រដ្ឋាភិបាលឡាវប្រាប់ពលរដ្ឋកុំចេញធ្វើដំណើរបើមិនចាំបាច់ ខណៈកង្វះខាតប្រេងឥន្ធនៈមិនទាន់ដោះស្រាយបាន

បើតាមការអះអាងពីរដ្ឋាភិបាល និងសមាគមប្រេងឥន្ធនៈឡាវ ការអំពាវនាវឲ្យពលរដ្ឋជួយសន្សំប្រេងនេះ គឺដើម្បីធានាថា ប្រេងសាំងមានបម្រុងគ្រប់គ្រាន់សម្រាប់ប្រើប្រាស់ បម្រើឲ្យវិស័យកសិកម្ម និងសកម្មភាពសេដ្ឋកិច្ចសំខាន់ៗផ្សេងទៀត។

អំឡុងពេលជួបបញ្ហាខ្វះខាតប្រេងឥន្ធនៈ កសិករមួយចំនួនបានត្អូញត្អែរថា ពួកគេមិនអាចបង្កបង្កើនផលបានក្នុងរបបកសិកម្មរបស់ពួកគេបានទេ ដោយសារតែកង្វះខាតប្រេងសាំង និងបានអំពាវនាវឱ្យភាគីពាក់ព័ន្ធចាត់វិធានការដោះស្រាយវិបត្តិនេះឱ្យបានឆាប់រហ័ស ពុំនោះទេ វានឹងប៉ះពាល់ដល់វិស័យកសិកម្ម និងស្បៀងអាហារក្នុងប្រទេស។ របាយកាណ៍កាលពីឆ្នាំ២០២០បង្ហាញថា ពលរដ្ឋជិត៧០%នៃពលរដ្ឋសរុបរបស់ឡាវទាំងជាង៧លាននាក់ ជាកសិករ។

គួរជម្រាបថា ខេត្តខាំមួន (Khammun) ជាខេត្តមួយក្នុងចំណោមខេត្តជាច្រើនទៀតរបស់ឡាវ ដែលទទួលរងការខ្វះខាតប្រេងឥន្ធនៈខ្លាំងជាងគេ ខណៈដែលស្ថានីយ៍ប្រេងឥន្ធនៈជាច្រើនក្នុងខេត្តមួយនេះ ស្ទើរតែរីងស្ងួតគ្មានប្រេងទៅហើយ។ ប្រការនេះធ្វើឲ្យ អ្នកបើកបរយានយន្តជាច្រើនមិនអាចប្រើប្រាស់យានជំនិះរបស់ពួកគេទេ។

សារព័ត៌មាន Laotian Times ដដែលបន្តរាយការណ៍ថា រដ្ឋសភាបានអនុម័តសេចក្តីសម្រេចដំណោះស្រាយមួយ ដើម្បីកាត់បន្ថយពន្ធអាករលើការនាំចូលឥន្ធនៈ ដើម្បីព្យាយាមបញ្ចៀសវិបត្តិប្រេងឥន្ធនៈនៅក្នុងប្រទេសផងដែរ។

ជាក់ស្តែង ពន្ធអាករលើប្រេងម៉ាស៊ូតនឹងត្រូវកាត់បន្ថយពី ២១%មកនៅត្រឹម ១១% ខណៈពន្ធអាករលើប្រេងសាំងនឹងធ្លាក់ចុះពី ៣១%មកនៅត្រឹម១៦%។ យ៉ាងណាក៏ដោយ ការកាត់បន្ថយពន្ធលើឥន្ធនៈ គឺជាវិធានការបណ្ដោះអាសន្ន ដែលនឹងមានសុពលភាពរយៈពេលបីខែប៉ុណ្ណោះ ហើយវានឹងត្រូវលុបចោលវិញ ប្រសិនបើស្ថានការណ៍ប្រេងនៅក្នុងប្រទេសនិងពិភពលោកមានការផ្លាស់ប្តូរ។

សូមជម្រាបថា ក្រៅពីដំណោះស្រាយបន្ថយពន្ធរបស់រដ្ឋាភិបាលឡាវក៏បានពិភាក្សាពីដំណោះស្រាយដែលអាចទៅរួចមួយទៀត គឺការស្វែងរកប្រភពអ្នកនាំចូលប្រេង ដែលមានតម្លៃថោក ហើយ បច្ចុប្បន្នគេកំពុងសម្លឹងឃើញការផ្គត់ផ្គង់ប្រេងពីប្រទេសរុស្ស៊ី៕