ហុងកុង ស្រីលង្កា ឈីលី និងបង់ក្លាដែសកំពុងស្វែងរកការចូលរួមជាមួយកិច្ចព្រមព្រៀង RCEP

កោះហុងកុង ប្រទេសស្រីលង្កា ឈីលី និងបង់ក្លាដែស កំពុងស្វែងរកការចូលរួមជាសមាជិកភាពនៃកិច្ចព្រមព្រៀងពាណិជ្ជកម្ម RCEP ដែលជាប្លុកពាណិជ្ជកម្មដ៏ធំបំផុតនៅពិភពលោក។ នេះបើតាមមន្ត្រីអាស៊ាន បាននិយាយកាលពីថ្ងៃព្រហស្បតិ៍។ RCEP បច្ចុប្បន្នមានប្រទេសចិន ជប៉ុន កូរ៉េខាងត្បូង អូស្ត្រាលី នូវែលសេឡង់ និងសមាជិកទាំងដប់នៃសមាគមប្រជាជាតិអាស៊ីអាគ្នេយ៍។

មន្ត្រី RCEP ដែលបានប្រជុំនៅខាងក្រៅកិច្ចប្រជុំរដ្ឋមន្ត្រីពាណិជ្ជកម្ម និងសេដ្ឋកិច្ចអាស៊ានក្នុងប្រទេសម៉ាឡេស៊ីក្នុងសប្តាហ៍នេះ បាននិយាយថា ពួកគេមានការជំទាស់តិចតួចក្នុងការទទួលយកអ្នកដាក់ពាក្យថ្មី ហើយកំពុងធ្វើការឆ្ពោះទៅរកការនាំយកដែនដី និងប្រទេសទាំង៤ខាងលើឱ្យចូលរួមជាមួយប្លុកនេះ។

អនុរដ្ឋមន្ត្រីពាណិជ្ជកម្មឥណ្ឌូនេស៊ី លោកស្រី ឌីយ៉ាស រ៉ូរ៉ូ អេស្ទី វីឌីយ៉ា ពូទ្រី (Dyah Roro Esti Widya Putri ) បានប្រាប់អ្នកយកព័ត៌មាននៅទីក្រុងកូឡាឡាំពួរថា ឥណ្ឌូនេស៊ី ពិតជាគាំទ្រដល់ប្រទេសណាមួយដែលមានឆន្ទៈចង់ចូលរួមជាមួយ RCEP។

ដោយឡែករដ្ឋមន្ត្រីពាណិជ្ជកម្មម៉ាឡេស៊ី លោក តេងគូ ហ្សាហ្វ្រុល អាហ្ស៊ី (Tengku Zafrul Aziz) បាននិយាយថា ការសម្រេចចិត្តណាមួយលើសមាជិក RCEP ថ្មីនឹងត្រូវបានពិភាក្សានៅពេល ដែលមេដឹកនាំប្លុកនេះជួបគ្នានៅខែតុលា ខាងមុខនេះ។ បច្ចុប្បន្ន RCEP មានទីផ្សារសរុប២,៣ពាន់លាននាក់ ជាមួយនឹងទំហំ GDP សរុបជាង២៦ទ្រីលានដុល្លារ៕

ដោយៈ សរ សុជាតិ