លោក ច័ន្ទ សុផល ប្រធានមជ្ឈមណ្ឌលសិក្សាគោលនយោបាយ និងជាអ្នកជំនាញក្នុងវិស័យកសិកម្មមួយរូបដែរនោះកត់សម្គាល់ឃើញថា ជាទូទៅកសិករធ្វើស្រែនៅកម្ពុជា ភាគច្រើនប្រើប្រាស់ពូជណា ដែលមានតម្រូវការទីផ្សារខ្ពស់ និងផ្នែកតាមបទពិសោធន៍ដែលខ្លួនមាន។ ពាក់ព័ន្ធការលើកទឹកចិត្តឱ្យកសិករងាកមកធ្វើស្រែដោយប្រើប្រាស់ពូជស្រូវក្នុងស្រុកដូចជាស្រូវរំដួល និងសែនក្រអូបជាដើម អ្នកជំនាញរូបនេះបានចោទជាសំណួរថា ប្រសិនបើកសិករគ្រប់រូបងាកប្រើប្រាស់ពូជក្នុងស្រុកទាំងអស់គ្នា តើភាគីពាក់ព័ន្ធហ៊ានធានាទីផ្សារស្រូវជូនកសិករកម្រិតណា ព្រោះតម្រូវការមានការកំណត់?
ពាក់ព័ន្ធបញ្ហានេះដែរ លោកបណ្ឌិត ប៉ា ចាន់រឿន អ្នកជំនាញផ្នែកទស្សនវិជ្ជា អប់រំ និងជាប្រធានវិទ្យាស្ថានប្រជាធិបតេយ្យកម្ពុជា បានលើកឡើងថា បញ្ហារឿងតម្លៃស្រូវធ្លាក់ថ្លៃនេះ វាជាបញ្ហាចាក់ស្រឹះមួយរបស់កសិករ ដែលបានកើតមានឡើងជាច្រើនឆ្នាំមកហើយ។ លោកកត់សម្គាល់ឃើញថា កាលពីឆ្នាំមុនទីផ្សារ និងតម្លៃស្រូវប្រភេទ OM មិនមានបញ្ហាក៏ដោយសារតែមានឈ្មួញវៀតណាមចុះមកប្រមូលទិញច្រើន តែឆ្នាំនេះពួកគេបានកាត់បន្ថយបរិមាណទិញ។ សម្រាប់អ្នកជំនាញរូបនេះ ការជ្រើសរើសពូជស្រូវសម្រាប់ដាំដុះរបស់កសិករ វាអាស្រ័យទៅតាមតំបន់ និងប្រភេទដីដែលកសិកររស់នៅ។ យ៉ាងណាក៏ដោយ លោកស្នើឱ្យក្រសួងកសិកម្ម រុក្ខាប្រមាញ់ និងនេសាទជួយផ្សព្វផ្សាយឱ្យបានទូលាយពីការជ្រើសរើសពូជស្រូវក្នុងស្រុក និងបញ្ជាក់ពីការធានាទីផ្សារ និងតម្លៃស្រូវប្រភេទនោះជូនកសិករឱ្យបានច្បាស់លាស់។
អត្ថបទគួរអាន
យ៉ាងណាមិញបើតាមការគូសបញ្ជាក់របស់លោក ភោក ភា ប្រធានសហគមន៍កសិកម្មភូមិ៣មានជ័យ និងជាកសិករធ្វើស្រែម្នាក់នៅស្រុកគិរីវង់ ខេត្តតាកែវ កត្តាដែលធ្វើឱ្យកសិករនៅស្រុកគិរីវង់ ភាគច្រើនបន្តធ្វើស្រែដោយប្រើប្រាស់ពូជស្រូវ OM គឺដោយសារនៅតំបន់របស់លោកមានទឹកជំនន់ ដូច្នេះហើយពិបាកក្នុងការប្រើប្រាស់ពូជស្រូវក្នុងស្រុក។ ម្យ៉ាងទៀតដោយសារពូជស្រូវ OM អាចផ្តល់ផលខ្ពស់ និងចំណាយពេលដាំដុះតិចជាងពូជស្រូវក្នុងស្រុក។ តែយ៉ាងណាលោក ក៏បានបំផុសគំនិតដល់ក្រុមកសិករធ្វើស្រែឱ្យសាកល្បងពូជស្រូវក្នុងស្រុកផងដែរ។
ពាក់ព័ន្ធទីផ្សារស្រូវនេះដែរ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអះអាងថា ស្រូវដែលកំពុងធ្លាក់ថ្លៃបច្ចុប្បន្នជាប្រភេទស្រូវ OM ដែលភាគច្រើនផលិតសម្រាប់នាំចេញទៅប្រទេសវៀតណាម តែសម្រាប់ស្រូវដែលប្រើប្រាស់ពូជក្នុងស្រុកនៅរក្សាបានតម្លៃល្អប្រសើរ ដោយសារវាមានតម្រូវការខ្ពស់។ ការធ្លាក់ចុះតម្លៃស្រូវ OM នាពេលបច្ចុប្បន្ននេះ ត្រូវបានឯកឧត្តមរដ្ឋមន្ត្រីក្រសួងកសិកម្ម អះអាងថា គឺដោយសារបរិមាណផលិតស្រូវប្រភេទនេះនៅឆ្នាំនេះហាក់លើសតម្រូវការ ស្របពេលឈ្មួញវៀតណាមកាត់បន្ថយការនាំចូល។ ទន្ទឹមនឹងនេះ ឯកឧត្តម បន្តលើកទឹកចិត្តឱ្យកសិករពិចារណាងាកមកប្រើប្រាស់ពូជស្រូវក្នុងស្រុក ដ្បិតវាមានទីផ្សារល្អ។
គួរបញ្ជាក់ថា បើតាមការអះអាងរបស់ក្រុមកសិករតម្លៃស្រូវប្រភេទ OM នៅឆ្នាំនេះបានធ្លាក់ថ្លៃមកនៅក្នុងរង្វង់៧០០រៀលក្នុង១គីឡូក្រាម ខណៈកាលពីឆ្នាំមុននៅពេលមានតម្រូវការខ្ពស់ពីវៀតណាមស្រូវប្រភេទនេះអាចលក់បានរហូតដល់ជាង១ពាន់រៀលក្នុង១គីឡូក្រាម ដែលជំរុញឱ្យកសិករបង្កើនការដាំដុះពូជស្រូវប្រភេទនេះកាន់តែច្រើននៅឆ្នាំនេះ៕
អត្ថបទដោយ៖ ជា ម៉ារ៉ា
