នៅក្នុងពិធីសំណេះសំណាលជាមួយប្រជាពលរដ្ឋនៅតំបន់អភិវឌ្ឍន៍ថ្មីរុនតាឯកជាលើកទី៣ នាថ្ងៃទី ២១ ខែតុលាឆ្នាំ២០២២ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានគូសបញ្ជាក់ថា ដើម្បីសម្រួលដល់ការចំណាយរបស់បងប្អូនប្រជាពលរដ្ឋ អគ្គិសនីកម្ពុជា នឹងរៀបចំប្រព័ន្ធតភ្ជាប់បណ្ដាញអគ្គិសនីឥតគិថ្លៃ សម្រាប់ពលរដ្ឋតាំងទីលំនៅក្នុងតំបន់អភិវឌ្ឍន៍រុនតាឯក និងពាក់ស្នែង បើទោះបីជាអ្នកប្រើប្រាស់អគ្គិសនីកម្លាំងតូចត្រឹម៥អំពែ ឬប្រើកម្លាំងធំដល់១០០អំពែក៏ដោយ។ ក្នុងនោះដែរ អគ្គិសនីកម្ពុជា នឹងត្រូវចំណាយថវិកាប្រមាណជាង ៦លានដុល្លារ ប៉ុន្ដែអគ្គិសនីកម្ពុជា មិនទាមទារប្រាក់ពីរដ្ឋាភិបាលឡើយ ដើម្បីកសាងហេដ្ឋារចនាសម្ព័ន្ធតភ្ជាប់បណ្ដាញអគ្គិសនីចូលមកតំបន់ទាំងនេះ។
អត្ថបទគួរអាន
បើតាមសម្តេច ហ៊ុន សែន ប្រជាពលរដ្ឋនៅតំបន់រុនតាឯក ទាំងអ្នកដែលរស់នៅពីមុន ក៏ដូចជាពលរដ្ឋទើបមករស់នៅថ្មី គឺសុទ្ធតែទទួលបានការតភ្ជាប់បណ្ដាញអគ្គិសនីដោយឥតគិតថ្លៃទាំងអស់។ សម្តេច បន្ថែមថា បើតាមអគ្គិសនីកម្ពុជា ការតភ្ជាប់បណ្ដាញអគ្គិសនីឥតគិថ្លៃនេះ គឺគិតត្រឹមតែរបងផ្ទះរបស់ប្រជាពលរដ្ឋតែប៉ុណ្ណោះ ចំណែកឯការចំណាយថ្លៃខ្សែភ្លើងតភ្ជាប់ពីរបងផ្ទះចូលក្នុងផ្ទះរបស់ប្រជាពលរដ្ឋគឺជាការចំណាយផ្ទាល់របស់ម្ចាស់ផ្ទះរាងខ្លួន។
សូមបញ្ជាក់ថា គិតមកទល់ពេលនេះ មានពលរដ្ឋប្រហែលជាង៩ពាន់៦រយគ្រួសារហើយ ដែលគ្រប់លក្ខខណ្ឌ និងស្ម័គ្រចិត្តរុះរើសំណង់ខុសច្បាប់របស់ពួកគេចេញពីតំបន់នោះ ហើយក្នុងនោះមានពលរដ្ឋប្រមាណជាង៦ពាន់៤រយគ្រួសារបានយល់ព្រមទៅតាំងលំនៅដ្ឋាននៅតំបន់រុនតាឯក និងជាង៣ពាន់២រយគ្រួសារទៀត បានទៅតាំងលំនៅដ្ឋាននៅទីតាំងអភិវឌ្ឍន៍ពាក់ស្នែង។ នេះបើតាមការអះអាងរបស់ សម្តេច ហ៊ុន សែន៕
