អ្នកជំនាញជឿជាក់ថា អចលនទ្រព្យដែលបម្រើឱ្យវិស័យឧស្សាហកម្មនឹងមានទីផ្សារល្អនៅឆ្នាំនេះ

លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានគូសបញ្ជាក់ថា ភាពរីកចម្រើន ឬអន់ថយរបស់វិស័យអចលនទ្រព្យត្រូវដើរទន្ទឹមគ្នាជាមួយនឹងស្ថានភាពសេដ្ឋកិច្ច។ ស្ថានប័នជាតិ និងអន្តរជាតិធំៗបានព្យាករថា សេដ្ឋកិច្ចកម្ពុជា នៅឆ្នាំ២០២៥ នេះ នឹងមានកំណើនល្អក្នុងរង្វង់៦% ដូច្នេះលោកជឿជាក់ថា កាលណាសេដ្ឋកិច្ចកម្ពុជា មានកំណើន នោះវិស័យអចលនទ្រព្យកម្ពុជា នៅឆ្នាំនេះ ក៏នឹងមានកំណើន​ដែរ។

ជាការកត់សម្គាល់របស់អ្នកជំនាញរូបនេះ ទីផ្សារទិញលក់ក្នុងវិស័យអចលនទ្រព្យកម្ពុជា ជារួម នៅដើមឆ្នាំ២០២៥ នេះ ហាក់មានកំណើនវិជ្ជមានឡើងវិញបន្តិចហើយ ប៉ុន្តែសម្រាប់តម្លៃអចលនទ្រព្យនៅឆ្នាំនេះវិញ នៅតែស្ថិតក្នុងតម្លៃទាបជាងទីផ្សារ។ លោក សន សៀប បានគូសបញ្ជាក់ថា អនុវិស័យអចលនទ្រព្យដែលនៅតែរក្សាបានកំណើនវិជ្ជមាន និងមានទីផ្សារល្អប្រសើរនៅឆ្នាំនេះ គឺអនុវិស័យអចលនទ្រព្យដែលបម្រើដល់វិស័យឧស្សាហកម្ម។ យ៉ាងណាមិញ សម្រាប់អនុវិស័យអចលនទ្រព្យដែលបម្រើដល់វិស័យកសិកម្ម អ្នកជំនាញរូបនេះអះអាងថា ក៏មានកំណើនល្អប្រសើរផងដែរ។

​គួរជម្រាបថា នៅក្នុងរយៈពេល១ខែដំបូងឆ្នាំ២០២៥ នេះ កម្ពុជាទទួលបានគម្រោងវិនិយោគថ្មី និងគម្រោងពង្រីកផលិតកម្មចំនួន៦៨គម្រោងជាមួយទុនវិនិយោគសរុបប្រមាណ៧៤៨លានដុល្លារ។គម្រោងវិនិយោគទាំងនេះ សុទ្ធសឹងជាការវិនិយោគក្នុងវិស័យឧស្សាហកម្ម។ នេះបើយោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា៕