បើតាមក្រសួងសាធារណការបានគូសបញ្ជាក់ថា ការប្រើប្រាស់រថយន្តអគ្គិសនីមិនត្រឹមតែជួយកាត់បន្ថយការបញ្ចេញសារធាតុពុលទៅក្នុងបរិយាកាសនោះទេ ថែមទាំងជួយកាត់បន្ថយការចំណាយបានច្រើន បើធៀបនឹងរថយន្ត ដែលប្រើប្រាស់ប្រេងឥន្ធនៈផងដែរ។
ថ្លែងក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆមាសទី១ និងលើកទិសដៅការងារឆមាសទី២ ឆ្នាំ២០២២ នៅថ្ងៃទី ១៨ ខែសីហា ឆ្នាំ២០២២ ឯឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា នាពេលបច្ចុប្បន្នការប្រើប្រាស់រថយន្តដើរដោយថាមពលអគ្គិសនីហាក់មានការកើនឡើងច្រើនជាងមុនគួរឲ្យកត់សម្គាល់។ ជាក់ស្តែងនៅរយៈពេល៧ ខែឆ្នាំ ២០២២ នេះ មានរថយន្តអគ្គិសនីដែលបានមកចុះបញ្ជីនៅក្រសួងសាធារណការ និងដឹកជញ្ជូនចំនួន ១៥៥ គ្រឿង ខណៈរយៈពេល៧ខែ នៅឆ្នាំ២០២១ មានរថយន្តអគ្គិសនី ដែលបានមកចុះបញ្ជីត្រឹមតែចំនួន ១១ គ្រឿងប៉ុណ្ណោះ ពោលគឺមានការកើនឡើងប្រមាណ ១៣០០% ឯណោះ បើធៀបនឹងរយៈពេលដូចគ្នាកាលពីឆ្នាំមុន។ ឯឧត្តម បញ្ជាក់បន្ថែមថា បច្ចុប្បន្នកម្ពុជា មានស្ថានីយបញ្ចូលថាមពលអគ្គិសនីចំនួន៧គ្រឿង ដែលក្នុងនោះ មាននៅខេត្តព្រះសីហនុ ១គ្រឿង ខេត្តបាត់ដំបង ១គ្រឿង ខេត្តសៀមរាប ១គ្រឿង និងនៅក្រសួងសាធារណការ និងដឹកជញ្ជូនចំនួន៤គ្រឿងផងដែរ។
អត្ថបទគួរអាន
ជាមួយគ្នានេះ ឯកឧត្តម ស៊ុន ចាន់ថុល ក៏បានគូសបញ្ជាក់ពីអត្ថប្រយោជន៍នៃការប្រើប្រាស់រថយន្តដើរដោយថាមពលអគ្គិសនី បើធៀបនឹងរថយន្តដែលប្រើប្រាស់ប្រេងឥន្ធនៈផងដែរ។ សម្រាប់ ឯកឧត្តម ការប្រើប្រាស់រថយន្តអគ្គិសនី មិនត្រឹមតែជួយកាត់បន្ថយការបំពុលក្នុងបរិយាកាសនោះទេ ថែមទាំងអាចជួយកាត់បន្ថយការចំណាយបានយ៉ាងច្រើនទៅលើថ្លៃប្រេងឥន្ធនៈទៀតផង។
បន្ថែមពីនេះ ឯកឧត្តម ស៊ុន ចាន់ថុល បានបញ្ជាក់ថា សម្រាប់រថយន្តអគ្គិសនីនេះដែរ ក្រសួងសេដ្ឋកិច្ច និងហិរញ្ញវត្ថុក៏បានកាត់បន្ថយចំពោះពន្ធនាំចូលក្នុងរង្វង់ ៥០% បើធៀបនឹងរថយន្តដើរដោយប្រេងឥន្ធនៈ។
បច្ចុប្បន្ន ក្រសួងសាធារណការកំពុងសហការជាមួយនឹងអង្គការ UNDP ដើម្បីដំឡើងស្ថានីយសាក់ថ្មយានយន្ដអគ្គិសនីចំនួន៥ទីតាំង ដោយក្នុងនោះមួយទីតាំង នៅក្នុងទីស្ដីការក្រសួងសាធារណការ និង៤ទៀតនៅតាមបណ្ដាខេត្ត។ បើតាម ឯកឧត្តម ស៊ុន ចាន់ថុល ធ្លាប់បានអះអាងថា កម្ពុជាគ្រោងនឹងដំឡើងស្ថានីយសាកថ្មយានយន្ដអគ្គិសនីនេះ ឲ្យបានលើស១៥ទីតាំងទាំងនៅរាជធានីភ្នំពេ និងតាមបណ្ដាខេត្ត ដោយក្នុងនោះ ក៏មានការសហការជាមួយវិស័យឯកជនផងដែរ៕
