ឧកញ៉ា ឡាយ ឈុនហួរ ប្រធានសហព័ន្ធស្រូវអង្ករកម្ពុជា បានបង្ហាញជំនឿយ៉ាងមុតមាំថា មហិច្ឆតានាំចេញអង្ករឱ្យបាន១លានតោនក្នុងមួយឆ្នាំរបស់រាជរដ្ឋាភិបាលកម្ពុជា នឹងអាចសម្រេចលទ្ធផលជាផ្លែផ្កានៅក្នុងឆ្នាំ២០២៦ នេះ។ បើតាមអ្នកជំនាញរូបនេះ ដើម្បីសម្រេចគោលដៅជាប្រវត្តិសាស្ត្រនេះ សហព័ន្ធស្រូវអង្ករកម្ពុជា បានខិតខំប្រឹងប្រែងជំរុញយ៉ាងសកម្មតាំងពីដើមឆ្នាំមកម្ល៉េះ តាមរយៈការបើកច្រក និងពង្រីកទីផ្សារនាំចេញថ្មីៗបន្ថែមទៀត។
ជាក់ស្តែងត្រឹមតែរយៈពេល៧ខែដើមឆ្នាំនេះ កម្ពុជា បាននាំចេញអង្ករទៅកាន់ទីផ្សារអន្តរជាតិ ក្នុងបរិមាណជាង៧០ម៉ឺនតោនរួចទៅហើយ។ ប្រធានសហព័ន្ធស្រូវអង្ករកម្ពុជា រូបនេះ បានគូសបញ្ជាក់ថា បើទោះបីជាបច្ចុប្បន្នការបង្កបង្កើនផលស្រូវក្នុងស្រុកហាក់រងការគំរាមកំហែងខ្លះៗពីបាតុភូតអាកាសធាតុអែលនីណូក៏ដោយ ប៉ុន្តែលទ្ធភាពនៃការផលិតអង្ករប្រមាណ៣០ម៉ឺនតោនបន្ថែមទៀតសម្រាប់នាំចេញក្នុងរយៈពេល៥ខែចុងក្រោយនេះ គឺមិនមានឧបសគ្គរាំងស្ទះនោះឡើយ។
ពាក់ព័ន្ធបញ្ហានេះដែរ លោក សុខ សុថា ស្ថាបនិក និងជានាយកប្រតិបត្តិសមាគមសហព័ន្ធកសិករកម្ពុជា នៃអ្នកផលិតកសិកម្មយល់ឃើញថា ប្រសិនបើមានការសហការគ្នាល្អរវាងគ្រប់ភាគីពាក់ព័ន្ធទាំងអ្នកផលិត និងក្រុមហ៊ុននាំចេញ ព្រមទាំងតួអង្គផ្សេងៗទៀតក្នុងការពង្រឹង និងពង្រីកកិច្ចសន្យាទិញលក់ និងអនុវត្តឱ្យបានត្រឹមត្រូវស្មោះត្រង់នោះ ផែនការនាំចេញអង្ករចំនួន១លានតោនរបស់កម្ពុជានឹងអាចសម្រេចបាននៅក្នុងឆ្នាំ២០២៦ នេះ។ តែយ៉ាងណាអ្នកជំនាញរូបនេះបានព្រមានថា ប្រសិនបើរាជរដ្ឋាភិបាល មិនអាចដោះស្រាយបញ្ហាប្រព័ន្ធស្រោចស្រពប្រកបដោយគុណភាពទេនោះ កសិករនៅតែបន្តប្រឈមនឹងការខ្វះខាតទឹកក្នុងការដាំដុះដំណាំស្រូវឱ្យបានពេញមួយឆ្នាំ ខណៈបាតុភូតអែលនីណូកំពុងបង្កការរំខានយ៉ាងខ្លាំងដល់ការធ្វើកសិកម្មនៅក្នុងពិភពលោក តំបន់អាស៊ាន រួមទាំងកម្ពុជាផងដែរ។
សូមជម្រាបថា កាលពីឆ្នាំ២០២៥ កន្លងទៅ ការនាំចេញអង្កររបស់កម្ពុជា ទៅកាន់ទីផ្សារអន្តរជាតិ សម្រេចបានជាង៩៤ម៉ឺនតោន គិតជាទឹកប្រាក់មានចំនួនជាង៦០០លានដុល្លារ កើនឡើងប្រមាណ៤៦% បើធៀបនឹងឆ្នាំ២០២៤។ អង្ករដែលកម្ពុជា នាំចេញភាគច្រើនជាប្រភេទអង្ករប្រណីតរួមមានអង្ករផ្ការំដួល និងអង្ករសែនក្រអូបជាដើម៕
