វគ្គបណ្តុះបណ្តាលនេះបានរៀបចំឡើងក្នុងគោលបំណងអភិវឌ្ឍជំនាញ និងសមត្ថភាពដល់អ្នកចូលរួមក្នុងការសម្រុះសម្រួលវិវាទ ឬដោះស្រាយជម្លោះដោយតម្លាភាព និងប្រកបដោយប្រសិទ្ធភាពខ្ពស់ និងដើម្បីលើកកម្ពស់វប្បធម៌ការសន្ទនា ពង្រឹងទំនាក់ទំនងសហគមន៍ បង្កើនបរិយាកាសប្រកបដោយសន្តិភាព និងសុខុមាលភាពក្នុងសហគមន៍។
កម្មវិធីនេះទទួលបានការចូលរួមពីមន្ត្រីរាជការជាច្រើនរូបរួមទាំង ប្រធានការិយាល័យនីតិកម្ម និងសម្រុះសម្រួលវិវាទមូលដ្ឋាន មេឃុំ/ចៅសង្កាត់ មេភូមិ ជំទប់ឃុំ និងបុគ្គលិក អិលអូអិលស៊ី ។ ជាពិសេស អិលអូអិលស៊ី បានអញ្ជើញគ្រូបង្រៀនមកពីមជ្ឈមណ្ឌលសម្រុះសម្រួលវិវាទកម្ពុជា ដើម្បីចែករំលែកចំណេះដឹង និងបទពិសោធន៍អនុវត្តជាក់ស្តែងដល់អ្នកចូលរួមផងដែរ។
ក្នុងឱកាសបើកវគ្គបណ្តុះបណ្តាល លោក សុខ វឿន ប្រធាននាយកប្រតិបត្តិរបស់ អិលអូអិលស៊ី បានថ្លែងដូច្នេះថា៖ “ អិលអូអិលស៊ី គឺជាគ្រឹះស្ថានហិរញ្ញវត្ថុឈានមុខមួយដែលមានការចូលរួមយ៉ាងសកម្មក្នុងសកម្មភាពសង្គម។ វគ្គបណ្តុះបណ្តាលនេះជាជំហានសំខាន់ក្នុងការផ្តល់ឱ្យអ្នកចូលរួមនូវចំណេះដឹង និងជំនាញសម្រុះសម្រួល ដើម្បីបង្កើនបរិយាកាសសន្តិភាព និងសុខុមាលភាពក្នុងសហគមន៍”។
លោកបានបន្ថែមថា វគ្គបណ្តុះបណ្តាលនេះនឹងជួយឱ្យអ្នកចូលរួមអភិវឌ្ឍជំនាញ ក្នុងការទប់ស្កាត់ គ្រប់គ្រង និងដោះស្រាយវិវាទក្នុងសហគមន៍ដោយសន្តិវិធី ដោយមានការយល់ស្របពីគ្រប់ភាគីពាក់ព័ន្ធ។ លោកសង្ឃឹមថា វាជាឱកាសមួយសម្រាប់បង្កើនភាពរួបរួម និងអភិវឌ្ឍសន្តិភាពប្រកបដោយចីរភាពនៅក្នុងសហគមន៍។
គួរបញ្ជាក់ផងដែរ អិលអូអិលស៊ី តែងតែរិះរក និងបង្កើតនូវកម្មវិធីបណ្តុះបណ្តាលថ្មីៗ ដើម្បីជំរុញ និងគាំទ្រដល់ការបង្កើនជំនាញទៅកាន់បុគ្គលិក និងអតិថិជន ព្រមទាំងភាគីពាក់ព័ន្ធផ្សេងទៀតដើម្បីបង្កើននូវប្រសិទ្ធភាពការងារ និងជំនាញក្នុងការប្រាស្រ័យទាក់ទង៕
