នៅក្នុងជំនួបពិភាក្សាលើកនេះ បានធ្វើការពិភាក្សាដោយផ្តោតលើយុទ្ធសាស្ត្រ ដើម្បីប្រយុទ្ធប្រឆាំងនឹងកូវីដ-១៩ កិច្ចសហប្រតិបត្តិការសេដ្ឋកិច្ច និងបញ្ហាពាក់ព័ន្ធនឹងវិបត្តិអាកាសធាតុសកលផងដែរ។
ក្រៅពីនោះប្រទេសមហាអំណាចទាំង៤ ក៏បានលើកយកបញ្ហាផ្សេងទៀតមកពិភាក្សា ក្នុងនោះ រួមមាន បញ្ហាលោហៈធាតុកម្រ ដែលជាសមាសធាតុចាំបាច់សម្រាប់ការផលិតគ្រឿងអេឡិចត្រិច និងផលិតផលផ្សេងទៀតដែលកំពុងប្រឈមនឹងការខ្វះខាត។
គេសង្កេតឃើញថា សហរដ្ឋអាមេរិកបាននិងកំពុងពង្រឹងទំនាក់ទំនងជាមួយសម្ព័ន្ធមិត្តនិងដៃគូរបស់ខ្លួនឡើងវិញ នៅចំពេលដែលប្រទេសចិនប្រកាន់ខ្ជាប់នូវគោលនយោបាយការបរទេសយកចិត្តយកថ្លើមប្រទេសក្នុងតំបន់អាស៊ីកាន់តែខ្លាំងឡើងៗ។
អត្ថបទគួរអាន
យ៉ាងណាមិញគេកត់សម្គាល់ឃើញថា អូស្ត្រាលី ជប៉ុន និងឥណ្ឌាហាក់មានអារម្មណ៍ល្អក្នុងការនិយាយជាមួយអាមេរិកឡើងវិញក្នុងរដ្ឋបាលលោក ចូ បៃឌិននេះ ដែលពីមុនមកទំនាក់ទំនងរវាងសម្ព័ន្ធមិត្តទាំង៤ មិនសូវជាមានភាពល្អូកល្អឺន នឹងគ្នាប៉ុន្មានទេ ជាពិសេសគឺនៅអំឡុងរដ្ឋការលោក ដូ ណាល់ត្រាំតែម្តង។ ម្យ៉ាងគឺដោយសារតែ ប្រទេសជប៉ុន ឥណ្ឌានិង អូស្ត្រាលី ក្នុងប៉ុន្មានឆ្នាំចុងក្រោយ រមែងត្រូវបានចិនធ្វើទុក្ខបុកម្នេញទាំងវិស័យសន្តិសុខ និងសេដ្ឋកិច្ច។
សូមរំឭកបន្ដិចថា ចិន និង តជប៉ុនជារឿយៗតែងតែប្រឈមមុខដាក់គ្នាក្នុងតំបន់ជម្លោះសមុទ្រចិនខាងកើត និង តំបន់ប្រជុំកោះតេវយូរ។ ចំណែកឥណ្ឌា និង ចិនឯណោះវិញ តែងតែមានការប្រឈមមុខដាក់គ្នារវាងយោធានៃប្រទេសទាំងពីរជាញឹកញាប់ នៅក្នុងតំបន់ កាស្មៀ (Kasmir) និង នៅតាមបណ្តោយព្រំដែននៃជួរភ្នំហិមាល័យ។ ដោយឡែក អូស្ត្រាលី និង ចិនវិញក៏មិនធម្មតាប៉ុន្មានដែរ ប្រទេសទាំងពីរបានតម្លើងពន្ធគយនាំចូល លើទំនិញរៀងៗខ្លួន ដែលចុងក្រោយនេះ ចិនបានសម្រេចតម្លើងថ្លៃពន្ធនាំចូលស្រាក្រហមរបស់អូស្ត្រាលីទ្វេដង ប្រការនេះបានធ្វើឲ្យអូស្ត្រាលីក្តៅស្លឹកត្រចៀកយ៉ាងខ្លាំង។
យើងនឹងរង់ចាំមើលបន្ដទៀតថា តើក្រោយជំនួបកំពូលរវាងមេដឹកនាំអាមេរិក ជប៉ុន ឥណ្ឌា និងអូស្ត្រាលីនេះ នឹងមានការព្រមព្រៀងជាយុទ្ធសាស្ត្រអ្វីខ្លះ ដើម្បីយកមកទប់ទល់នឹងឥទ្ធិពលចិន?None
