធម្មតា ដែលហាក់ផ្ទុយពីការប្រកួតប្រជែងតាមបែបទីផ្សារសេរី។ លោកបានចាត់ទុកការហក់ឡើងថ្លៃជ្រូករស់ខុសពីធម្មតានេះ គឺដោយសារមានការសហការកំណត់ថ្លៃឡើង ឬចុះពីសំណាក់ក្រុមហ៊ុនធំៗមួយចំនួន ហើយមានក្រុមហ៊ុនចិញ្ចឹមជ្រូកខ្លះ បានកាប់សាច់លក់ដោយខ្លួនឯង ជាហេតុធ្វើឱ្យបាត់បង់អតិថិជនប្រចាំថ្ងៃរបស់អាជីវករលក់រាយនៅលើទីផ្សារ។ សម្រាប់ប្រធានសមាគមរូបនេះ តម្លៃជ្រូករស់ក្នុងរង្វង់១ម៉ឺនរៀល ក្នុង១គីឡូក្រាម ជាតម្លៃសមស្របក្នុងការទទួលផលចំណេញទាំងអស់គ្នា ប៉ុន្តែការឡើងថ្លៃជ្រូករស់រហូតដល់ជាង១ម៉ឺន១ពាន់រៀល ក្នុង១គីឡូក្រាម ដែលកំណត់ដោយក្រុមហ៊ុនផ្គត់ផ្គង់ គឺជាបញ្ហាដែលត្រូវរួមគ្នាដោះស្រាយ។
ជាមួយគ្នានេះ លោក ស្រ៊ុន ពៅ ប្រធានសមាគមអ្នកចិញ្ចឹមជ្រូកកម្ពុជា បានគូសបញ្ជាក់ថា តម្លៃជ្រូករស់ទើបតែមានភាពប្រសើរនៅមួយរយៈពេលចុងក្រោយនេះប៉ុណ្ណោះ ខណៈអ្នកចិញ្ចឹមជួបបញ្ហាប្រឈមនឹងការខាតបង់ថវិកាអស់ជាច្រើនឆ្នាំមកហើយ ហើយការខាតបង់កន្លងមក ក៏ពុំបានធ្វើឱ្យប៉ះពាល់ដល់អាជីវករជាអ្នកលក់សាច់ជ្រូកក្នុងទីផ្សារនោះដែរ។ ទោះបីតម្លៃជ្រូករស់នាពេលបច្ចុប្បន្នមានភាពប្រសើរសម្រាប់អ្នកចិញ្ចឹមក៏ពិតមែន ប៉ុន្តែប្រធានសមាគមរូបនេះបានលើកឡើងថា វាពុំទាន់មានផលប៉ះពាល់ដល់អ្នកទទួលទាននៅឡើយទេ ដោយសារតែសាច់ជ្រូកលក់នៅលើទីផ្សារ ក៏ពុំទាន់មានការឡើងថ្លៃខ្លាំងនោះដែរ។ សម្រាប់លោក ស្រ៊ុន ពៅ នៅពេលក្រុមហ៊ុនចិញ្ចឹមជ្រូកមានទីសត្តឃាតដ្ឋានស្តង់ដាត្រឹមត្រូវដោយខ្លួនឯង នោះនឹងធ្វើឱ្យសាច់សត្វដែលលក់នៅលើទីផ្សារកាន់តែមានភាពប្រគួតប្រជែងទៅលើផ្នែកគុណភាព។
ពាក់ព័ន្ធបញ្ហាតម្លៃជ្រូករស់នេះដែរ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា ថ្លៃជ្រូករស់នាពេលបច្ចុប្បន្នមានការកើនឡើងប្រសើរជាងពេលមុនសម្រាប់កសិករអ្នកចិញ្ចឹម ខណៈតម្លៃនេះមិនទាន់ប៉ះពាល់ដល់ប្រាក់ចំណេញរបស់អ្នកផ្គត់ផ្គង់សាច់ជ្រូក ឬអ្នកបរិភោគនៅឡើយទេ។ សម្រាប់មន្រ្តីជាន់ខ្ពស់រូបនេះ ថ្លៃជ្រូករស់នៅក្នុងរង្វង់១ម៉ឺនរៀល ក្នុង១គីឡូក្រាម គឺជាតម្លៃសមរម្យ ហើយអ្នកផ្គត់ផ្គង់សាច់ជ្រូក ក៏ធ្លាប់បានទទួលប្រាក់ចំណេញច្រើនក្នុងអំឡុងពេល ដែលថ្លៃជ្រូករស់មានការថយចុះផងដែរ។ តែយ៉ាងណា នៅក្នុងករណីថ្លៃជ្រូករស់កើនខ្ពស់លើសពីធម្មតា ក្រសួងកសិកម្ម នឹងចាត់វិធានការឆ្លើយតបជាក់លាក់ ដូចដែលធ្លាប់បានអនុវត្តលើករណីថ្លៃជ្រូករស់ធ្លាក់ចុះផងដែរ ខណៈកន្លងមកក្រសួងកសិកម្ម បានធ្វើកិច្ចការជាច្រើនពាក់ព័ន្ធនឹងការពង្រឹងខ្សែច្រវាក់តម្លៃ និងជួយសម្របសម្រួលផែនការផលិតកម្មឱ្យសមស្របទៅនឹងតម្រូវការទីផ្សារ។
បើតាមការគូសបញ្ជាក់ពីលោក ស្រ៊ុន ពៅ បច្ចុប្បន្ននៅកម្ពុជា មានតម្រូវការប្រើប្រាស់ និងកាប់ជ្រូករស់ប្រមាណ៩ពាន់ក្បាល ឬស្មើនឹង៩០ម៉ឺនគីឡូក្រាម នៅក្នុង១ថ្ងៃ៕
អត្ថបទ៖ បូ ដូឡា
