តើភ្លើងសង្គ្រាមនៅមជ្ឈិមបូព៌ានឹងរុញច្រាន ឬបង្អាក់ការនាំចេញអង្កររបស់កម្ពុជា?

លោកឧកញ៉ា ឡាយ ឈុនហួរ ប្រធានសហព័ន្ធសូវអង្ករកម្ពុជាបានគូសបញ្ជាក់ថា មកទល់ពេលនេះមិនទាន់មានផលប៉ះពាល់គួរឱ្យកត់សម្គាល់ណាមួយបង្កឡើងដោយវិបត្តិសង្រ្គាមនៅតំបន់មជ្ឈិមបូព៌ា ដែលធ្វើឱ្យរាំងស្ទះដល់ការនាំចេញអង្កររបស់កម្ពុជាទៅកាន់ទីផ្សារអឺរ៉ុប និងមជ្ឈិមបូព៌ានៅឡើយទេ ប៉ុន្តែអ្វីដែលជាក្តីបារម្ភនោះ គឺការកើនឡើងតម្លៃដឹកជញ្ជូនទំនិញ ក្រោយតម្លៃប្រេងហក់ឡើងខ្ពស់។ បើតាមប្រធានសហព័ន្ធសូវអង្កររូបនេះ បើទោះបីជាកន្លងមកការនាំចេញអង្កររបស់កម្ពុជាទៅកាន់ទីផ្សារនៅតំបន់មជ្ឈិមបូព៌ានៅមានកម្រិតតូចក៏ពិតមែន ប៉ុន្តែទីផ្សារនេះ ក៏ជាទីផ្សារសំខាន់មួយរបស់កម្ពុជានៅប៉ុន្មានឆ្នាំចុងក្រោយនេះ ដូច្នេះចង់ ឬមិនចង់ប្រសិនបើបញ្ហាសង្រ្គាមនេះបន្តអូសបន្លាយពេលយូរប្រាកដណាស់វានឹងធ្វើឱ្យប៉ះពាល់ដល់ការនាំចេញអង្ករកម្ពុជាទៅកាន់តំបន់នោះជាក់ជាមិនខាន។ លើសពីនេះ ការនាំចេញទៅកាន់តំបន់ផ្សេងៗ ដូចជាអឺរ៉ុបជាដើម ក៏អាចជួបបញ្ហាប្រឈមខ្លាំងដែរ ដោយសារតម្លៃដឹកជញ្ជូននឹងហក់ឡើងកាន់តែខ្ពស់ថែមទៀត។

តែទោះជាយ៉ាងណាលោកឧកញ៉ា ឡាយ ឈុនហួរ យល់ឃើញថា នៅក្នុងកាលៈទេសៈនៃវិបត្តិសង្គ្រាមនៅមជ្ឈិមបូព៌ានេះ វាក៏អាចជាឱកាសសម្រាប់កម្ពុជា ដែលជាប្រទេសផលិតស្បៀងផងដែរ ពិសេសអង្ករតែម្តង។ ដ្បិតតាមបទពិសោធន៍កាលពីមានបញ្ហាសង្រ្គាមរវាងរុស្សី និងអ៊ុយក្រែន ទោះតម្លៃប្រេងហក់ឡើងខ្ពស់ ថ្លៃដឹកជញ្ជូនកើនឡើង ប៉ុន្តែតម្រូវការនាំចេញអង្កររបស់កម្ពុជាមានការកើនឡើងគួរឱ្យកត់សម្គាល់ បើទោះបីជាតម្លៃទីផ្សារអង្ករកើនឡើងក៏ដោយ។

គួរបញ្ជាក់ថា នៅ១ខែដំបូងដើមឆ្នាំ២០២៦ កម្ពុជារកចំណូលបានជាង៧០លានដុល្លារអាម៉េរិកពីការនាំចេញអង្ករក្នុងបរិមាណជាង១១ម៉ឺន៥ពាន់តោនទៅកាន់គោលដៅចំនួន៤៥ប្រទេស ក្នុងនោះសហភាពអឺរ៉ុបនៅតែជាទីផ្សារដ៏មានសក្តានុពល ដោយបាននាំចូលជិត៤ម៉ឺនតោនជាមួយតម្លៃជាង២៦លានដុល្លារអាម៉េរិក។ តួលេខនេះសបញ្ជាក់ឱ្យឃើញថា អង្ករកម្ពុជានៅតែមានតម្រូវការខ្ពស់ ទោះបីជាត្រូវហែលឆ្លងព្យុះនៃវិបត្តិសកលក៏ដោយ៕